Fa’aaoga tatau le ’ele’ele
O le manatu maualuga o le tinā i a Fa’afaga Na’asona o le taumafai lava ina ia o’o lelei lea tulaga i le mafai e tatau ona i ai aua lava le tausia lelei o aiga.
O le fa’atalatalanoaga ma le Fogfoga o Samoa na ia fa’ailoa ai le taumafai lava i le mafai e gata aua le atina’eina o aiga.
“E pei ona outou maitau maia i si o matou aiga, e pei o lea lava le tulaga o lo’o taumafai ai le taimi lenei.
“O koko lava o lo’o fa’atau aua lava tupe e tausi ai fanau aemaise o aiga i aso uma.
“Ou te talitonu e le na’o a’u o lo’o taumafai ai lea tulaga, ae o le tele o nai aiga i uta nei, aua e tetele fanua.
“I si o matou aiga, e pei o le koko lava o lo’o tele ina fa’aaogaina ai lea ele’ele e pei ona ua i ai nei.
“Ua tatou iloa uma lava , ia e le’o toe ola fua se isi i lenei lalolagi.
“A e mana’o i se mea e ao lava ina ia e fa’atino ia fa’atoa mafai ai lea ona e maua.
“E pei o lea le tulaga o lo’o ua i ai le taimi lenei, o le taumafai lava ina ia atia’e aiga i le mafai e gata ai.
“O a vaega ua fo’ai e le Atua, ia o le fa’aaoga tatau lava, aua ua o tatou iloa ua le’o toe faigofie nei aso.
“Ua faigata lava, i lo tatou iloa i ai.
“O lea lava le tulaga o lo’o i ai le taimi lenei, e pei ona fa’ailoa atu si o matou aiga.
“Ia o le tupe lava, aua a leai se tupe ia le mafai ona fa’atino nisi o vaega o lo’o tatou manana’o ai i aso uma.
“Ae mo le silafia ai, o lea lava le tulaga o lo’o i ai si o matou pitonu’u nei, o le taumafai lava ina ia mafai mea uma, aua le aga’i ai le lumana’i.