Samoa ne’i Galo Talatu’u ma Tala o le Vavau a Samoa
E pei o se lamepa lotolotoi i le pogisa, ma o le a le-mate le susulu o lona malamalama e ofaga iai mafaufauga o tupulaga au i luma o Samoa
O nisi nei o Tala ua ‘oto mai le Tusi, Samoa Ne’i Galo (Volume 1) sa tu’ufa’atasia ma fa’amaumauina e le Matagaluega mo Tupulaga, Ta’aloga ma Aganu’u, ua ‘auina atu e lau Nusipepa, le Samoa Observer aua tupulaga ma le mamalu o le atunu’u e pei ona fa’ananau iai. O nei tala, o le a ‘auina atu i vaiaso ta’itasi.
O LE MAGŌ I FOA
Upu Tomua:
O le Magō, o se meaola na ola i le sami i aso o le Vavau, e le gata ina telē ‘ae o ona foliga fo’i e ‘ese a le ‘auleaga na i lo foliga o le tele o meaola o le gataifale. O aso la, sa taia lava i le faalogo tala fe’avea’i e uiga i le Mago i Foa. Sa tu’ufesili fo’i le mafaufau, o fea e i ai, o le a lona uiga ma e mafua i se a le igoa?
Mulimuli ane, ua mautinoa, o le tala lenei e ‘auga i Foaluga ma Foalalo i le itu i Saute sasa’e o le motu o Savai’i. O mo’omo’oga na faufausia, e asiasi e fia feiloai e le gata i ia afio’aga ua ta’ua, ae fia iloa tino le Mago i Foa.
I le amataga o le 1988, sa maua ai le avanoa ma feiloai atu ai i se tasi o toe ulutala i Foaluga, le tofa a Lauafia Tu’ese. O la a le toeaina, na te manatunatu e lei sailia atu lava i lo latou afioaga i le tele o tausaga ua mavae se faamatalaga e uiga i le Vavau.
O le Tala:
“Ua tulituliloa le Mago i Foa”
O Vai ma Sigano, o le ulugalii lea na lama amata mai le nu’u o Asau, ma pai ane ai i gatai o Foalalo ma Foaluga. O loo i ai le vaipuna e lata i le matafaga, o le igoa o lea vai o Falemoa. E le se mea taumate la, na afe le lamaga i lea vaega o le gataifale, e fia fa’alanu pe ua fia feinu fo’i aua ua mamao le savaliga o le lamaga. Na ta’ua e faapea, e o ane le ‘aufaiva, o ta’e’ele se ulugalii o ia nu’u. O o la igoa o Muli ma Tula. Se’i mu’ai fai le mau i le aulalama ma le ulugalii Foalalo ua ta’ua. O a le toeaina, e foliga o le lamaga ua o se agaga pe o se tau faapalopalo, fua ina ua matua sopo’ia le talafatai, afua mai le itu i Sisifo, ao lea ua o’o ane lava i le aga i Saute. O Muli ma Tula, o la’ua ia na talia le ulugalii lalama.
Se tasi taofi, na te’ena e le ulugalii Foalalo le lamaga, ma tuli’esea ma le vai. O lo’o liuma’a i gatai o le vai le ‘aulalama, a ua lafoa’i ola fagota, o loo i ai ma le tama’i i’a, o le Manoo lea.
Le meaola poo le tama’i i’a lenei na mau ai i luga o papa, le mea ua tupoupou ai Vai ma Sigano, tupu ma ola ai. Mavae nisi aso, a ua vaaia e tagata le fealua’I solo o le meaola lapo’a i le gataifale, ma i’u lava ina avea o se i’a tele ma le mata’utia.
Aga’i le mau i le Mago i Foa. Sa mata’utia le meaola i tagata ona ua maoa’e le lapo’a. Ua le gata i le va’aia i gataifale o Savaii, a ua faasolo lava i motu i Sasae o le Atu Samoa. I le o le mea lea na mafua ai ona fetaui le Mago i Foa ma le i’a tele sa i gataifale o Samoa i Sasae, na ta’ua o le Melomelo a le Tuimanu’a, poo se malie siiti’a naua. O se tasi o masaloga i le pogai o le taua i le va o nei meaola e lua, ona o le Mago e peiseai e ‘ese ai lava ona foliga i le tele o i’a o le sami.
“Ua tulituliloa le Mago e le Melomelo”
Sa le gata ina tau, ae vavave fo’i gaoioiga a le Mago ma tulitausi’a ai le i le vasa. Na mulimuli ane, ua tiliola le Mago i lona nofoaga aua ua matamataita le saua ma le fia faaumatia o le Mago e le Melomelo a Manu’a. Sa ta’ua, le tuliga lenei na o’o i gatai o Foailalo, tuanai le sami loloto, ae aga’i lava i uta i le vai, ma o’o i le mata o le vai o Falemoa. O le mau la sa faaalia o loo liuma’a ai le Mago i Foa ma le Melomelo a Tuimanu’a i le vai ua ta’ua nei.
Manatu Faaopoopo:
1. E manatu nisi tagata aemaise le motu o Savaii, o le Mago na tau ma le Paitele. Le i’a tele lenei ma le mata’utia sa fai ma fili i le va o Savaii ma Upolu i femalagaiga. O le Mago, fai mai le isi taofi, e le gata na maua i le lamaga a Vai ma Sigano, ae ina ua lapo’a ma maoa’e le tino ona alu lea nofo i gatai i Asau. Sa ta’ua e nisi o le tanifa ona ua mata’utia.
2. I le e faapea fo’i nisi taofi, o le Pa’itele lenei na amata ona tau ma le Mago i gatai i Asau ae faai’u ane i Foalalo ma Foaluga. Na sao lea na o le Mago i uta, liuma’a i le vai, a ua le sao le Paitele i le ava, ona alu lea mau i gatai o le Pupu i le nu’u o Tafua, lea ua taua lea mea o le Paepaeolei’a.
3. O le maea o le tuliga o le Mago e le Paitele na sosoo lea ma le foua o le i’a e le tama o Alo mai le nu’u o Palauli, lea na a’e i Safata i Upolu.
4. Ae ui ina feuluulufa’i taofi o le au teutusi i upu ma tala o le vavau, ao le lagona autu, e ono apoina lava le finagalo o le na ia faaalia le mau, le nu’u tonu e ou le vavau ua ta’ua nei:
Na tupu ai le Mago i le gataifale o Foalalo ma Foaluga.
O le Mago lenei na tau ma asaasa le vasaloloa ina ua ita tele le Melomelo a le Tuimanu’a.
O le lamaga a Vai ma Sigano mai Asau, na tali e Muli ma Tula o Foalalo ma Foaluga.
O loo liuma’a le Mago i Foa ma le Melomelo a Manu’a i le mata o le vai, o Falemoa poo Sinafalemoa.
5. Mai po anamua e tau mai fo’i i nei tupulaga, e faaoga le igoa Mago i Foa e faaigoa ai se:
a) Au Kirikiti
e) Au ta o tautiaga anamua
i) Sa po o vaa
o) Taavale i ona po nei
Uiga o Upu: [faatatauina i le faaaogaina i le tala lenei]
‘auteutusi – tagata popoto i aganuu, silafia loloto
Agaaga – fia foua, tau lu’ilu’i, fa’afiaulavale
Aga i sauté – aga’i, faasolo ane i sauté, malaga aga’i i sauté
Tupoupou – tu faasasa’o, liuma’a ma le gaoioi
Fa’alanu – ta’eele, fa’ate’a ‘ese le mai o le sami
Foua – sauna tau, faafetauia, agaaga
Maugamea – mea ua maua, manuia i mea’ai
Momo’o – naunauta’i, talotalo, faamoemoe i
Naumati – mativa i vai, matelaina i le fia inu
Sufia – faamatala, le na faaalia, le ua ta’ua
Tautiaga – taga ti’a, ‘au ta o taga ti’a, taaloga
Talalasi – mau eseese, le tasi se taofi
Tiliola – sulufa’i, tili, ausulusulu, fiasao
Toe ulutaia – matai matua, atamai i Tu ma Aganuu
Alagaupu [faaaogaina i le tala]
1. “Mo’omo’o fa’alupe o le naumati”
a) upu e faaalia ai le naunau o le loto i se mea
e) mo’omo’oga o le faamoemoe
naunautaiga o le loto
i) talotaloga o le taofi mo le lumana’i i se mea lelei
2. “Ua tulituliloa le Mago i Foa”
a) upu faanoanoa ona o se mea ua faaletonu
e) se mea ua faaalia ai le fia taui ma sui
i) ua fia tuuina atu le leaga i se tasi poo nisi
o) le maua se loto faamagalo ona o se sese
Faamatalaina:
O le Tofa ia Lauafia Tu’ese, le tulafale matua o le Afioaga o Foaluga ma nisi o Foalalo.