Maualalo totogi i Samoa
‘Pe a fa’atusa atu i Ausetalia’
O le finagalo lea o Siaosi Iogi o Leulumoega ina ua maua le fa’atalatalanoaga a le Fofoga o Samoa i le aso ananafi.
Na ia fa’ailoa o lo’o i le atunu’u mo sina taimi aua le asia o lona aiga ona toe fo’i lea i Ausetalia.
O lona fa’anaunauta’iga lava lea o le mafai ona fo’i mai aiga e fesoasoani ai ona toe fo’i lea.
“Ia e pei o lea lava le tulaga o lo’o i ai nei si o matou nei aiga, aemaise o lo’u nei tagata , o le maua lava o le taimi e sau e asi mai ai aiga.
“Ia ma omai i uta e asi mai ai ma’umaga ma tulaga uma na, aua a toe fo’i atu fo’i atunu’u o lo’o aumau ai o le a faigofie uma mea uma.
Na ia taua le tulaga lelei o lo’o i ai pea le gasologa o le olaga i Samoa nei.
“Ia po o le a lava le umi e alu ai atunu’u mamao, ia e fo’i mai lava e leai lava se mea e tasi e mafai ona ave’ese le mafaufau i le atunu’u pele.
“Aua o le tagata lava ia e alofa le aiga, ia e le sau nofonofo ae va’ai sina taimi e alu e fai feau masani ia ma titilo po o le a se mea e mana’omia ai le aiga se fesoasoani.
“E pei o la’u ia lea va’ai ai le taimi lenei, aemaise o le olaga o lo’o ua tatou ola ai nei si o tatou atunu’u o Samoa.
“E pei e mamulu lava mea uma i le fa’amolemole, e ola fetausia’i fo’i aiga, ia o la atunu’u ia e ola lava le tagata mo ia lava ia.
Na ia fa’ailoa o Ausetalia o se atunu’u e lelei totogi.
“O le uiga o la’u tala o le a lau galuega e sau lava lou totogi ia e te fiafia i ai, e tele lava le ese’esega o Ausetalia ma Samoa i itu tau totogi.
“E pei o lea lava lo’u ia manatu i ai le taimi lenei, o se itu lelei tele lea mo nai o tatou tagata.
“O le uiga o la’u tala, ia e o lea lava, e pei o le su’eina lava o manuia o aiga e ala ai ona feoa’i.
Na ia fa’ailoa o le taimi lenei o se itu lelei le va’ava’ai ai pea mo avanoa lelei e mafai ona fesoasoani mai ai aiga i Samoa nei i le lumana’i.