Le faigofie le tau o le soifuaga

Tusia Ilia L Likou ,

117 Hits

Lini Wulf.

Lini Wulf.

 “Ia o le tele lava o aso e $30 le tupe e maua mai i le fa’atauina atu o fua o fa’ato’aga o lo’o matou fa’atauina i luma nei a laititi ia ua maua le $10.” Le tinā i a Lini Wulf o Nu’u-Fou i le fa’atalatalanoaga ma le Fofoga o Samoa.

 “O lenei pisinisi laititi ia ua fesoasoani tele i le aiga i le tele o taimi  o lo’o ua matua’i mana’omia ai se fesoasoani.

 “Ia e pei ona silafia ai o le tele o fua o fa’ato’aga o lo’o fa’atauina atu i luma i’inei ia o lo’o tele ina  tausia ai le aiga aemaise o le tele o mea fai i aso uma.

 “Ia na amata mai lava i le fa’atauina atu o ese, kapisi ma tamato....ae o lo’u iloa ai , e televave le tupe maua i le fa’atauina atu ai o kapisi nei.

 “Ua fai si leva o matou fa’atinoina le  tele o vaega nei , ma e tupe lelei lava , o le mafua’aga fo’i lea o lo’o o matou fa’atinoina ai lava e o’o mai i le taimi lenei.

 “Ia o lo’o o matou fa’atauina atu fo’i le kofe ma le popcorns i luma nei.

 “O lo’o mafai lava ona maua mai nai senesene i le fa’atinoina ai o lenei pisinisi.

“Ia o so’o se  galuega lava e faia ma le filigā ia e manuia, ma o a’u lava ia e sili atu tupe e maua mai le fa’atauina o vaega nei nai lo tagata o lo’o faigaluega, ma o lea lava le mafua’aga ua una’ia ai lava i matou i le fa’atinoina ai o vaega nei.

 “Afai lava e galueaina ma le fa’amaoni le ele’ele ona mafai lea ona maua tupe ma so’o se vaega e mana’omia i le olaga lenei.

 “O lea lava le manuia mo aiga.

Na ia fa’ailoa o nei aso ua faigata lava.

 “Ua va’ai atu lava i le maualuga o le tulaga ua o’o ai tau o mea’ai ma le tele o oloa.

 “E o’o i le to’alua o la’u tama teine ia e va’ai lava le tulaga lenei o le le gafatia o totogi e maua ona o le tele o vaega e fa’atinoina aemaise o le tau o le soifuaga.

“O le a sou finagalo, o i ai se mativa i Samoa?

 “E leai se mativa i Samoa, tele fa’amanuiaga a le Atua ua tatou maua i nei aso, ae e pau lava lea o le tulaga o lo’o tatou mafatia ai o le taugata ole tau o le soifuaga.

 “Ua fa’ataugata tele e le malo tau o mea’ai ma tupe totogi i nisi o auaunaga ae o lo’o taumafai ina ia mafai ona tausi aiga i aso uma.

 “O le fa’afitauli i’inei o le malo, e ao lava ona toe silasila i vaega nei ina ia fa’afaigofie ai lenei vaitau.

Aepeita’i, e ui i nei fa’afuitauli ae na fa’ailoa e Lini le agaga fa’afetai ona o le filemu o lo’o ia aumaia ia ma fesoasoani i ta’ita’i o le malo ma lona fa’atautaia.

© Samoa Observer 2016

Developed by Samoa Observer in Apia