Fa’atāua aiga

By Ilia L Likou 07 December 2017, 12:00AM

Kelisiano Fale ua 51 le matua o le soifua mai le afioaga o Leulumoega Tuai.

I le la fa’atalanoaga ma le Fofoga o Samoa I le aso ananafi sa ta’ua ai e lea tamā le tāua o le matafaioi a le tamā I totonu o aiga.

“E ao I tagata ona latou iloa o le soifuaga I le vaitau lenei ua faigata ona o le siitia pea o le tau o le soifuaga,” o lana saunoaga lea.

“Ou te malamalama lelei fo’i i le faigata o le tausiga o aiga ua i ai nei vaitau.

“Ua fai si faigata ona o le tele lava o mea e manaomia ai lava le tupe.

“Ua fai fanau uma si a’u fanau ma ou te  talitonu pau lava le auala e mafia ai ona tausi aiga o le galue malosi lea.

“Ma o le tamā alofa tusa lava poo a faigata o le olaga, e le mafai ai ona muta lona olaga galuega tusa pe timu pe laina foi.

“O la’u lu’i I la’u fanau ou te fai ai lava, e leai se mea e sili nai lo lo’u alofa ma tausi ma le faamaoni i le latou tinā aemaise ai latou.

“O le tele o mea ua tatou fetaia’i ona o le tatou talitonuga o mea o le olaga nei o mea ia e malie ai tatou ae leiloa e omai lava ma toe mou atu.

“A’o le mafuataga a aiga e faavavau.”

Sa ia fa’aalia fo’i lona fa’aatauaina o lona aiga.

“Ua ou maua nei manuia ona o nai o’u matua, uso ma tuafafine.

“O lea fo’i la ua ou fai fanau e ao ona ou tausi lo’u aiga ma le faamaoini ma le mautinoa e uma atu a’u a’o lo’o tumau pea latou I le fealofani.

“E tatau ona tatou taofiofi mau le mafutaga faaleaiga ma le fiafia.

“O le aiga e fa’avavau ma e fa’avae I le alofa ma le faamaoni o faamanuiaga fo’i lea a le Atua.”

By Ilia L Likou 07 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>