Tali le Alii Palemia

Tusia Ilia L. Likou ,

138 Hits

Tuilaepa Sailele Malielegaoi.

Tuilaepa Sailele Malielegaoi.

‘O ai le pua’aelo o le a ia fa’amalosia le Ao o le Malo e saini se tulafono’

O lea le tali fuaitau a le Afioga i le Alii Palemia e  tali fuaitau ai ina ua fesiligia i sona finagalo e fa’atatau i le saunoaga a le na avea muamua ma Ao o le Malo, Tui Atua Tupua Tamasese Efi e fa’apea o ia sa fa’amalosia le saini i le tulafono.

A’o i ai lava la i mataupu lava ma le Palemia e fa’atatau i le Ao o le Malo, na fesiligia ai foi se tasi o polokalame  le Alii Palemia i se tasi o polokalame  i sona finagalo pe le’o le finagalo o le malo ina ia aofia ma tamaitai e ono avea ma Ao o le Malo i se taimi i luma?

Na ia saunoa e fa’apea ‘o le faauigaina lena e le au tusitala, latou ia e tusia tala,  ana omai i a te a’u ou te fa’amalamalamA lelei lava i ai’

“O le mea muamua, e le’o taofia tama’ita’i ( mai le ono avea ma Ao o le Malo) lae matala tama’ita’i i lalo o le fa’avae.

“E pau lava le mea ia i ai se matai , e sitiseni, e le leaga le mafaufau ma e  le’o ma’i i se  ituaiga mai e oti ai.

“O lona uiga , afai o oe le matai ma le sitiseni e mafai ona tofia ma Ao o le Malo, e pau lava lena, o oe se matai, o oe o le sitiseni, e le leaga lou mafaufau e  te le ma’i valea.

“O lona uiga e mafai na Ao o le Malo se alii e mafai foi ona Ao le Malo se tama’itai i le taimi lenei.

O lea se mataupu e pei ona ave ai talanoaga o lenei vaiaso.

Ina ia ofi tama’ita’i i suiga fa’asolosolo o le Ao o le Malo o  Samoa.

O lea le mataupu ua amata silasila ma tapena ai nei le malo.

I le lomiga i le itulau  na lomia i le itualu o Fa’amatalaga o le Komisi o Galuega o le atunu’u na ta’ua ai o le Pepa mai le Kapeneta FK (17) 33 o lo’o ta’imua ai  le Matagaluega a le Palemia mo  lea suiga aemaise le iloiloina ai lea o le Tulafono o le Ao o le Malo o Samoa, 1965.

O lea iloiloga e toe silasila ai le Fa’avae i nisi o suiga e ao ona fa’atinoina pe tamauina fo’i mo lea suiga ua silasila atu i ai.  

Na mulimuli ane toe fa’asao mai lea tulaga ma fa’aleaogaina ai nei fa’amatalaga na i luga ole itulau fa’alauiloa a le Komisi o Galuega.

Ina ua fesiligia le atunu’u talu ai i ni o latou manatu fa’aalia e fa’atatau i lea mataupu na taua  Edmund Ioka, 35,Vailima e fa’apea; I lou lava talitonuga e le tatau ona o tatou suia fuafuaga a le Atua ua faataátitia, e pei ona atagia mai o le itupa o alii ua totofi e avea ma taitai ae leó le itupa o tamaitai’

“O le itupa o tamaitai o ni faufautua ae le o se ulu o se aiga ma e iai lava mafuaaga e ala ai ona faia e le Atua nei filifiliga ma e aua ona nei o tatou fesiligia le na tulaga aua tatou leiloa le mafuaaga.

“Ua o tatou iloa uma lava, o o  tatou manatu e le’o lona finagalo lea.

“O au lava ia ou te talitonu o loo faapena ona tu’uavanoa mai lo tatou Tama i suiga ua o tatou faia. “E ao foi ona o tatou manatua, o suiga e lelei ae e ono auina mai itu le lelei mo se atunuu.

“I lou lava manatu na’o au lava, o nei suiga e ono tulai mai ai le tele o ni faafitauli.

Mo Eseta Levi, 37, Vaitele na ia ta’ua ‘O le toatele o alii o ni taitai lelei, e ese foi auala latou te faafeiloaia ai se tagata ese mai le itupa o tamaitai. “I lou lava ia manatu e le alagatatu ona ona faia se suiga. “E ao lava ona tuú atu lea galuega I le itupa o alii latou te faatinoina o latou lava tiute e onomea ai. “Mo i tatou o le itupa o tamaitai e tele lava ona o tatou faaaogaina o tatou lagona e faatatau i se mataupu e tulai mai ma avea ai lava ma tulaga e taofia ai tatou mai le ono faatino o se faaiuga saó. “O lea lava ou te mafaufau ai lava au e sili lava ona tuu atu lea matafaioi i le itupa o alii.

Na fa’ailoa foi e Visesio Mate, 62 , Aele-fou ‘O lo tatou atunuu o se atunuu lolotu ona tagata ma e faavae i le Atua Samoa. ‘O le ala lea sa faatautaia ai le vaiaso o anapogi ma tatalo ina ia faapea ona puipui e le lo tatou Atua fuafuaga uma ua a le tagata. ‘Ou te lagona ua tatau ona iai suiga mo si o tatou atunuu, ua alagatatau ona tulai mai se tamaitai e tauave le tofiaga o le Ao o le Malo o Samoa. ‘E ao foi ona o tatou taliaina mea o le a tutupu, afai lava o lona finagalo lea, leai lava se mea o le taofia ai. ‘Ou te talitonu lava o le a faia e le malo se faaiuga talafeagai e manuia uma ai tagata Samoa.

O Vaisaulu Satele,67, Vaitele na ia ta’ua ‘O le manatu afai lava e fia avea alii ma taitai e ao foi ona tutusa le nanau iai o le itupa o tamaitai e totofi i tofiga maualuluga o le atunuu. ‘I lou lava ia manatu, e ao ona o tatou faaaloalo i o tatou tuagane ma tama.

‘I le itupa o tamaitai e iai lava ana galuega masani e faatino ma e iai foi galuega e le talafeagai mo le itupa o tamatai.’Ua tele tausaga o tofia lava le itupa malosi i le tofiga o le Ao o le malo o Samoa ma e le alagatatu ona suia e ala lea i le avea ai o se tamaitai e tulai mai o se Ao o le Malo o Samoa.

Ae saunoa Val Silver, 19 ,Faleula ‘I lou manatu ua saó ma ua alagatatu ona faatino lea suiga o le avea ai o se tamaitai e avea ma Ao o le Malo o Samoa.

‘Sei fai se suiga fou ona ua leva ona pale mai le itupa o alii e taitaia le atunuu. Ou te talitonu lava o le a tele se suiga o le a iai ae o se suiga mo lelei o tagata uma.

I se toe taga’i ai le tofiaina ole Afioga ile Tui Aana e avea ma Ao o lo tatou Malo, ole isi lea o taeao fou i upufai ole Malo Tutoatasi o Samoa ma ona talatuu.

Na saunoa ai le Ali’i Palemioa e avea ai o ia ma sui o le Maota e momoli ai le faamalo ile Afioga ia Tuimalealiifano Vaaleto‘a e tusa ai ma lona valaauina.

“Sa ia galue ile Malo e avea ose alii mamalu ole Malo, ose alii Loia foi faauuina, mulimuli ane ai na tofia ai ile tofiga mamalu ole Sui Tofia mo le silia ile 20 tausaga,” o lana saunoaga lea.

“Ile filifilia ai ole Ao ole Malo, ina ua tuumalo Malietoa Tanumafili II ile tausaga 2007, sa iai lava le suafa Tuimalealiifano ile faiga filifiliga faalua ole Ao ole Malo ile 2007 ma le 2012.

“Ae peitai e lei faamanuiaina. Ole finagalo lena ole Atua ete onosai. Ete lei saunia i lena taimi mo le tofiga ole Ao Mamalu.

“Ole talitonuga maumauai lena ole Palemene lenei, o tofiga uma e mai le Atua.” O lea na ia onosai ai pea ma faaauau lana tautua ile fono a sui tofia.

E faalua ona agai pea le maota lenei e tofia le Afioga ile Tui Atua e avea ma Ao ole Malo o Samoa.

“O lenei ua valaau le Atua e ala ile musumusuga lilo i sui Usufono ole Fono Aoao Faitulafono ma la latou foi faiga filifiliga faale Vaega Faaupufai, ale Vaega lenei e Puipuia Aiā Tatau a Tagata e faapei ona aiaia ai i lalo ole Faavae.

“Oute faamalo foi ile Afioga ile Tui Atua lau afioga Tupua Tamasese Efi e tusa ai ma lou tauaveina ole tofiga ole Ao ole Malo i lenei 10 tausaga. “Sa faatino ai e lau Afioga lou tofiga i tulaga mamalu ma le taualoa.

“Oloo mautinoa le iai pea ole agaga ole naunautai i lau afioga mo le tautua pea i lo tatou atunuu i soo se avanoa. Faamalo le tauatai. Faafetai le tautua Malo.

“E le tau laeia foi le maa osofia ile tele o tausaga o lou soifua sa e galue ai mo le Malo o Samoa i tulaga tofi mamalu uma lava o lo tatou Malo. Faipule, Palemia ole Malo, Sui Tofia, Ao Mamalu o lo tatou Malo.

“Na ole Atua nate taui ile atoatoa lau tautua faaloaloa mo lou Malo ma lou atunuu o Samoa.

“Ole filifiliga ole Ao Mamalu, sa faatino lava i faiga masani faatemokarasi. “E le ose filifiliga na faigofie lona faatautaiga. “Mo se atunuu laitiiti toagaogao ae ua fesauai gafa o aiga. Leitioa fatu se taofi o Samoa ole aiga.

“Ole lagona na tupu a‘e ile faiga filifiliga lenei, e iai isi auala silisili taugamalie e ao foi ona tagofia e lo tatou Malo e faatino ai suiga o tofiga ile lumanai. 

“E tapena mamao iai i latou ua tofia ma talia gofie ai foi ni suiga o tofi ua tatau ma talafeagai faaletulafono.

“O isi ia o teuteuga lelei o a tatou tulafono e atili maua ai le nofo lelei ma le agaga ole feoeoeai o taitai o Samoa.

“I a sagai ane ai ole tai i lau afioga ile Tui Aana. Ia faaosofia moegaluaga ma utupūpūina fulu ole segaula. Maua le tofa ma le soifua lelei e faatino ai tiute ua faaee atu i ou tau‘au.

“A‘o upu taiala a lo tatou Alii, o lē ua taitai, tautua. O lē foi ua muamua, mulimuli. O ou māmā na. Faamanuia le Atua i lou valaauina.

 “Lau afioga ile Fofoga Fetalai pe a mae‘a se faaiuga foi ile aso tonu e faia ai le faatautoga, ona faapena foi lea ona fofogaina le mamalu ole Maota mo le faamoemoe ise aso oi luma.

I le polokalame a le Palemia ma le 2AP na ia fa’amanino ai le  uiga moni ma le auga atoa o lana folasaga i le Palemene i le aso 13 Novema, i le toe teuteuina lea o le Faavae i le Tulaga Tofi o le Ao Mamalu o le Malo, i le umi o le taimi e seei ai lē o le a tofia i lea tofiga maualuga o le atunuu.

“E pei ona silafia ua agai le Malo e toe teuteuina le Faavae ina ia maua ai se to’afimalie ma sologa manuia le tofiaga o nei tofi maualuluga ina ia aua nei ai se vevesi i le lumanai.

“E tele manatu ua faaalia e nisi o le atunuu agai i lenei teuteuga peitai, na ia saunoa “o le mea lea ua tupu ai le faalavelave, ana o tagata e faitau le faavae, ona malamalama ai lea e leai a se upu Tama a Aiga o tusia ai; o lena e tatala faasoloatoa, o lona uiga e avanoa uma ai a tagata uma, e le o faapitoa ia tofiga na, tofiga o le Palemia, tofiga o le Sui Tofia ma le tofiga o le Ao Mamalu o le Malo.”  

“O lena e agavaa uma ai a tagata, soo seisi, e pei o le mea a lea e agai iai le tatou malo, e fai a ma ave le faaaloalo i Tama a Aiga.  Ae le o se faavae faatoa fai nei ananafi, e manatua foi sa ou faamatalaina ma faamalamalama, o le fono faavae lenei sa usuia i le tausaga e 1960.  Na iai uma a ia faatumutumuga o itumalo e ta’i to’a fa mai itumalo.  O lona uiga o latou ia o matai maualuluga i itumalo, e latou te faia mo faaiuga fai a itumalo.”

 “Ae sa taitaia la talanoaga uma nei e Tama a Aiga, le Afioga ia Tupua Tamasese Meaole, ia faapena foi ia Mataafa Faumuina II, ia ma le Afioga ia Tuimalealiifano.  O latou uma la lenei na latou pasia uma aiaiga ia e iai totonu o le faavae, e moni sa iai ia finagalo ao le latou finagalo aua nei faapitoa ia tulaga tofi i Tama a Aiga, a? ae tatala pea le avanoa, ae talu mai a ona tatou tutoatasi, ia o ave a faaaloaloga foi a le atunuu i Tama A Aiga.” 

“O le faapupulaga lena o le iai i totonu o le faavae; e faapei ona pasia i le fono faavae sa auai uma a faatumutumuga o itumalo, ae e taitai ai a ia Tama a Aiga. E manatua foi la o faaaloaloga sa ave i Tama a Aiga i na taimi; e ulua’i Palemia ia Mataafa, o le uluai Palemia ae Ao Soofaatasi ia Tupua Tamasese Meaole ma Malietoa Tanumafili II.”  

“O aiaiga la e i lalo o le faavae, a tuumalo loa seisi o laua ia e toalua ia na faaauau loa lea e le toatasi o soifua pea; a tuumalo foi le o loo faaauauina, a? ia ona lafo mai loa lea i le Palemene e filifili e le Palemene ia seisi e agavaa e faasee e avea ma Ao o le Malo.  O le tulaga a la lena na sau ai i le tatou faavae o lea a e sosolo ai a, a?”

“O le eseesega tele a la e pei ona ou taumafai e faamanino, o le eseesega tele o le tofiga o le Ao Mamalu o le Malo ma isi la tofiga, tai pei o le Palemia, faauluuluga o le Palemene, o le Fofoga Fetalai, faauluuluga foi o le Faamasinoga – o le Faamasino Sili, ia ma le Palemia o le Faauluuluga o le lala lea e gafa ma le faatinoga o galuega ma atina’e a le tatou malo;  toatolu la lea, pei o lena lea sa ou taua i totonu, o i latou la ia o tagata faigaluega. a? O latou tofi, o i latou na e o e falala, faatimu, faasusu, sua le eleele, faaga’o ma faasuauu mea ua elea, ia ma o e tanu le gataifale pe afai ua āia e le sami.”  

“O i latou na e faatinoa galuega, a Ao le Ao o le Malo ia e aofia ai Sui o le Fono Sui Tofia, o i latou na e faamalumalu, poo le faamaepaepa ia ma silasila mai i galuega ia e fai; pau a lena o le latou galuega fai o le faamaepaepa. E ese mamao ai la ma galuega ia e nafa ma le tafa tolu o lala o le tatou malo.”

“A matau mai la, a? na alualu a faatoa suia a ia le tofi Palemia i le 1976 ina ua tauave e Tupuola Efi, ia manatua la le taimi lena e le o se Tama a Aiga ia Tupuola o le tulafale mai Leulumoega, a? lea ua avea ma Palemia i lena taimi, ia sosoo loa le tulafale mai i Leulumoega ia ma le tamalii i o i Vaisinago, o Vaai, a? sosoo Vaai ma Tofilau, ia sosoo loa Tofilau ma a’u la lea e tautala atu, a? O tofi faigaluega uma a tofi ia e le o ni tofi foi lea nofonofo. O le eseesega la lena o tofiga nei.”

“O le sa’o la leaga ua faalua ia te oe ona sese le aumaiga o le tulafono. O le sa’o a o le tulafono tai lima tausaga, a e pei ona iai aiaiga, a uma loa la lou lima tausaga, ua finagalo le Palemene ua muta ai iina lou lima tausaga, ia ua muta ai a iina lou lima tausaga.” 

“O lona uiga la, a faapea la o oe lea la na’o le lima tausaga, nao o le lima tausaga la oe; a uma atu la oe, ae sau loa leisi uma lona lima tausaga ua fiafia iai le Palemene, a? ona toe faaopoopo lea o lana lima ia na oo loa lea i le sefulu, o le tulafono la a e toe laki, ua toe agai atu le filifiliga ia te oe mo le isi lima tausaga, ia ona uma ai loa lea iina. E oo i le faavavau e te le toe sau i totonu, a? ia ma e le one tagata e atunuu, o lona uiga la na e oo lea i le sefulu.”

“Ae ua ala la ona taunuu ia le vaega lenei i le faia o le faaiuga lea, ona e le’i faigofie le matou filifiliga lea na fai nei; ia e manatua ina ua tuumalo ia Malietoa ona fai lea o le filifiliga a le matou vaega, ia e manatua o le matou vaega foi i lena taimi 2007 e pito to’atele, o le tagata a la e avatu e le HRPP, a? ia o le tagata a lena e avea ma Ao Mamalu o le Malo; lea la sa fulisia ai matou i le Afioga ia Tupua.”

“Ia uma le lima tausaga o Tupuai i le 2012, toe filifili foi le matou vaega, a? ia toe agai foi ia Tupua ave foi i totonu o le Palemene ia pasia e le Palemene. Ona uma foi lea o le lima tausaga lona lua a le Afioga ia Tupua, nei i le 2017, ona toe filifili loa lea o le matou vaega, ia ua alu alu le filifiliga, fai le matou palota agai loa ia Tuimalealiifano, e le tele a se va, lea ou te tau manatu pe na o le fitu ea palota e va ai, lona uiga e le tele a se va; lea la na ou aluatu loa lea faatu i totonu o le Palemene ia le fautuaga a le matou foi vaega, o iina la lea faatoa tofia ai loa lea e le Palemene.”

“Tusa o le afiafi ae uma le matou filifiliga, a? ou te oo i le fale, ae o atu le tou vaega faitatala, a? na matou o mai pe te faamaonia ua uma na tofia ia le Ao o le Malo, o’u fai aut ou te le faamaonia, a o lea fai mai sa tou fono, e faatoa fai le tofiga taeao. Ia oo loa i le taeao faatoa fono le Palemene faatoa faatu loa ia le suafa o Tuimalealiifano, o iina la faatoa faamaonia ai loa.”

“Uma loa lea ou sau loa talanoa i le vaega faitatala a outou lea na o atu, omai sou faamalamala atua ia le mea leaga e fai si loloto, na a la na ou fai atu e le’i tofia, ona na o le filifiliga na fai e matou, ae faatoa tofia e le Palemene, a? o lona uiga o lea upu tofia, ina ua faatu le lafo ma palota aloaia, palota ai le Palemene i le matou 47 ma le toatolu foi lele, e uma loa o fea a le mea e agai iai, o le mea na e igoa o lona uiga ua tofi e le Palemene, ia ona faatauto loa lea i le taimi lena i luma o le Palemene. Na faatoa tofia ai loa lea iina, lea e sese soo mai ai le sui lea, ma fai mai e le’i auai latou e leai e, o le mea lena e mafai ona toe sui foi mafaufau o le HRPP ae le’i oo i totonu o le Palemene, a? faigofie a ona toe sui.”

“Le la sa ou faamatalaina i totonu, le faigata na matou tauavea e fai si umi, o le faigata; ia manatua o le tele o faipule ia e iai e le gata ina tau ia Tuimalealiifano toe tau ia Tupua, ia e pei la ua tau oso a’e le agaga foi lele matamuli, ia a palota nei i lea tama ae tuu sia tama, a? ia o lona uiga ua faasi’ugutua le mea e maua, a pe palota i le sui tuai ona fiafia lea o le sui tuai ia ae faanoanoa le sui faaolioli, a? o lona taimi lea ua le amanaia, ia ae a palota foi i le sui fou ae le amanaia le sui tuai, ia ona faalupe foi lea fai mai ua tuli a’u; ia ma o upu na na oo mai ia matou, ua tuli; o lenei sefulu tausaga, a sefulu tausaga se faaaloaloga o le matua tele o le faaaloaloga e ave e le malo.” 

“Pei la i le matau faa-le-tagata, e sili atu ona sologa lelei ma leai se isi e to’atama’i, a? manaia foi le faasologa i isi la e faatalitali mai pe a faatulafono. O lona uiga la, a uma a lou lima tausaga ua le toe agai atu le tofiga ia te oe, ona ua pau a; a? ae a toe maua sau laki toe maua le isi au lima tausaga e sefulu ai, ia uma loa ia na e iloa lelei a, ia o si au last la lea, a? o le faaiuga lea, ia ma amata loa na e tapena i lou malolo manumalo, a? ia ona e malolo a lea ma manumalo e te toe ita foi i se faipule o iai i lena nofoaiga.

E faatusa la i le taimi lenei, a lea ua muta ai i le sefulu tausaga a lea ua tofi e le Palemene, o lona uiga o le matua to’atama’i a o nai tagata ia, ma e le o se mea e avane ai le na mea, o le natura lena o mea, e soo se tagata e le faapea e faapitoa i se tagata se toatasi soo se tagata e oo a iai le lagona lena, a?”

“Ia o a’u foi ia, ia e Fa Aiga ou te matai ai, o Salevalasi, Sa Fenunuivao, Sa Tuala,Sa Malietoā, o le Tolu o Aiga na e agai i le Tuiatua ae tasi e agai i le Sa Malietoā. O le tulaga lena e taua tele ai le faaiuga lea a le Malo ma le Palemene, e maua ai foi le filemu i le agai atu i le lumanai.”

“Na le pau a la le mea lea e lotea, a? na o le umi o le taimi e le o lotea a se isi mea; la e tumau a le faavae la e sau ai pei ona faataoto mai e tatou tuaa, pei o le mea lea o lea e tele ai le fenumi’ai, a? o le faavae a ia in black and white ua leva a ona pasia le faavae, la e manino a le faavae, e le o tautino mai na o le vaega lea a Simi e oo i o pa na o le vaega lea a Sani e oo i o; o la lava e tatala le avanoa.”

O lenei teuteuga ua tuuina atu i le Komiti Faa-Palemene, le 60 aso e tusa ai ma aiaiga o tulafono a le Palemene e latou te iloiloina, faagasolo iai faatalatalanoaga ma le mamalu o le atunuu i ni fautuaga  ma toe folasia ai loa i le isi taualumaga o le Fono Usu a Samoa le Palemene i se taimi o lumanai.

I le Malelega a le Afioga i le Ao o le Malo o Samoa i a Tuimaleai’ifano Va’aletoa Sualauvi II i le Palemene i lona fa’atautoina na ia malele ai e fa’apea 

“‘Aua ne’i ia te i matou le Alii e, ‘aua ne’i ia te i matou, a ia tuuina atu le viiga i lou Suafa, ona o lou Alofa ma lou Faamaoni”

“O outou Tu’itu’ifafau ma outou Sā tatapu, o outou Pa’ia faaufigatā ma outou mamalu faa-usisisili, o le a ta’oto ia a’o se fuataupea ua i’umaea mau. “uā ua uma ona ufipōpō ma tapula i mavaega, ua fata i mauga o lagi ma tagata i faiā, ua fesoota’i taualuga sā, ae ‘auga i amole’aotala nā tulaga uma, i moegālafo ma ta’ui talatala a le autao’o, ma le autolopopoto o le Fale’upolu. 

“Ua uma ona tatou mua’i lalagi sugalu ma momoli muamuafataga. “Ua tatou faapoipoi ma faane’ene’e i pa’ia agi-nunui tetele, ma mamalu pāui-sisili o le Atua Silisili Ese. “Auā fai mai le molimau faatalapipisu a le Tusi Sā o le Ola, ua uma ona matofa le papa o tōfiga , ma tu’u faasagamau e le Atua le Atulaulau, i ona tōfiga māelagi ma ona mamalu faasapitafa’i. Ua na o ia lava o le Tapa’autasi o Samoa, ma le Lalolagi atoa. Ia tumau pea ia te ia le Vi’iga ma le Faamanu, nei e o’o i le faavavau.

“Faafetai tele i lau Susuga i le Ta’ita’i o le Sauniga. Ua taliga o Fialogo lau faasoa faaleagaga, ua lē gata ina tomatauina ai Ta’ita’i o si o tatou atunuu, a o le tapu’eina fo’i o lo’u nei tagata faatauvaa, i le tauaveina o o’u tiute ma faiva, e tusa ai ma lenei Tōfiga maualuga ua faae’e mai ia te a’u e le Palemene o Samoa.

“Lau Afioga i le Tuiatua Tupua Tamasese Efi, o lē sa tū i le foe i lena sefulu (10) tausaga ua tuana’i atu. Ua fa’amālo le onosa’i. “Ua fa’amālo le tautua ia Samoa. “O le fetalaiga ia Lefaoseu ma Ulumū, “Ua se togi le seu lagatila, ua e faapulou i le tuālima, ua faamālo fai o le faiva.” “O lea ua e faase’etuāgalu, a o le tofiga o le Ao Mamalu o le Malo, o loo ta’oto pea i se tulaga maoa’e ma le mamalu, mai lava i le Ao Soofaatasi, o lea fo’i sa e taofiofi mamau iai. Ia faamanuia tele le Atua i lau Afioga ma le Masiofo.

“Lau Afioga i le Ali’i Palemia ma lau Faigāmālo. “Lau Afioga i le Fofoga Fetalai ma le Palemene o Samoa. Ua faamālo le tauivi ma le finafinau. “Ua faamālo le galulue punoua’i. “Ua faamālo i lo outou alofaiva ma le lē faalogologotīgā, ina ia manuia Samoa ma ona tagata. “Ua faamālo le faatupu. “Ua faamālo le faaeaea. “Ua faafetai mo lo outou faatuatuaga ua aumai ia te a’u ma lo’u to’alua, ma te sē’ei ai i lenei Tofiga tāua tele o le Faigāmālo a si o tatou atunuu. “Ia fesoasoani mai le Agaga Pa’ia iā i mā’ua. “A ia faamanuia tele le Atua i a outou Afioga!

“E lē faaitiitia le agaga faafetai i o mā’ua Mātua Faale-agaga, le Susuga i le Toeaina Faatonu ia Tauti’aga Senara ma le Faletua ia Olita, o le Sui Taitaifono o le Ekalesia Aoao EFKS i Samoa ma le Lalolagi, faapea le mamalu tele o le Aufaigaluega Pa’ia a le Atua. Faafetai tele i Afioga i le Nofo a Fa’aaloaloga o lo’u Āiga Taua’ana, o le Falefitu a Leatiatagaloa ma lo matou Nu’u o Falelatai, faapea lo matou Itumālo Faafaipule o Falelatai ma Samatau. “Tainane o mā’ua āiga uma i Samoa ma atunuu mamao. “Faafetai tele mo la outou tatalo.”Faafetai mo la outou fautuaga ma outou tu’ualalo.” Faafetai tele mo la outou lagolago mai i a i mā’ua i soo se mea. “Faafetai tele mo le Aufailotu o lo’o fa’anōnōmanū mo le manuia, ma le soifua faale-agaga o le atunuu.

“Ia alofagia e le Atua Samoa Aoao. “Ia aua ne’i taia le tuluvao, pe solo peauga, i tupu ma e’e o Samoa. “I Āiga ma a latou Tama, o Tama foi ma o latou Āiga. “Aua ne’i solo le lavelave o vanua, poo le filifili o maugao’o auā Tumua ma Pule, Ituau ma Alataua, Āiga i le Tai ma le Va’a o Fonoti. Ia aua ne’i afe se atua o le ala. “O le ma’atui ma le tagutugutu, o mailei ia a le ti’āpolo. “O le vaiatiga ua afetuālāina ai le soifua ma le ola. Ia manuia tele ‘Oe Samoa’

“Fai mai le faamanatu a le Perofeta o Mika (6:8) “Sole, ua faaali atu e ia ia te oe le mea lelei; se a foi se mea e finagalo ai le Alii (Ieova) ia te oe? Pe ā lē o ia mea, ia fai le amiotonu, ia naunau i le alofa, ma ia feoa’i ma lou Atua ma le loto faamaualalo”

© Samoa Observer 2016

Developed by Samoa Observer in Apia