TALATUU O LE FANAU A ATIOGIE

1400 Hits

Fuimaono Na’oia Faasavalu Touli F. Tupua mo le Samoa Observer.

O Atiogie -e to’aono lana fanau tama ma le teine e to’atasi-lea sa nofo i Toamua le nuu o lona faletua o Tauaiupolu, o le alo o Ale-o lana fanau ua avea i aso nei ma tulafale o loo umia le pule o le nuu o le tamā o Atiogie, o Feepo lea fai mai e tauaso, ae sa nofo i uta o Toamua i le mea e igoa o A’ele-lea ua avea i le taimi nei ma vaega o le faatoaga a le D.H.P.G.i Vaitele e tusa ai ma faamaumauga a Misi Situpe-lea o loo ona ta’ua ai se tala uiga ese e uiga i le atalii o Feepo o Atiogie-ma le pogai na alu ai Atiogie e utusami i se tasi aso-ma taunuu ai i Toamua, ma na vaaia ai se malae telē lea o loo i ai pea i aso nei- o tau ai ni tama talavou i ni uatogi-ma fai le taaloga e igoa o le ‘Aigofie’ i luga o oga-niu- ma manumalo ai se manaia poo se alo o se tamalii.

Sa fia auai Leatiogie ma ina ua tupu a’e o ia ma avea ma taule’ale’a malosi-sa auai loa o ia i le ‘Aigofie’ ma na faato’ilaloina isi manaia uma-ae ua sili ai ona mitamita le toeaina tauaso o Feepo. A’o taotooto o ia i lona faleoo-na ia maua le tala ua manumalo lona atalii i le Aigofie-ona pati ta’oto ai lea o Feepo. O iinei la e afua mai ai le muagagana-“Ua pati ta’oto le Feepo.” 

O loo ta’ua foi i faamaumauga a Misi Pulo se tala uiga ese o le fai-tamā o Atiogie ma le tausiga o lona tama tauaso. Na avatu e Atiogie ufi mai lona toga-ufi i A’ele ma fao ‘ato ma teu i totonu o lona fale ae alu taele. Ae peitai-ua savali atu le Feepo ma na maua le ato ufi-ona nofo lea ma faitau ona o lona fia iloa lelei o le faatinoina o galuega a lona atalii, talu ai e faasili e tagata Samoa le ufi i lo le talo- e avea ma taumafa o aso uma.

Ina ua iloa e Feepo e tasi le tolo ufi mo ia i aso taitasi uma, ae ina ua aulia le aso lona fitu- sa tago loa Feepo fafati ese le isi tolo-ma faamanuia i lona atalii ma folafola atu ia te ia lana fanau o ni tama- e to’aono ma le teine e to’atasi- mo tolo ufi e ono ma le fasi tolo na ia fafa’i ese. Na taunuu lava lenei folafolaga a le Feepo e pei ona faamaumauina e Misi Pulo ma faaigoa ai loa le gafa o Atiogie o le ‘Gafa o le Ufi’.

O lea la tala o se faataitaiga lelei lea o le taua o matua Samoa ma le tuuina atu o a latou fanau e tausi i latou; aemaise ai lava o le magafagafa pea o le atalii i le tausiga o lona tama lea ua manumalo ai i lona alofa- aemaise ai lava o le aiga atoa ma le pulea o le aiga. O loo faamaumau e Misi Pulo faapenei le fanau a Atiogie’ O Alali, Savea, Tuna, Fata, Ma’au ma Ve’atauia ma le teine o Leaimuli poo Atiati poo Momoi-ufi.

O le faamanuiaga a le Feepo na taunuu lava i se tulaga uiga ese, aua o Savea na faavaeina le Aiga o Malietoa, o isi ona uso totoa ae laiti o Tuna ma Fata -na la faamutaina le pule a Tonga i Samoa nei-ma na faae’e atu ia te ia le suafa o Malietoa lea na mafua mai le faamavaega a le Tuitoga. E leai se faamaumauga e tasi o maua e faasino i ona uso laiti o Ve’atauia ma Leaimuli. Ae peitai – o le teine o Atiatiogie na nofo ia Tagaloa o Pata Falelatai ona maua ai lea o Ulumasui-lea foi na faatinoina se tasi o vaega tele o le taua ma tagata Toga. O lona poto ma le mata’alia na sao ai Tuna ma Fata; aemaise ai lava i Safotu Savaii lea sa faa-pologa ai tagata Samoa. O iina sa lafo i ai pagota i totonu o se Lua tele e igoa o le Pu i Vaimoa, ma aumai ai i fafo nisi o tagata sa faasala.

Na fatonu e le Tuitoga lea uso e to’alua la te fuli ese se ma’a o loo poloka ai le ala i Safotu e latalata i le tolotolo o Mata’uea-lea e i le itu i sasa’e o le nuu (Malae o Malau). Talu ai ona e fasiotia i la’ua pe a le mafai ona la fuli ese lea ma’a- o lea na la o ai i lo la tuafafine i Falelatai latou te o i Savaii. O Ulumasui lea na avatua le suavai ina ua ‘eli lea ma’a-ma tuu i ai ni tuna ma fe’e ina ia faigofie ai ona fuli ese lea maa.O le taimi lea na sao ai Tuna ma Fata ma fai ai loa fuafuaga mo le faasaoina o tagata.

Sa mulimuli ane ona ‘au-faatasi Ulumasui ma Fata ma tutuli ese Tonga mai sasa’e i sisifo; ae o sauté sa aga’i atu ai Tuna ma Tapuola o Aleipata ma faaauau ai lava ona fasi tagata Toga sa i le itu i matu. E tusa ai la ma faamaumauga-fai mai na ta e Masui lea Maa ma iloa ai e ‘o’ō-o lea pu o le maa na fafao i ai e Masui tuga mai le taufusi o loo i Manase –fe’e ma pusi o le sami-ona faatoa mafai ai lea ona latou ‘eli ese le eleele-ma a’o latou faia lea galuega-sa latou pepese:

Sa tuna, Sa pusi, Sa fe’e-o mai tatou fuli lenei maa tele….”Ona faato’a pa’ū atu ai lea o lea ma’a i le sami ma o loo mafai lava e tagata e o’o mai i aso nei-ona savavali faataamilo ai tagata. Sa fai le malo o Toga i Savaii, Upolu ma Tutuila se’ia vagana ai Manu’a. O le uso la lenei na latou lagaina le to’ilalo o Samoa ia Toga-ma o le taua foi lea na fai ai le mavaega a Talaifei’i i Tulātalā:”Ua malie toa-malie tau-Ou te le toe sau i Samoa u se auliulitau-A o le a ‘ou sau i le Auliulifolau.

O le uso lenei na malepe ai tofiga o Samoa, ina ua to’ilalo Toga-ae o le a fai lava la latou pule i Samoa nei. Ona te’a lea o Lealali ma lona Tumua i Aana-o Leulumoega lea, a’o Savea ua nofo ma lona Tumua- o le Malietoa lea, ae faleo’o faiga-malo ia Faleata-Te’a Fata ma lona alataua i Safata.

© Samoa Observer 2016

Developed by Samoa Observer in Apia