O le tautua lava!

Tusia Vatapuia Maiava ma Ilia L Likou ,

121 Hits

Tipesa Iakopo o Salelologa.

Tipesa Iakopo o Salelologa. (Photo: Vatapuia Maiava)

Na fa’ailoa e Tipesa Iakopo o Salelologa i le Fofoga o Samoa o lo’o fa’alagolago tele lo latou aiga i tupe  maua  mai le fa’atauina atu o fua o fa’ato’aga i le Maketi o Salelologa i aso uma.

“Ia o le taimi lenei o lo’o i ai nai o’u tuagane o lo’o faigaluega ia ae le mafai ona fa’atusalia ai le tele o le tupe maua mai i fa’atauga o  fuala’au ‘aina i’inei i le maketi i aso ta’itasi.

“O le galulue fa’atasi lava i aso uma ma ou te iloa lava e a’u ia e māmā ai se avega tauave.

“Pei o lea le fa’amoemoega tele lava o le aiga o lo’o i ai i le taimi lenei aua e le’o toe faigofie nei aso, ua fai lava si taugatā o le soifuaga.

“O le tele lava o le fesoasoani mo le aiga o fuala’au ‘aina lea  o lo’o matou fa’atau atu.

“Ia e tele le fesoasoani e maua mai fua o fa’ato’aga o lo’o fa’atau atu , e tusa pe $300 le tupe e maua i le fa’atauina o fuala’au ‘aina i nisi aso pe ā lelei lava.

“ Ia a sau fa’alavelave ia e alu le tupe , e le fesiligia lea tulaga, aua e alu atu le tupe ia ae lae maua lava fa’atau i lea aso ma lea aso.

“ E alu lava tupe  ae lae maua lava fa’atau i aso uma. 

“Ia e saosaoa a le mana’omia o le fuala’au i’inei i le maketi i Saleloga ona e mo’i lava ae le to’atele nisi e fa’atauina atu.

 “E mo le silafia o fuala’au ‘aina nei e aumai mai nisi tagata e omai fa’atau mai ia i matou ona matou toe omai lea ua toe fa’atau atu.

“ Ia a aumai le maukeni e $2 ia e toe fa’atau atu e matou i le $3 lona uiga e $1 le tupe fa’asili ma o la’u ia tala e tupe lelei tele le fa’atauina atu o fuāla’au ‘aina nei.

“Ia ua silia ma le luasefulu tausaga o matou fa’atinoina lea tulaga ma a tutupu mai fa’alavelave, o vaega fa’alenu’u ma le ekalesia ia e fai lava.

“Aua e le tau fesiligia lea tulaga , e soalaupule lelei lava le tele o vaega nei, aua a ua e loto lava e fai lau matafale ia o lona uiga e tatau ona galue, aua o le soifuaga a tatou o le tautua lava. 

“Ia a tele lava tupe maua ia ua fa’atinoina ai le tele o vaega, ia o taimi fa’atoā a’e aoga e tele ai lava fa’atau.

“E  i ai lava taimi lelei , ia e i ai fo’i aso ua fa’alelelei .

“ Ia e pei o masina lelei mo fa’atau , ia o le masina lenei, Kirisimasi...e pei o aso fa’apitoa e tele ai fa’atau .

© Samoa Observer 2016

Developed by Samoa Observer in Apia