O le olaga galue

Tusia Ulimasao Fata ,

32 Hits

Taulamago Simone 48 tausaga o lona soifua mai le afioaga o Leauva’a.

Taulamago Simone 48 tausaga o lona soifua mai le afioaga o Leauva’a.

O le olaga ua iaia nei Samoa ua tupe lava mea uma, ma o le auala sili e foi’a ai lenei fa’afitauli o le galue’ina lea o fanua aemaise ma’umaga.

O le talitonuga lea I le Tama ia Taulamago Simone 48 tausaga o lona soifua mai le afioaga o Leauva’a. O Simone o se Tama ua to’alima lana fanau, ma sa maua le avanoa e fa’atalatalanoa ai I le Fofoga o Samoa a’o ia aga’i atu I lana ma’umaga I le taeao ananafi.

Na saunoa le Tama ia Simone o le tau o le soifuaga ua taugata lava ae o le faitio ma le nofoa’i e le’o le tali lea.

“O le tau o le soifuaga ua iaia nei le tatou atunu’u ua matua taugata lava ae ou te talitonu pau le auala e foi’a ai lenei fa’afitauli o le toe galueina lea o tatou fanua.

“O le isi mea ou te iloa o lo’o mafua ai le taugata tele o le soifuaga ua iaia nei Samoa ona o le tele o oloa mai fafo o lo’o tatou fa’atauina mai ma o le ala tonu lea e ala ai ona taugata.

“E tusa foi I le iai o fai pisinisi mai Saina I le tatou atunu’u o lo’o fa’apena lava ona taugata le tau o le soifuaga e tutusa lava ma tagatanu’u Samoa o lo’o faia a latou pisinisi.”

Na saunoa foi le Tama ia Simone e to’atolu tagata o lo’o faigaluega I le latou aiga, ae to’alua lana fanau o lo’o aooga pea.

“O le to’atolu lea o lo’o faigaluega ma fesoasoani I le itu tau seleni o le matou aiga o la’u fanau matutua lea e to’atolu.

“O latou e gafa lea ma le itu tau seleni ae o a’u lea e gafa ma le fesoasoani I le itu o meaai mai le ma’umaga.”

Na saunoa foi le Tama ia Simone e tele lava le itu e mana’omia ai le seleni.

“O le olaga ua iaia Samoa o le tupe a mea uma, ma o le upu moni lava lea.

“O le seleni e fa’aoga I ni vaega se tele, e pei o letotogi’ina o pili, o le faiga o fa’alavelave fa’a le aiga aemaise foi le tausiga o Ekalesia aemaise Nu’u.”

© Samoa Observer 2016

Developed by Samoa Observer in Apia