Tu’u le faitio, galue malosi
O le manatu faaalia lea o le Tama ia Fata Felise Venasio, 38 tausaga le matua mai le afioaga o Laulii.
O lo’o nonofo nei ma lona toalua ma le la fanau e toaono, i le latou aiga, ma e le faigaluega lona toalua, ma o ia o lo’o faamoemoe iai lo latou aiga e ala i mea fai.
Sa faigaluega muamua le tama o ia o se kamuta, ma e faigaluega i Savaii, ae ua ala ona faamavae ona o lona popolega ma lona manumanu i lona aiga ma lana fanau.
“Sa ou i Savaii i le vaiaso ua te’a, ua ou sau lava ona o lo’u manatu mai i lo’u toalua ma la’u fanau, aua o ni nai vaiaso ua tuanai, na tetele ai a timuga, ae mo le silafia o le matou fale e le’o se fale lelei toe mautu.
“O lo’o lelei uma lava mea uma i totonu o le matou aiga aemaise le fanua, ae toe lava o le matou fale o lo’o faigata ai lo matou aiga” o le augani lea a le Tama i le Fofoga o Samoa i le aso ananafi.
E maua mea uma i le faatoaga ma le fanua, e pei o meaai aua o le mea moomia lava lea mo aso uma mo le tausiga o le fanau ma le aiga.
“Toatele o tatou tagata ua faitio i le tau o le soifuaga, faimai ua faigata toe taugata, ae e ala ona faigata ona o le tagata lava ia ma lona le ola galue mo le aiga, ua ova le paie ma le augata.
“E iai galuega lea ua maua ai totogi e $80 i le $100 tala i le vaiaso, tusa lava pe e te faigaluega i se pisinisi laititi o se seleni maua fua lea mo le aiga, ae ala ona le maua ona o le tagata lava ia I le le galuea ma le paie.
Na ia faaalia foi, e ao lava i le tagata ona galue malosi ae aua le ola faalagolago i tagata o lona aiga po o nisi lava.
“I le taimi nei ua na’o le ulugalii lava ma lana fanau, o mea lava ua maua I lima e tausi ai le fanau, ma fai ai mea fai I totonu o aiga, nuu ma le ekalesia.
O mea fai lava ia I totonu o le Nuu ma le Ekalesia, ua masani ai lava soo se tagata lava o le Afioaga, aua o mea ua masani ai lava o tatou tagata.
O lana faamamafa ua iai nei ina ia saunia lelei se fale mo ia ma lona aiga mo le lumanai aua le ola saogalemu o ia ma lana fanau.