Galuega Fesoasoani a Tupulaga Talavou

Tusia Deidre Fanene ma Faaliliu e Maiava ,

137 Hits

Tupulaga ta’avou Fesoasoani mai Amerika i le Maota o Finau ma Fia So’onalole i Alamagoto.

Tupulaga ta’avou Fesoasoani mai Amerika i le Maota o Finau ma Fia So’onalole i Alamagoto.

O le maota o se aiga i Alamagoto na avea o se nofoaga fiafia tele i le Aso To’ona’i talu ai.

O  le maota lea sa fausia ma taua’aoina atu aloa’ia e le Vaega o Tupulaga Talavou Fesoasoani (HEFY) a’o molimauina e latou sa galulue-fua ai mo le fausia, o aiga ma uo. E $19,835.00 le tau atoa o lea fale ma e na o le valu aso sa fausia ai.

O le Vaega lea o Tupulaga Talavou, o se fa’alapotopotoga e galulue-fua e leai se taui, e mai le Iunaite Setete o Amerika ma latou te  vala’aulia tupulaga talavou e asiasi atu i atunu’u ‘ese’ese o le laolagi mo galuega fesoasoani. O le vaiaso nei la, o lo’o asiasi mai ai  i Samoa.

Na fa’aalia e le Ta’ita’i o le Vaega lea, o Jacob Earnest, latou te fauina lava se fale i Samoa nei, i taimi uma e o’o mai ai.

“E fa vaega fa’apea e malaga mai i tausaga ta’itasi ma o le fale lona fa lenei ua matou fausia, e toe faia fo’i se isi fale pe a o’o mai fo’i le isi vaega,” o lana fa’aaliga lea. 

“O fausaga masani lava nei a le Ekalesia Mamona ui e leai se so’otaga aloa’ia ma le Ekalesia a Le ‘Au  Pa’ia o Aso e Gata Ai lea e malaga mai lava tupulaga talavou nei ma fa’atino i a latou lava tupe.

“E lua la vaiaso matou te iai i Samoa nei mo le fausia o le fale lea ma feiloa’i fo’i ma aiga ma nu’u, ma suia ai fo’i o matou lagona ma olaga ona o mea lelei ua matou faia.”

E fa’apefea ona filifili aiga e ‘ave iai la latou fesoasoani?  “O lo’o iai le susuga a Samoa Molesi Vaoga, o le matou fa’atonu lea i Samoa nei, ma e galulue fa’atasi ma afi’oaga ma alalafaga i tua fa’apea Uarota ‘ese’ese a le Ekalesia Mamona, e sa’ilia aiga e aupito sili ona mo’omia ni fesoasoani mo le aga’i i luma,” o lana fa’aaliga lea.

Na ta’ua e Vaoga, e iai lava vaega mo’omia e tatau ona fa’amalieina e aiga ta’itasi. “O le mea aupito tau’a lava, e tatau i se aiga ona iai o so latou fanua, le fanua o lo’o nonofo ai le taimi nei,” o lana fa’aaliga lea. “Afai e leai se alagatupe a se aiga ma leai so latou fanua, e le agava’a iai mo le poloketi lea. 

“E taua tele la le iai o se fanua .”

© Samoa Observer 2016

Developed by Samoa Observer in Apia