Ua uma le taimi mo i latou o loo nofoia Sogi

Tusia Ilia L. Likou ma Faaliliu e Seagaitumua Tupuola ,

379 Hits

Se tasi o nofoaga a le matagaluega e faatutū ai taavale lea ua i lea vaega-eleele

Se tasi o nofoaga a le matagaluega e faatutū ai taavale lea ua i lea vaega-eleele

O le asō o le aso mulimuli lea o se faasilasilaga e 30 aso na tuuina atu i tagata o loo nofoia Sogi ina ia tula’iese.  

O lenei tulaga na faamaonia e se Ofisa Sinia o le Faalapotopotoga o Eleele a Samoa (S.L.C.) ananafi e ui lava ina teena e ia ona faailoa mai poo le a le isi laasaga o le a latou faia. “O le a matou tausisi pea i le tulafono e pei ona faaalia i totonu o la matou tusi (Tusi e Faatula’iese ai) tagata o loo nonofo i Sogi,” “Ona pau lena o faamatalaga e mafai ona matou faailoa atu i le taimi nei se’ia toe tuuina atu se isi faasilasilaga.” Sa le mafai ona maua mai se faamatalaga mai le Pule Sili o le Faalapotopotoga o Eleele a Samoa, o Afoa Arasi Tiotio.

I Sogi ananafi, na musu se alii matua lea na musu e faailoa mai lona suafa-fai mai latou te le o ese.

 “Poo le a lava le faaiuga a le malo e tuuina mai, matou te le o ese lava,” o lana faaaliga lea. “O iinei e faasino i ai matou ma o iinei lava o le a matou nonofo ai.”

Fai mai lea alii matua latou te le’i maua lava se upu mai le S.L.C.talu ona faaoo atu le tusi e faatula’i ai i latou –ia i latou  “Ua matou manino lelei i taunuuga ae o le a matou nonofo lava iinei se’ia o’o i le taimi latou te o mai ai e aveese i matou.

“E leai nisi o’u manatu e toe faaalia ae o le a matou faatali ma nonofo pea ma le fifilemu.” E tusa ai ma le tusi e faatula’iese ai na maua e le Samoa Observer, sa lapata’ia tagata o loo nonofo i Sogi-o le le usita’ia o faatonuga –o lona uiga-o le a faaaoga loa le tulafono.

O le masina talu ai-na tuuina atu ai e se tina matua o Tala Lei’ataua se talosaga ma le faanoanoa i le Palemia o Tuilaepa Sailele Malielegaoi. “Ua matou sauni e faafeagai ma taunuuga e o’o i ai-ae peitai-matou te manana’o ia tanu lava matou i lenei eleele, Tuilaepa, o le eleele lenei o loo i ai lo matou tuugamau,” o le faaaliga lea a lea tamaitai. 

“Faamolemole-tuu mai matou –matou te nonofo i lenei eleele. O iinei e faasino i ai matou. O matou matua sa matua galule ma le tiga e tanu faa-laugatasi lenei taufusi i le faagasologa o taimi o pulega faa-kolone a Siamani iinei.

Matou te fia nonofo ai pea.”. Afai e tumau pea le finagalo le malo e faatula’iese i matou, fai mai Tala:”Ou te talosagaina le malo ina ia ‘eli le lua ma togi matou uma i totonu. E sili ia te a’u ona ‘ou oti ma tanu a’u i le eleele na tuuina mai e o matou tua’ā ia i matou.”

O aiga o lea tina matua o loo filo i le sili atu i le tolusefulu aiga o loo i Sogi, mo ni tausaga se tele ae o lea ua fai mai matou te se’e i Falelauniu. O le faaiuga a le malo ina ia se’e ese tagata o loo nonofo i Sogi na faalauiloa mai muamua i le 2011.

Ona ofo mai lea e le malo i lena taimi i aiga se fanua e kuata eka i Falelauniu latou te lisiina ina ia mafai ai ona latou pulea i se tau e sili atu teisi i le $30,000 ma le $3,000 o le tinoitupe e se’e atu ai i lea nofoaga.  E tele aiga i Sogi na latou talia lea ofo. Ae o le toatele o isi e mumusu.

© Samoa Observer 2016

Developed by Samoa Observer in Apia