Saili galuega le tina mo lana fanau

Tusia Seia Soloi ,

119 Hits

Tina galue malosi mo lana fanau: Sevia Fesola’i mai le afioaga o Faleasiu.

Tina galue malosi mo lana fanau: Sevia Fesola’i mai le afioaga o Faleasiu.

O le tina ia Sevia Fesola’i e toasefulu ona alo ma e ma ii le afioaga o Faleasiu. I le nonofo ai o lenei tina ma lana fanau na ia faailoa ai o se olaga e faigata aemaise pe a fua iai i lona aiga i le toatele o le fanau o lo’o tausi.

I lana tala mai i le Fofoga o Samoa e u ii le tau faasoasoa o le tamaoaiga i lona aiga ae o lo’o taumafai lava i le mafai e gata ai aua le fanau ina ia manuia.

“Mai i lea toasefulu e toaono o lo’o ao’oga i le taimi nei” o lana tala mai lea.

“O lo matou faamoemoega e na’o la’u ulumatua lea o lo’o maua mai ai sina tupe aua lo matou ola ai i aso uma.

“O le matou faatoaga lea o lo’o iai nei e le faatauina aua na’o le pau lea o le tulaga o lo’o maua mai ai a matou meaai i aso uma ma la’u fanau.

O le galuega masani lava ia a le tina ia Sevia o le fatu aiga tausi mo lana fanau ma na ia faailoa foi o lona ia lava tofi lea, o le fafaga ma tausi lelei lana fanau.

“O la’u galuega lava lea i aso uma o le faia o feau masanima le faasauni o la’u fanau i le aoga uma lea ona tapena lea o le meaai mo le po aemaise o le aoauli a uma ona faamama lea o le fanua.

“O le naunau o le tina ia galue malosi ina ia mafai ai ona fesoasoani i lana tama matua ma ii lana galuega o le moavao ae o lona toalua e feagai lava ma le faatoaga i aso uma.

“O le tala moni lava ia o le matou tupe maua o lo’o maua o lo’o lava ia mo matou ae ua lau silafia uma lenei olaga ma lona aluga tele faalavelave ma mea e faaaoga ai le itu tau seleni. O le olaga lenei ua talanoa lava i mea o seleni” o lana tala mai lea.

O lana mau, e le mafai e o tatou tagata ona ‘aloese mai ai aua ua masani lava i tatou i le faimea i totonu o aiga, nuu ma le ekalesia.

“O mea fai a le nuu e faalua ona tutupu i le masina ae o mea fai ia a le lotu e foai lava i masina uma ae le gata i lea o mea fai i totonu o le aiga ma mea masani aua le ola ai o aiga i aso uma”

“O tupe uma ia mea uma ma e lelava le faasoa i le matou lava ia aiga.

O le popolega o le tina ia Sevia o le lumanai o lana fanau.

“O lo’u ia lava iloa ai e gafatia lava e lo’u aiga lo matou ola a ii aso uma ae o lo’u popolega o le lumanai o la’u fanau”“Ua lata mai le taimi e fai-aiga ai la’u tama matua, o le fesili mo matou, o ai o lea feagai ma mea fai i totonu o le aiga? E faavaivaia ai foi a’u le tin ape a mafaufau iai.

O le manaoga o le tina ina ia saili sana galuega ae e iai lava lona popolega.

“Out e fia fesoasoani ae e leai seisi e nofo e vaaia la’u fanau aua e laiti aemaise ai le faigata ua iai le taimi nei.

“Ae o la’u faamuamua e mo la’u fanau lava ia.

A faamanuiaina au i se galuega e maua mai o le a tuu atoa iai le malosi aua se lumanai o le ma fanau ina ia ola lelei ma maua so latou lumanai manuia.

‘Ou te iloa o miti ia a soo se matua ina ia iu lelei a latou fanau ma maua so latou lumanai manuia ae aua nei pei o le mea lea ua oo ai matou aua o le manatu maualuga lava ia o le faamuamua o fanau. 

I le manatu o le tina e talosagaina ai le Malo mo sina fesoasoani aua nai aiga o lo’o fia maua se fesoasoani.

‘Ou te le faapea atu e aumai uma mea ae leai, o sina faamama avega aua aiga e pei o matou aua ua tatou iloa uma lava le taugata o le soifuaga ua iai nei.

“Tusa lava pe laitiiti pe tele foi ae a tau ane ai mo sina fesoasoani mo aiga ua lava lea ma totoe aemaise lava se lumanai manuia o fanau mo aiga ma nuu ma le ekalesia aemaise le atunuu.

© Samoa Observer 2016

Developed by Samoa Observer in Apia