Amata le Iuni a Apia i Ta’amilosaga Ta’ito’afitu
Ripotia e Vatapuia Maiava
Fa’aliliu e Maiava
A’o finau ane le Manu Samoa Ta’ito’afitu i ta’aloga fa’aVa-o-malo i Sini i le Aso To’ona’i ma ananafi, e tele lava fo’i isi ta’aloga fa’apena sa faia i le lotoifale aua le mamalu o le atunu’u e fiafia i le ta’aloga.
E ui fo’i i le vavela o le la i le Aso To’ona’i talu ai, ae sa aloalo malie lava le Iuni a Apia e tau sa’ili ni ‘au mo le ta’amilosaga ta’ito’afitu a Malisi o loma nei.
E sefuluono ‘au mai vaega ‘ese’ese o le atunu’u sa ‘auai i lea fa’amoemoe i le Aso To’ona’i, e finau ai mo le fa’ailoga muamua e $1,000.00 ae maise fo’i le fa’amautuina o ‘au mo isi ta’amilosaga o muamua.
Na fa’ailoa mai i le Samoa Observer e Fuimaono Titimaea Tafua, le sui-peresetene o le Iuni a Apia e fa’apea: “Ua fa’atunu’u lava le amataina o le ta’amilosaga o lenei tausaga e tapena ai ‘au ua vala’aulia mo le Ta’ito’afitu a Malisi.”
“Ua fiafia lava la ua amata aloa’ia lenei ta’amilosaga.”
Na fa’aalia fo’i e ‘Auimatagi Sapani Pomare, le Faia’oga o le Ta’ito’afitu a Apia Maroons, le agaga fiafia ona o ta’amilosaga amata nei e fesoasoani ai i le tele o ‘Au o le a ‘auai.
“O ta’amilosaga amata nei e matua aoga lava ma fesoasoani ai i a matou tapenapenaga aua o le mea moni lava, e aupito maualuluga lava ‘au mai le Iuni a Apia, i le ta’amilosaga lea a Malisi.”
Na manumalo a’ia’i le ‘Au a Lauli’i le Ipu o le Ta’amilosaga, ma tulaga muamua ai, i le fa’ailoga tupe e $1000.00 o le ta’amilosaga.
O Apia Maroons na manumalo i le Ipu Mafolafola ae manumalo Le Liona a Lauli’i fo’i, le Ipu Fa’a’ofu’ofu.
“Ina ua mae’a le ta’amilosaga, sa ‘ou iloa e mo’omia e la’u ‘AU (Apia Maroons) le fa’aleleia o le manava, lea o le a amata tilotilo iai i le Aso Gafua nei,” o le fa’aaliga lea a Auimatagi.