Aiga ma mātua e fa’amuamua
O se fa’aiuga sili ona faigata I nisi o tatou.
O le fesili pe o le alu e fa’aauau le aoga pe nofo I le fale e tausi mātua ma fesoasoani I le fa’atoaga ma isi matāfaioi I totonu o le aiga.
O TJ Loatuapopo, 23 tausaga mai I Lotoso’a, Saleimoa o lo’o malamalama lelei I lea itu.
Sa ia filifili po’o lana aoga opoo ona matua.
“O lo’u ia iloa e sili atu le manuia o lo’o I matua ma e leai lava sesi manuia e sili atu nai lo lena.
Ina ua oo atu le Fofoga o Samoa o lo’o ia ta aufa’I mai I lana fa’atoaga e fai ai se mea’ai mo nai ona matua.
O laba matāfaioi e fai o le asi lea o le fa’atoaga, tapena le fale ma kuka ae o nisi lona aiga o lo’o nonofo I atunu’u mamao e fesoasoani lea I le aumaia o seleni e fai ai fa’alavelave.
“E ui lava ina fa’afaigofie ona galo I nisi o taimi, ae o le aiga o le itu pito sili lea ona tāua i sesi lava mea o lenei lalolagi.
“O le uiga o lea upu e aofia ai lou tinā, lou tamā, o ou uso, ma o le talitonuga foi o nisi o tagata e pitosili ona e alofa I ai.
“O aiga e lē faigofie, e iai taimi e le taugalemū ai ma o’o ai lava I tiga.”
Ae ui lava I na mea uma o le alofa lava e pitosili ona tāua.
O ia fo’I o se tasi e telē lona talitonuga I fa’amanuiaga e ala mai I mātua.
“E leai lava sei mea e sili atu nai lo le tausiga o o’u mātua.
“E mo’I lava o le tau o le soifuaga ua fai lava si taugata ae o matou ma o’u mātua ou te tete’e ai ona o lea lava matou te maua matou te manana’o ai. O lea e maua le suavai ma le eletise ma le mau mea o lo’o matou mana’omia I lea aso ma lea aso.”
O le talitonuga o lea taule’ale’a I le tupulaga talavou e tatau ona latou o e su’e le mea o lo’o naunau I ai o latou loto.
“O le tele lava o tupulaga o lo’o ou va’ai I ai ua e le aogā I ni feau a le aiga ae ua na o le ulaula, inupia ma fa’asoesa solo.
“O se fa’anoanoaga tele lea I a te au ona o le lē fa’aoga tatau o le taimi.
Sa tu’ua’ia e TJ le matafaioi a matua ona o le lē faia lea o latou tiute o le a’oa’oina le o latou fanau I le ala e tatau ona uia.
“O le si’osi’omaga o lo’o tutupu a’e ai nei taimi o le a fa’aalia lea I le taimi e matutua ai.
“I a te a’u lava ia o o’u matua o la’u matafaioi muamua lea. O le itu lena e eseese ai a’u mai le tele o tupulaga talavou.
“Out e le faitio ona ou te alofa I o’u matua ma out e fa’aaaloalo fo’I I ai ma ou taliaina lava so’o se fa’afitauli e o’o mai.
“Ma o lo’u talitonuga fo’I afai e fiafia o’u matua I a’u galuega o lo’o fai o le a laua fa’amanuia mai I a te au ma o le itu pitosili lena ona taua I lo’u olaga.”