Ua faaalia ni Ofisa Sili Fou o Pulega

446 Hits

LE OFISA SILI FOU O LE OFISA O FAAMASINOGA- Papali’i John Taimalelagi.

LE OFISA SILI FOU O LE OFISA O FAAMASINOGA- Papali’i John Taimalelagi.

Pai Mulitalo Ale

Faaliliu e Seagaitumua Tupuola

 

O Ofisa Sili o Pulega-aupito i fou- ua mafai nei ona faailoa atu..E ui lava ia ina e le’i faia e le Kapeneta se faaaliga aloa’ia faalaua’itele, ae mafai e le Samoa Observer ona faailoa atu ia te otou i le asŏ e faapea o le Matagaluega o Faamasinoga ma Pulega Tau Faamasinoga ma le Matagaluega o Aoga, Taaloga ma Aganuu ua tofia i ai ni Ofisa Sili fou o Pulega. 

Talu ai ona ua uma ona tofia Karoline Afamasaga-Fuata’i e avea ma taiulu o le Matagaluega o A’oga, Taaloga ma Aganuu, o le sa avea muamua ma Ofisa Sili Lagolago o Pulega o Papalii John Taimalelagi-ua uma ona tauaao atu i ai le galuega tu-maualuga i le Matagaluega o Faamasinoga ma Pulega Tau Faamasinoga. 

O Mrs Afamasaga –Fuata’i o le a na tauaveina le galuega ma ia Matafeo Falanaipupu Aiafi-ae o Papalii o le a suitulaga i se tasi o Ofisa Sili o Pulega ua loa ona tautua i le malo-o Masinalupe Tusipa Masinalupe

Ina ua fesootai atu i ai mo se manatu faaalia ananafi, na teena e le Taitaifono o le Komisi o Galuega a le Malo, o Tu’u’u Dr. Ieti Taule’alo-le talanoaina o ia tofiga. 

 “Ua uma ona fai le faaiuga a le Kapeneta ae o loo matou faatali pea mo le faasilasilaga aloa’ia mai ia i latou,” o lana faaaliga lea. Fai mai Tu’u’u o ia tofiga fou o loo filo i le tele o matagaluega a le malo ia amata le tausaga i Ofisa Sili fou o Pulega.

Sa le mafai ona maua se fesootaiga ma Mrs Afamasaga-Fuata’i poo Papalii mo se manatu faaalia ananafi.

Ae peitai- ua leva ona faaalia e Matafeo ana fuafua e tauva mo se tasi o Nofoa o le Taulaga i le Faiga-Palota Lautele ia Mati.Na ia umi lea tulaga mo ni vaitaimi se lua. O Masinalupe i se tasi itu sa avea ma se tasi o Ofisa Sili o Pulega ua leva ona tautua i le malo.

O Mrs Afamasaga-Fuata’i ma Papalii o le a auai faatasi ma isi Ofisa Sili fou o Pulega e to’afa-ia na amata faigaluega ia latou galuega ananafi. 

O le aga’i atu i le faaiuga o le tausaga talu ai, na faamaonia ai e le Kapeneta le tofia o ni Ofisa Sili fou o Pulega se to’afa mo le Matagaluega a le Palemia ma le Kapeneta (M.P.M.C.);  Matagaluega mo Tupe Maua (M.O.R.); Matagaluega o Tupe (M.O.T.) ma le Matagaluega o Galuega, Fela’uaiga ma Galuega Tetele (M.W.T.I).

O Ofisa Sili fou o Pulega e mo:

Matagaluega a le Palemia ma le Kapeneta: o Agafili Tomaimanō Shem Leo;

 

• Matagaluega o Tupe Maua: Avalisa Viali Fautuaalii;

• Matagaluega o Mataupu Tau le Va i Fafo ma Fefaatauaiga: o Peseta Noumea Simi;

• Matagaluega o Galuega Fela’uaiga ma Galuega Tetele: Su’a Poumulinuku Onesemo.

O latou tofiga na amata aloa’ia ananafi. Ua i ai foi le faamoemoe o le a fai se faaiuga a le Kapeneta i se taimi vave e uiga i le Loia Sili a le Malo.

© Samoa Observer 2016

Developed by Samoa Observer in Apia