Aua nei gata ai le taumafai

Tusia Fetalai Tuilulu’u ,

120 Hits

Le tinā ia Makerita Sovala, 31 le matua le soifua mai le afioaga o Letogo.

Le tinā ia Makerita Sovala, 31 le matua le soifua mai le afioaga o Letogo. (Photo: Fetalai Tuilulu’u)

E leai se mea e faigofie i lenei olaga. 

Ae o le pau lava le vaega tāua, aua nei fiu pe gata ai le ola naunau. 

O le manatu fa’alia lea o le tinā ia Makerita Sovala, 31 le matua le soifua mai le afioaga o Letogo. 

O le matafaioi a le tinā ia Makerita o lo’o feagai nei male tausiga o si ana fānau aoga ma le tausiga si o la aiga. 

“Talu ai so si o’u to’alua o lo’o malaga i le au tau apu lea la ua ou nofo ai nei e va’ai si o ma fanau ma tausi le ma aiga. o lana lea tala i le Fofoga o Samoa. 

“Ae lei malaga lo’u to’alua pau lava le ala ga tupe sa matou fa’amoemoe ai o i’a aua e fagota lava le matou aiga e fa’atau ae le gata i lea o matou mea’ai. 

“O le tupe maua mai la, e paketi lelei aua si o ma fanau le aoga ae maise o mea fai a le nu’u ma le ekalesia foi. 

“Tele o taimi e atu ai le mafaufau aua foi a leaga le tau ua leai foi se fagota e alu. Ia oe mea lava e tua ai o talo ma nai meatõtõ ia autafa lava le fale. 

“Āua foi e leai lava sesi e fa’amoemoe ai, o le tagata lava ia ma lona aiga ma le atina’eina.

Makerita Sovala
Makerita Sovala

“Pau lava le tulaga e fa’afetai ia o le avanoa ua maua e le tāmā le aiga e malaga atu ai e sāili manuia i Niu Sila. 

Sa fesiliga le tinā i lona  manatu fa’alia i le soifuaga ma sa ia fa’apea ai ua ova lava sina taugata le soifuaga. 

“Ou te talitonu foi tele lava o nai aiga o lo’o lagolagoina lenei manatu aua o mea lava o loo tutupu ma iloa. 

“E mo’i lava na’o a’u ma le to’alua ma le fanau le aiga, e mata e faigofie ae out e ta’utino atu e faigata ona e iai lava le taimi e leai ai se tupe ma leai ai lava se fa’amoemoe. 

“O lea foi le tulaga e vatu ai se manatu ina ia tatou iloa lelei  o le olaga lenei ua le faigofie aua o le soifuaga nei ua alualu i luma le taugata, ae o le Ali’i lava e tele lona sosia ma lona alofa fa’asoa. 

Peitai e iai foi se isi vaega ua fa’apopoleina ai le tinā ona o le latou fale e sao ai le timu i taimi o timuga. 

“Oun te ta’u tino atu ua le sefe lava matou i le maotu nonofo ai le matou fale pei o tulaga ua tou tagataga’i atu ai. 

“Ou te iloa o le isi mafui’e e pau ai lalo, o le ala lea e fiamana’omia ai se fesoasoani. 

“O lea foi le tulaga o le a ave iai le fa’amuamua pe maua mai se tali lelei ma manuia i galuega a si o matou aiga. 

© Samoa Observer 2016

Developed by Samoa Observer in Apia