Ua fesiligia e le Minisita Lagolago Leoleo

Tusia Lanuola Tusani Tupufia ma Faaliliu e Seagaitumua Tupuola ,

111 Hits

Peseta Vaifou Tevaga.

Peseta Vaifou Tevaga.

O loo sailia e le Minisita Lagolago o le Matagaluega a le Palemia-o Peseta Vaifou Tevaga-ni tali mai Leoleo. 

Na te fia iloa pe o le a le latou mea ua fai i lana faaseā lea na faaulu e faasaga ia i latou i le tausaga talu ai. 

O loo talia e le Faipule mo Faasaleleaga Nu.4 se faamasinoga o se mataupu tau solitulfono-lea sa feagai ai o ia ma se moliaga e tasi le saini faamalosi o pepa ma le isi moliaga tau faiga pi’opi’o-i le itu i se pepa na tuua’ia e faapea na ia sainia faamalosi. O le fofogaina o lea mataupu na tolopoina se’ia aulia Setema o le tausaga nei. Na teena e Peseta ia moliaga.

I le taimi nei, ua mae’a ona ia faaulu se tagi e faasaga i le Matagaluega o Leoleo e tusa ai ma le tagofia o le mataupu lea na mafua ai moliaga e faasaga ia te ia. O ananafi na ia faailoa ai i le Samoa Observer-na te le’i maua lava se faaaliga mai ia i latou.

“E le’i aveeseina la’u tagi,” o lana faaaliga lea. “Ua uma ona ‘ou faaaluina ni tupe se tele i la’u loia ma e le tatalaina i tua la’u tagi. “Ou te le’i maua lava se tala mai Leoleo talu mai lena taimi (na faaulu ai la’u tagi).

Pau la le latou e fai mai pea-o loo fai a latou suesuega i lea mataupu ae leai lava soo se tulaga tau le faagasolo i luma o lenei mataupu.” E tusa ai ma Peseta, e aliali mai e le o faia e Leoleo se tulaga auiluma. “O le tali lava lea i taimi uma e te fesili ai,,” o lana faaaliga lea. “O loo fai a latou suesuega…Ou te le’i maua mai Leoleo ma le suesuega ma le tagi e faasino i ai faatasi ai ma le anoano o isi mea e faasino i le fanua, tupe ma isi lava mea. “O le a outou maua lava pe a uma mea uma.” 

Ae mo se tagi tau tagata lautele o loo aafia ai se Faipule faatasi ai ma le Fofoga Fetalai muamua o le Maota o Laaulialemalietoa Leuatea Polataivao ma isi, fai mai a ia-ua uma ona tuuina atu lenei mataupu mo le talanoaina.

Fai mai Peseta o le a valaau lea mataupu ia Aokuso ae o le fofogaina o moliaga tau solitulafono e faasaga ia te ia ua faatulagaina mo le faaiuga o le tausaga.Sa le mafai ona maua ai se manatu aloa’ia mai Leoleo ananafi.. 

Sa le mafai ona maua i lona ofisa le Fofoga o le Matagaluega o Leoleo, o Maotaoalii Kaioneta.

© Samoa Observer 2016

Developed by Samoa Observer in Apia