Sailiga Manuia

Tusia Ulimasao Fata ,

53 Hits

MANAOMIA SE GALUEGA: Iafeta Pauli.

MANAOMIA SE GALUEGA: Iafeta Pauli.

Naunautaiga o le taule’ale’a ia Iafeta Pauli, o le sailia lea o sana galuega.

O Iafeta Pauli o se taule’ale’a m19 tausaga le matua mai le afioaga o Vaipu’a i Salafai.

Na maua se avanoa e feiloai atu ai le Fofoga o Samoa i lea ali’i a’o ia aga’i atu e tufatufa atu ana tusi talosaga aua le sailia o sana galuega i le taeao ananafi.

“Na ou malaga mai le vaiaso talu ai aua le sailia lea o sa’u galuega iinei e tausi ai le matou aiga aemaise nai o’u matua o lo’o fa’amuli mai i Savai’i.”

“Faigata lava ona maua se avanoa faigaluega i Savai’i e pei la o le mafua’aga lena ua ou malaga mamao mai ai lava iinei.”

Na ia taua foi i le Fofoga o Samoa ua atoa nei le vaiaso o lafo ana tusi talosaga i kamupani o lo’o i Upolu nei aua sana galuega.

“O lea fa’atoa ou foi mai le supamaketi a le Farmer Joe na ou alu atu ai e momoli atu ai la’u tusi talosaga mo se galuega.”

Taua e Iefata Pauli le faigata o le olaga i le motu tele lea ua mafua ai ona ia fia Malaga mai iinei e saili manuia ai.

“Fai si umi tele na ou saili galuega i Savai’i ae le’i manuia lava se tali.”

“O le matou aiga foi o lo’o fa’amoemoe lava i le ma’umaga aemaise le gataifale aua le tausiga o le matou aiga i meaai aemaise sina tupe maua mai.”

“E leai seisi o le matou fale i Savai’i e faigaluega na’o le galueina lava o le ma’umaga aemaise le toaaga e fa’agota le gataifale.”

Na ia toe taua foi o ia e i ai ana poto masani e aoga aua se avanoa faigaluega mo ia.

“E lelei la’u fa’akamuta aemaise o a’u o se tagata e galue malosi tele.”

“Ua misia lava foi le aiga o lo’o fa’amuli mai ae talitonu le loto o le a fa’apena ona lelei mea uma pe a maua se galuega e tausi atu ai nai o’u matua aemaise le matou aiga.”

© Samoa Observer 2016

Developed by Samoa Observer in Apia