Faamanatuina le 20 tausaga Ekalesia Worship centre & Fonotele 2017

332 Hits

Susuga i le Aposetolo Vilimau Mafoe, Taitai Aoao o le Ekalesia Worship Centre.

Susuga i le Aposetolo Vilimau Mafoe, Taitai Aoao o le Ekalesia Worship Centre.

Tusia  :  Leapai Sosopo Leapai


O le Aso Sa, aso 2 o Iulai i le Saunigalotu afiafi a le Ekalesia Worship Centre World Wide i Tuanaimato, o le a tatala aloaia ai le Fonotele a lea Ekalesia, le Ogatotonu o Tapuaiga.

O le a auai le Sui o le Malo mo lana Saunoaga autu, e aloaia ai le Faamanatuina o le atoaga o le 20 Tausaga o le Ekalesia Worship Centre World Wide i Samoa ma le lalolagi.

O le a faapea foi ona auai mai sui o le Ekalesia i aulotu i atunuu mamao, e i ai Initia, Amerika, Ausetalia, Niu Sila ma Amerika Samoa, faapea Ekalesia i Savaii ma Upolu. 

Sa faaalia e le susuga i le Aposetolo Vilimau Mafoe, Taitai Aoao o le Ekalesia Worship Centre i le lalolagi, i lana lauga i le saunigalotu afiafi i le Aso Sa, aso 25 o Iuni, e i ai le tulaga ese o le Worship Centre ma nisi o Ekalesia e tele i Samoa. Aua e le o le lelei o le Taitai, Faifeau ma Toeaiina ma nisi tulaga maualuluga o le Ekalesia, poo se poto ma se atamai o se isi. E ese le Worship Centre i le faiga o ana viiga i le Atua, e pei ona faitio nisi, faapea o le soona pisapisao ma leotetele, pe la e faipe le Atua. E ese le faiga o ana Sefulua’i ma ana Taulaga, e le faailoa, ae na o le Atua na te silafia. 

Tulaga ese i le faatinoga o le Ekalesia, ona e faia i luga o le Visiona ma le Misiona mai le Atua. O le faatutuina o lotu i fafo, o lana Galuega FaaMisionare, o lana Faletatalo, TV ma le Leitio (Uaga o Faamanuiaga ). Sa faapea foi ona faaigoa le Ekalesia i le Igoa na aumai e le Atua, aemaise o le taimi e amata ai le lotu ( 7 tausaga faatoa amata ). 

Saunoa le Taitai, o le Atua le Faapogai o le faia o le Ekalesia. E lua tusi na faaautu i ai le Lauga a le Aposetolo i le Aso Sa 25 o Iuni..1 Peteru 2 ; 4 – 10, ma le Mataio 16 : 13 – 19.

O le Atua o loo i tua o le Ekalesia Worship Centre. E Faavae i ai ma faatino ai uma meafai a le Ekalesia. Ua fesili Iesu i ona soo, poo le a se upu a tagata ia te Ia, poo ai Ia. Tali lea o Peteru, “O le upu a tagata, o oe o Ioane le Papatiso, o isi o Elia, o isi fai mai o oe o Ieremia.

 Ona toe fai atu lea o Iesu, “A o outou (Soo) O le a se tou tala, o ai a’u?” Tali Peteru, O oe o le Keriso, o le Alo o le Atua Soifua.

O le tausaga e 1990 na faailoa ai e le Atua ia Aposetolo Viliamu Mafoe le Faaaliga mo le faavaeina o le Ekalesia, ma e fitu tausaga o faatali ona faatoa amata ai lea, i le aso 26 o Iulai 1997. O le Faaaliga mai le Atua i le Aposetolo Viliamu Mafoe, “O le lotu lena o le a ou faia.” E fausia ma faavae i luga o le Upumoni, o Iesu lea. 

Truth ma le Reality..E pei ona ia Fetalai, “O a’u nei o le Ala, Upumoni ma le Ola”. E fausia le Ekalesia i luga o le Tusi Paia, Iesu ma le Agaga Paia. 

REALITY..Ua fia lagonaina e le tagata le Atua, mai le suiga o latou olaga mai i Ekalesia sa lolotu ai muamua. Ua faapea foi ona pa’i le Atua i nei tagata-lotu, e ala i le Faauuga a le Agaga Paia. 

Mataio 16 :17.. Ona tali atu lea o Iesu ua faapea atu ia te ia. “Amuia oe Simona Paiona,   aua e le o se tagata na ia faaali atu ai ia te oe, a o lo’u Tama oi le Lagi. 

O le Faaaliga mai le Atua na faia ai le Ekalesia. Upu a le Atua i le Aposetolo Viliamu Mafoe, “Aua e te popole, o le a ou faailoa atu ia te oe mea uma e faia ai le Ekalesia. Fuaiupu e 18..Ou te fai atu ia te oe. O Peteru oe, ou te atia’e la’u Ekalesia i luga o lenei papa, e le mafai foi e faitotoa o Seoli ona manumalo ai. 

O ai le Papa? O Iesu. E fausia le Ekalesia i luga o le Papa o Iesu Keriso. O le Papa sa mulimuli ia Isaraelu i le vao. O le Papa na puna mai ai le Vaiola ma le Manuia. O Iesu lava o le Papa e atiina’e ai le Ekalesia. 

O le Papa o Keriso, e Faavae ai le Ekalesia, fai mai e le mafai e faitoto’a o seoli ona manumalo ai..Mataio 16 : 18. 

Ou te avatu foi ia te oe Ki o le malo o le Lagi. O Ki o le malo o le lagi, o le Faatuatua. O Ki e Faasaoloto ma faamanuia ai i le tagata. Ua faalaeiau le Aposetolo Viliamu Mafoe i le Ekalesia, ina ia faamalolosi ma finafinau i le tatalo. 

Sa ia faaalia, sa tasi le Vasega o Toeaiina ma faifeau, e fausia se fale mo le Faifeau ma lona faletua, a o latou nonofo mautotogi i Moamoa. Sa ia faamalilie i faifeau ma toeaiina, ma lana Upu, e le i finagalo le Atua e fau se fale o le faifeau.

Peitai, na auina mai e le Atua se tasi o Samaria Agalelei, ma ia ofo mai na te fausia se Faletatalo mo le Ekalesia Worship Centre i Samoa. Lea e i ai le faletatalo o Meroo i Papauta. O lea na talia lelei ai e Aposetolo Viliamu Mafoe, le faasinoga mai le Atua. Na ia faaalia, o le fale tonu lea na fai mai ai le Atua, e ao ona muamua fausia, faapea ma le fausia o isi fale, o tagata o le Ekalesia ina ia latou iloa ma malamalama i le Afioga Paia a le Atua.

Faaalia e le taitai o Viliamu Mafoe, o le faletatalo o Meroo i Papauta, ua fanau mai ai le Tele o atiinae FaaleAgaga ma meataua mo le faalauteleina o le Galuega a le Atua, e ala i le Worship Centre.

( 1 Peteru 2 :4 – 10...ua outou omai ia te ia, o le maaola o ia na lafoa’iina e tagata, a ua filifilia e le Atua, ua taua lava. O le Ekalesia ua avea ma Maaola. O tagata o le Ekalesia ia avea ma Maaola. O oe ma a’u o le maaola. 

E le o oe o se Maape. A ia ola le amio, ola le savali, ola le tautala ma ola le agaga. Ia ola le tagata atoa.

O le a alo atu le Ekalesia i lana Fonotele i lenei tausaga 2017. O loo tatou i ai foi i le Autu o loo taula’i i ai fuafuaga uma ma Polokalame a le Ekalesia, O le Mamalu o le Atua.

Faaalia e le Taitai, ia Talimalo ma le fiafia i le Mamalu lea o le Atua. O i tatou o le Maaola a le Atua, e le se maa na tuulafoa’iina. O mea uma o le a faaalu mo le taliina o le Fonotaga, o le a saunia e le Atua, ma faamanuia ai i aiga uma o lana Ekalesia.

E moni lava, ana leai le Atua, e le mafai ona faia se lotu faapea. 

O le aso 26 o Iulai 1997, o le Aso fanau o le Ekalesia Worship Centre, na mua’i Faavae ai i Samoa. 

Ia Taitaiina e le Mamalu ma le Agaga Paia o le Atua, le Fonotele a lana Ekalesia i lenei tausaga 2017. Ia manuia le atoaga o le 20 tausaga o le Ekalesia Worship Centre World Wide.

© Samoa Observer 2016

Developed by Samoa Observer in Apia