Lavea’i le Komiti a Tinā i mafati’aga o le afioaga
E taunu’u atu le Fofoga o Samoa i le aso ananafi i le afio’aga o Mulifanua, ua mae’a ona tufatufa i le tele o aiga e le afioaga tanevai e 41.
E mo le silafia ai ua leva ona feagai le afio’aga ma le fa’aletonu tau i le suāvai.
O le fa’atupeina o lea galuega tele na feagai lea ma le Komiti a Tinā o le afioaga.
“Sa fai le fono a lo matou Komiti i le fa’aiuga o le masina ina ua ou taunu’u mai i le tolu masina na alu ai la’u si’igama’i i atunu’u i fafo.
“Ia e tau mai la, o lo’o oi atu le to’atele o tagata o le afio’aga ona o leutiuti o le suāvai maua.
“Aua ou te ta’u sa’o atu lava, na o le vaveao e ola mai ai le paipa i le tele o aso, ma o se fa’afitauli ua loa tausaga o feagai pea ma le nu’u nei.
“ Ia ona fai lea o le fono o le Komiti ia ma fa’amatu’u mai ai loa lea o se vaega o la matou teuga tupe, ia ona alu loa lea o le savali i le au faitane po o ai e maua ai sina paū.
“O se tasi o Initia i Vaitele lea na sau uma ai tane nei e 41 ma e toe 6 e tatau ona aumai i le vaiaso o lo’o lumana’i nei.
“Ia ua toeitiiti lava a so’o le nu’u, o lea e fa’apea a uma le 41 o tane ona toe tilotilo lea mo nisi tane ina ia so’o lelei le afioaga nei.
Na ia ta’ua o lo’o ave le fa’amuamua a lo latou Komiti a Tinā i aiga o lo’o matua’i mana’omia lava le fesoasoani tau suāvai.
“Ia mo le silafia ai, a uma ona tufa ona toe folo atu ai lea po o fai stand ma talivai aua e pau lava ia o vaega o lo’o fa’atinoina e aiga ta’itasi.
“O le tele lava la o aiga ua susua a latou tane, ia ua uma le oi, ua le pei o le mea sa i ai muamua e pei ua toe fo’i i le amo vai e pei o la aso.
“O lo’u ia iloa i ai o se mea e tatau ona fai, ua uma fo’i ona fa’afetaia e le nu’u le Komiti o Tinā i lea tulaga.
“E ui e le’i so’o ia se’i va’ava’ai atu pea.
O le itu mautinoa, o lo’o i ai talosaga a le afioaga i le malo i le taimi lenei.
“E leai ma se fesoasoani a le malo i le mea lenei.
“Sa i ai talosaga na ave muamua, ae na o le C.S.S.P. na tali mai ma aumai ai le 10 tanevai pe ua tusa nei ma le sefulu tausaga talu ai.
“Ia o lena ua outou silasila mai, o lea ua alu lava la matou Komiti e leai se toe fa’atali.