Manatu tasi...E le manuia le valea

Tusia Fa’aliliu e Maiava ,

149 Hits

Toe mafaufau tasi lava…I le vaitau o le Taua Lona II a le Lalolagi, na alu ai se ali’i sa nofo i luga o mauga, e momoli se tusi i le Vaega’au a Amerika, i le taulaga. O le ali’i lea, e le’i o’o fa’atasi i se a’oga i lona olaga atoa, o lea na fai ai i lona to’alua, se’i ona tusia le tusi, talu ai, e matua le-ilafia se tusitusi, e le-iloa fo’i faitautusi. O le tusi la e fa’apea: “Mo le ‘Ami a Amerika: Fai mai lo’u to’alua, ia ‘ou tusia se fautuaga, e ta’u atu ai, o ia o lo’o tausia ma va’aia lona aiga.

E le iloa faitau se tusi. Fa’amolemole, avatu o ia. E leai sona aoga mo a’u. E leai sana mea lelei ua fai, na o le inu-pia ma fa’atupu fa’alavelave, mai lava i le valu tausaga talu  ona ma fa’aipoipo. O a’u lea e  fafagā lana fanau e to’afitu. Atonu e lelei pe a outou avatu e amo sana fana. E lelei tele lana tuli pua’a-‘aivao ona e fiafia tele e ‘ai-pua’a. Fa’amolemole, o-mai e avatu.

‘Ou te mo’omia mea’ai, o moega ma mea uma mo tamaiti. Fa’amolemole, ‘aua le ta’ua iai, ua ‘ou tau atu lenei mea, ae omai e avatu.” Lena tonu a; ‘ou te manatu e le afaina le fa’apea atu, e matua le-manuia le fa’avalevale o lea tamaloa.! O le mea na te le-iloa, o lona fa’avasivasi, ua afaina ai lava ia!     

Sa fa’amatala le tala i se tagata-gaoi sa i aso anamuā, fai mai sa ia gaoia se ‘ofu (peleue) e matua taugata lava. O le peleue lea, sa su’i ma gaosi mai ‘ie o le ituaiga aupito lelei ma ‘anagata, e aofia ai ma fa’amau e sausau-‘auro ma siliva mao’i. Na fesili ana uo ina ua fo’i atu, ua mae’a ona alu fa’atau le peleue, pe fia se tupe na ia maua ai, ae tali, “E selau fasi siliva.” Na tete’i ana uo ma le-fiafia ma fa’apea atu: “Na o le selau fasi siliva mo le peleue aupito taugata e seāseā ona maua!”

Ua te’i le tama-gaoi lea ma fesili atu: “Aisea? E iai se isi numera e sili atu i le 100?”  Sole! se’i silasila i le fa’avasivasi! Afai lava e te lē-silafia, e tele ma sili atu i luga o so’o se mea, lona uiga, e te le-maua lava lena tele po’o mea i luga atu. Ioe, e sili atu ma anoanoa’i mea o le ola nei, o lo’o fa’atalitali mo tatou e soifua fiafia ma fa’amanuiaina ai. Ae afai lava e na o le falaoa ma le ipu-vai ua e masani ai, o lona uiga, e te le-silafia lava, e mafai fo’i ona e tausami i se fasi-povi falai, se fuamoa po’o se falai-sosisi! 

Manatua, e to’atasi lava Le e mafai ona fa’aali atu ia te ‘Oe mea uma e fiafia ai i le ola nei. O le mea moni lava, o Ia lea na faia le ola. Na afio mai Iesu Keriso e fa’aali manino ia tatou, le avea ma tagata moni e ola atoatoa, ina ia mafai ona tatou soifua i le fiafia atoatoa. Na te silafia fo’i fa’afitauli e mafai ona afaina ai o tatou mafaufau ma a’afia ai o tatou tagata. Na te puipuia ‘Oe ma lou aiga mai tiga uma pe a soifua i Ona ala.

Tatalo nei ia Iesu e fa’amagalo ‘oe ona o le ola pea i ou ala tuai, ma tatalo e pulea nei e Ia lou ola ma fa’aali atu ala tonu e tatau ona e ola ai. Pau lea o le ‘auala e te le misia ai mea lelei uma na Ia fuafua mo ‘Oe. Toe mafaufau tasi lava… 

© Samoa Observer 2016

Developed by Samoa Observer in Apia