Faaaoga tatau le Taleni

Tusia Seia Soloi ,

147 Hits

Simona Sulusi, 24 tausaga mai le nuu o Solosolo

Simona Sulusi, 24 tausaga mai le nuu o Solosolo (Photo: Sei’a Soloi)

“E le’o na’o fale faigaluega e maua ai ni totogi lelei, e sili atu ai la’u tupe maua i la’u galuega o loo fai nei.

O le masani a lea a le taule’ale’a o Simona Sulusi, 24 tausaga mai le nuu o Solosolo i aso uma o le vaneina lea o mamanu Samoa o loo faaaogaina i le Elei.

‘O la’u galuega lea o loo faia i aso uma o le faia lea ma faatau atu aua se tupe e fesoasoani ai i lo’u aiga aemaise si a’u fanau e toa 2.

‘E eseese lava ituaiga mamanu o loo o’u faia e oo foi i mamanu o loo faia ai seevae lea e tele ina faatau e nisi o faleoloa.

Faimai le talitonuga o Simona ua taugata lava le soifuaga.

‘Taugata a le soifuaga, ae o lo tatou malamalama lava i mea o loo tutupu ma lona taua.

‘Ou te iloa lava e taugata le soifuaga ae o lo’u naunau lava ia sue se tupe mo lo’u aiga, o le mea na o loo o’u faamuamua nei.

‘Ua atoa ai nei ii le tausaga o o’u faia lea taleni, aua o ia mea uma na maua mai I le aoga i taimi a’o o’u aoga i Leififi College i se tasi o a’u faiaoga tusi ata.

‘Na iu la’u aoga o’u le ausia le Iunivesite Aoao o Samoa ma o ii na amata a’e ai se lagona ia te au out e faia lea taleni ua iai ae peitai ua sau le a le musu ma ua o’u le fia faia ai.

‘Uma le tausaga o taumafai pea ma ou iloa ua ou fiafia lava i la’u galuega o loo iai nei.

Tele se tupe maua a Simona mai lana taleni.

‘A lelei a se vaiaso ua maua le $500tala, e iai foi nisi o ulugalii e fai mai a la oka ia te au aua e fiafia I a’u mamanu o le tele a o la’u tupe e maua ai e $1,200tala.

‘A e fia maua se mea lelei e te suea a le mea lelei ma e maua ai a le mea lelei.

‘Ia faaaoga tatau o tatou taleni aua e eseese a tagata ma o latou taleni, ae o tatou taleni ia o loo tausia ai o tatou aiga ma a tatou fanau.

E ave le faamuamua a Simona i lana fanau i ana tuoe maua mai i lana galuega.

‘E muamua a la’u fanau i mea o loo moomia e i latou aemaise totonu o lo matou fale.

‘E faaagaga lesi vaega tupe mo mea fai a le lotu ma le nuu, o le mea e totoe ai e faatau ai nisi pepa aua nisi mamanu fou mo lesi aso.

‘O le soifuaga lava ia e taugata, ae ia maua pea le lototele tatou te faia ai soo se galuega aua le tausiga o a tatou aiga ma fanau, ae le aoga le na’o le nonofo ma faitio aua e le maua ai se mea aoga.

© Samoa Observer 2016

Developed by Samoa Observer in Apia