Mai le $150 i le vaiaso i le $200 i le aso

Tusia Vatapuia Maiava ma Deidre Fanene ,

161 Hits

Alaimanono Vaoga.

Alaimanono Vaoga.

O le tamā i ā Alaimanono Vaoga, 32 tausaga mai le afioaga o Faleula sa faatalatalanoaina e le Fofoga o Samoa i le aso ananafi e tusa ai ma lana maketi o lo’o faia lea i luma o le auala.

“O a’u sa ou faigaluega muamua ae ina ua leai sesi e atia’ea le aiga o le ala lea na ou nofo ai.

“O le maketi lea ua e va’ai mai ai o se filifiliga pito sili lea ona lelei ona o lea le itu.

“I taimi a’o o’u faigaluega e sau le totogi i le fa’aiuga o le vaiaso e na o le $150 a’o le taimi lenei out e u’ua le $500 i le $600 i le vaiaso.

“O la’u tupe e maua mai i la’u maketi e maua lava le $100 tala i le aso pe ova atu fo’i pe afai e lelei lava le aso.”

Sa taua fo’i e Alaimanono o le vaitau lenei o le to’atele o tagata faigaluega e le taitai lava le totogi auā le tausiga o le aiga.

“E fai o le pasese atu i le fale faigaluega, a’o mea fai a le lotu ma le nu’u e uma ifo ia mea uma ua leai ma se tupe o totoe i le taga.

“Ae ina ua fai lenei maketi e uma a’e ia mea uma o lo’o i ai pea le tupe o totoe e pei o le eseesega lena o lenei vaitau.

“E moni fo’i i le taugata o le soifuaga ae pei ua masani ai lava tatou.

“O le tinoū lava o le tagata ia e atina’e lona aiga ina ia manuia.

“Auā e leai lava sesi e fa’amoemoe ai o ita lava ia.

“Ua faigata aso nei a le galue lava le tagata ia e leai fo’i se mea lelei a le aiga o le a maua ma o le a leai fo’i se lumanai lelei mo fanau.

“O le vaitau fo’i lenei ua tupe lava mea uma a le tinoūla le tagata o le a leai fo’i se lumanai lelei o le a maua ai.”

© Samoa Observer 2016

Developed by Samoa Observer in Apia