Ia toe timata le upega mo le ola o tupulaga talavou

Tusia Seia Soloi ,

153 Hits

Faamalosia le toe tapu’e mai o ola o tupulaga talavou: Talamatavao Motu faamamafa le toe aoai lelei o fanau.

Faamalosia le toe tapu’e mai o ola o tupulaga talavou: Talamatavao Motu faamamafa le toe aoai lelei o fanau. (Photo: Sei’a Soloi)

Tele uiga mai fafo ua lofia ai lo tatou atunuu nei o suiga tetele ma le maoa’e ua aafia ai le ola o tupulaga lalovaoa o le atunuu. O le fesili, o fea o iai le fautua a matua? Ua faatamala le tele o matua i le vaaiga o fanau ma le taumafaiga o le ola mo le lumanai o fanau.

O le manatu maualuga lea o le tama matua ia Talamatavao Motu, 67-tausaga le matua mai le afioaga o Faleasiu. O ia o se tama tausi aiga ma lana fanau e to’atolu.

 I lana ia a vaai i lenei vaitau i le tele o suiga ua ofi ma ii totonu o Samoa ua aafia ai le ola o le tele o tupulaga talavou i lenei vaitaimi ua maoa’e ma tulaga ese.

“Ua aafia ai lava le va nonofo ai o matua ma fanau, aua o nei suiga ua aofia ai ma le aia tatau a le tamaitiiti i lenei vaitau ua le toe fia faalogo fanau i matua ua na’o le faamaualuga ma taliupu” o lana tala mai lea i le Fofoga o Samoa.

I le maitau a le tama, ua le tutusa ona aso nei ma aso ua alu i lo latou vaitaimi, ai ona o le tele o suiga.

“E ese le mamalu o la aso ua mavae e o’o i le va o fanau ma matua sa faamalosia le ava fatafata aemaise ai o le ava ai o fanau i matua.“Ao nei aso, Talofa i le tele o tupulaga ua muamua le faamaualuga ma tali i matua aisea? Ona o le tele o suiga o le olaga ua iai nei.

E talitonu le tama, o lenei olaga e omai faatasi lava suiga ma luitau atonu o le ala lea o le faapea ai o le tele o fanau i lenei vaitaimi.

“E ala ona faapea le tele o fanau ona ua le toe faamamaluina le tulafono sa sau a ii aso ua mavae, o le sasa lava o le fanau i aoga ae o le tele o le mau tulafono ua iai nei ua le toe faamalosia ai lea vaega.

“Ua tatau i le Malo ona toe silasila toto’a iai i lea vaega ina ia toe talanoaina ma faamalosia aua a tatou fanau mo le lumanai.

Faimai le tama ia Talamatavao, o le tele o duiga ua iai nei ua afua mai lava i aiga ma matua.

“Ua iai nei le Aia-Tatau a le tamaitiiti ae sa leai ni mea faapea i la aso, ae i lo’u lava ia iloa o totonu lava o aiga e afua mai ai le ola a’e ai o le tamaitiiti po o le teineitiiti e afua ma ii totonu o le aiga.

“O le galuega lea a matua i le va ma fanau ina ia aaoai fanau aua a oo ina matutua ae la e sa’o ma atoatoa mea uma ua faia mo fanau.

Pau le talosaga a le tama, ina faia nei loa manu e lei tuai ona tele leao le faafitauli.

“A vave fofo atu lava nei e o’o atu i le lumanai ua malamalama atoatoa le fanau aemaise o talavou o lo’o fai ma ii mea sa omai ai foi matua i aso ua mavae.

© Samoa Observer 2016

Developed by Samoa Observer in Apia