O le a sui le tulafono o le Auala

Tusia Pai Mulitalo Ale ma Faaliliu e Seagaitumua Tupuola ,

262 Hits

 CHIEF EXECUTIVE OFFICER OF LAND TRANSPORT AUTHORITY: Leasi Vainalepa Galuvao.

CHIEF EXECUTIVE OFFICER OF LAND TRANSPORT AUTHORITY: Leasi Vainalepa Galuvao.

Ua toe sui e le malo tulafono o le alatele.

I le taimi nei, o se suiga i tulafono o le tu’u avanoa i le isi taavale o le a faamamaluina i le aso 3 o Setema 2016, e tausi ai tulafono tau auala a Samoa ina ia tutusa ma tulafono a Niu Sila ma Ausetalia..O lea suiga-o lona uiga o taavale e afe i le itu taumatau o le a tu’u avanoa i se taavale o loo sau e afe i le itu tauagavale. O le tulafono i le taimi nei o loo tuuina atu ai i le avetaavale e afe i le itu taumatau le aia tatau e alu ai. Ae peitai-o lea tulaga o le a vave ona sui.

O lea fuafuaga na faalauiloa e le Ofisa Sili o Pulega o le Pulega o Fela’uaiga i le Laueleele, o Leasi Vainalepa Galuvao ananafi i le faagasologa o se talanoaga ma nusipepa.

O lea suiga o le a faamamaluina i le itula e 6 i le taeao o le aso ua faatulaga e le  L.T.A.

O lea tulafono e faaaoga i fesootaiga uma i totonu o Samoa se’ia vagana ai molī auala o i fesootaiga o ala ia e tatau ai i avetaavale ona usita’ia molī faasino ala.

E tusa ai ma Leasi, o lea suiga o le a faafaigofie ai le aveina o taavale i totonu o Samoa ma sili ona faigofie mo tagata o aiga, uo ma turisi mai Ausetalia ma Niu Sila.

 “O le tulafono lenei o loo faaaoga i Niu Sila ma Ausetalia ma e tatau ona faia lea lava faiga –talu ai-o loo tatou aveina taavale i le itu lava lea e tasi e pei o i latou,” o le faaaliga lea a Leasi.

Ua uma ona amata mea le Pulega ia latou taumafaiga faalauiloa ina ia mautinoa ai ua malamalama lelei avetaavale uma i lea suiga.

 “Ua na o sina suiga itiiti lenei suiga,” o le faaaliga lea a Leasi. “Ou te mautinoa e vave ona aoaoina e ave taavale. A  tilotilo i le suiga i totonu o Niu Sila-e faatoa tuuina atu lava se taimi puupuu e toe sui ai.”

Fai mai Leasi o loo latou taloina ni feiloaiga ma avetaavale o pasi ma taavale la’u pasese ina ia malamalama i le latou fe’au.

Na ia toe ta’ua e faapea o lea suiga o le a ‘alofia ai le tele o manatu fete’ena’i i luga o le auala-talu ai-o le tele lava o faalavelave faafuase’i e mafua mai le “Tulafono o le Tuu-avanoa.” Ua faatuina foi e le L.T.A. faailoilo i luga o fetaulaiga uma o ala e faailoa atu ai i sui o tagata lautele lea suiga. 

O luga atu o lena, o le a galulue faatasi le Pulega ma le Matagaluega o Leoleo ina ia mautinoa ai le saogalemu o tagata lautele pe a faatino lea suiga.

O le latou faagaoioiga o le a faatino mai le itula e 6 i le taeao ma o le a latou i luga o le alatele e tuuina atu le fautuaga ma faasino i tagata lautele le Tulafono Fou o le Tuu-avanoa.

© Samoa Observer 2016

Developed by Samoa Observer in Apia