Saunoaga a le Afioga i le Sui o le Fono a Sui Tofia - Tuiloma Pule Lameko

833 Hits

Afioga i le Sui o le Fono a Sui Tofia , Tuiloma Pule Lameko ma nisi o sui  o lona aiga

Afioga i le Sui o le Fono a Sui Tofia , Tuiloma Pule Lameko ma nisi o sui o lona aiga

Ae ou  te lei asaina le gasū o le taeao pe utufia le vai na momo’o i ai le Tuiātua i Mulinuū ma Sepolataemo, e muamua na faapoipoi lili’a fa’a-alofisa o Tupu nai le Malae o le Vavau, i ou paia ma sa, auā o lele ua papa’e ti’a i ulupaga, ua atoa foi ti’a o le tautiaga.

Tulouna le Afioga i le Ao Mamalu o le Malo o Samoa, lau Afioga Tuiatua Tupua Tamasese Efi ma lau Masiofo, Filifilia Tamasese. 

Tulouna le Afioga i le Sui o le Fono Sui Tofia, lau Afioga Tuimalealiifano Sualauvi Vaaleto’a II ma lau Masiofo, Faamausili Leinafo. 

Tulouna lau Afioga i le Faamasino Sili, lau Afioga Patū Tiava’asu’e Falefatu Sapolu ma lou Faletua. 

Tulouna lau Afioga i le Palemia, lau Afioga Tuilaepa Sailele Malielegaoi ma lou Faletua aemaise le mamalu i le Kapeneta. 

Faatulou atu foi i le tapuaiga a Taitai o Ekalesia o Fata Faitaulaga e fia i Samoa. 

E avea lenei avanoa e momoli atu ai le faafetai tele i lau Afioga i le Palemia ona o le filifilia o a’u i le tofiga maualuga e avea ma se tasi o Sui o le Fono a Sui Tofia ma le tofiaina o a’u e avea ma Minisita o lau kapeneta I le 5 tausaga ua tuanai. 

E avea lenei avanoa, e momoli atu ai le faafetai tele i lo’u itumalo o Falealili, i le susu o le Susuga i le Toeaina Faatonu ma le faletua, Susu Susuga i Fa’afeagaiga taulagi uma ma o latou faletua i soo se Ekalesia  i totonu o si ou itumalo o Falealili, i le paia iā Alalagafa ma le lua nofo Tulafale ma Tauaga-eseese ia Falealili, i le amata atu i ‘ili’ili ma Saleilua seia paia Salani ma Alofisula, i la outou faaeaea ma le tou filifilia o a’u e avea ma Sui Faipule i le Palemene o Samoa mo se taimi umi, 15 tausaga (2001-2016)

O le a manatua pea i le loto ma le mafaufau nei fa’aaloaloga faatupu ma le faatamali’i. O lea foi ua tofia a’u i nisi o tofiga maualuga, ma o lea manatua pea e augatupulaga I le lumanai. Faafetai faafetai tele lava le faaaloalo. 

E le mafai ona galo Afia isi ona vao, faafetai foi I le Itumalo o Safata, Susu le Susuga i le Toeaina ma lona faletua, i nofo Faafeagaiga ma o latou faletua i Ekalesia eseese,i  le paia ia Sā Tunumafono ma Tapa’au na tausi e le Alataua ma le nofo ā Tula ia Safata, ona o la outou faaeaea na tofia ai au ma o outou Sui Faipule I totonu o le Palemene mo le 16 tausaga (1979- 1995). 

Afai e iai ni sese o le auauna, ia malū ave i fale i ō outou finagalo se aga ua lē tau tamali’i, poo se upu ua sala, ae lafo i nu’u lē ainā, ae aumai manū mo Samoa nei ma a taeao. 

O le tatalo i le Atua pulepule tetele, ia alofa ma faamanuia outou i lā outou filifiliga tonu ma le sa’o, auā ni o tatou Sui mo le isi paeaiga o loo fotuai mai I le Palemene o Samoa. 

 

Soifua ma ia manuia, 

Hon, Tuiloma Pule Alaimoana Unasa Lameko

Minisita o Tupe Maua (2011- 2016)

Faipule Itumalo Falealili ( 2001- 2016)

© Samoa Observer 2016

Developed by Samoa Observer in Apia