Saunoaga Afioga i le Palemia Susuga Tuilaepa Sailele Malielegaoi Faamanuia o le Tausaga Fou - 2016

260 Hits

Afioga i le Palemia Susuga Tuilaepa Sailele Malielegaoi 

Afioga i le Palemia Susuga Tuilaepa Sailele Malielegaoi 

Ua taupe le tila, taupe le Fanā, ae lafo le taula i Malolo ina ua tuta i fanua le folauga a Samoa, i lenā tausaga ua mou malie atu.  O lenei foi ua toe faataumua ava ma faalelea lā afa o le folauga o lenei Tausaga Fou 2016. 

O le tatalo, ia faatautai e le Atua o Folauga ia ulimasao i matau la tatou faigamalaga o lenei tausaga fou.  Auā pe a aunoa ma le Atua, e galulue fua i tatou uma.  

Taoto ia le fiso ma ona lau auā paia faalupelupe o Samoa. 

Afio i le Ao Mamalu o le Malo, Le Sui Tofia, faapea le Tafatolu fefa’atauagai o le Palemene, le Faamasinoga ma le Pulega.  Aiga ma latou Tama, Tulatoa o Aiga, ma Faleupolu Tofia, Le Usoga a Tumua ma Pule e Ono i Salafai. 

Ae a le tatou va tapuia ma lo tatou Uso-a-Malo i Tutuila ma Manu’a.  Afio i le Kovana Sili ma lana Aufono, ma le latou foi Tafatolu o Pulega.  O paia lava ia faasino i le Faleagafulu ma le Nofo a Maopu, Faatui ma Tootoo.  Ae matua lava le Tuu i le Aufaigaluega Paia a Le Atua, ma le latou faanonogā manū. 

Ua fofoga Samoa i le malelega faamanuia o le Kilisimasi mai le Afioga i le Ao Mamalu o le Malo.  E faapenā foi ona taumulimuli ai le agaga o le feau faamanuia lenei o le Tausaga Fou.

“Ia tau fai maua uma e Aiga uma o Samoa

se Tausaga Fou manuia ma le fiafia, e ta’ui

i le filemu mai Le Atua.”

Faamalō le galulue i tiute ma tofi i atina’e eseese sa fitāituga ai – e tusa ma lo tatou valaauina o i tatou taitoatasi – o le tagata ma lana taleni.  O lau lea ma’a ua lafo e faufau ai lo tatou Malo – o le Sa o Samoa e fau tele.

Faafetai i le sao tāua o Pulega mamalu a Alii ma Faipule, le lagolagosua a Faletua ma Tausi, Sa’oao ma Auga Faapae, le Malosi o le nuu – o Taitai ia o le lumanai o Samoa latou te solisoli muliaao ina ia soso’o pea le fau ma le fau. 

Ae ā le faatonutonu folau e lē aunoa, a le Aufaigaluega Paia a le Atua, e auala mai ai le amio pulea tumau ma le nofo lelei.  E fulitua ai i uiga pa’aā, o le moemoe noa ma le laufā-lē-ainā.  O aga ma tu mamalu masani ia e avea o le to’ovae, o le maluapapa o Samoa ma ana Faigāmalō, o le Asō ma Eluā. 

O le tatalo, ia faaosofia e le Atua o Manatu, o le Faavae Papa foi o Samoa, le agaga lelei e faaolaola ma faatumau ai a tatou tu, aganuu ma agaifanua e lolo i le fai meatonu, e tūtūmau ai pea i  le siosiomaga o le filemu o tatou tagata, o loo lu’itauina pea lava pea e suiga ogaoga o le soifuaga o nei ona aso. 

O se tala leo malie i le lalolagi atoa le taunu’uga manuia o le Fonotele a Taitai o Malo o le Lalolagi na usuia i Pale-Falani i le masina nei – o se taumafaiga e faasaosao ai le tatou paneta mai le faapapateaina e suiga ogaoga o le tau e afua i atina’e soona fai lē fuafua tatau. 

O le mitamitaga mo Samoa, ona o Iugafono a le Fonotele a Malo Aufaatasi mo Malo Laiti o loo Pito Aafia i Suiga malolosi o le Tau, lea na usuia i Samoa nei i le tausaga talu ai, na avea ma Taiala i Aiaiga ua i ai nei e noatia ai Malo o le lalolagi i totonu o “Maliega” ua taunuu nei i ai Taitai o Malo e faatonutonu tatau ai atina’e eseese uma a Malo o le Lalolagi. 

E 17 manulauti iloga mo atina’e e aofia ai ma le taofia o suiga ogaoga o le tau ia tino i totonu o le 15 tausaga afua atu i le 2016-2030.  Ae o loo tā’ua matilatila ai lava ma le igoa pele o Samoa i le ulutala faalupelupe i le gagana Peretania “The Samoa Pathway”. 

Poo “Taiala mai Samoa”.  Ua saosao ai nei ma Malo mauoloa ina ia lava seleni e fausia ai atina’e eseese autū o puipuiga talafeagai mai suiga o le tau i atumotu o loo mua’i afatia ma faatama’ia e afa, lologa, lā mala, galulolo, mafui’e ma asiosio.   

Lona uiga ua taoto nei i lagotonu le faatupega o atina’e tetele mo le 15 tausaga o lumana’i ai e aofia ai fesootaiga televavave, eletise faafouina mai le vai, savili ma ave malolosi o le la, auala tetele, taligalu, ma tali vai, o le vai taumafa, faatoaga ma tagata asiasi maimoa mai, ma isi mau atina’e eseese so’oso’o tau’au.

Pau o le tatou tiute, o le galulue punounoua’i o le tatou Malo ma latou o gafa ma atina’e eseese ia matuā tinoū e una’i atina’e ua tatau ai, i auala pito silisili ona lelei.  E lē toe moomia ai ni uiga faatalalē, pi’opā ma le faialaga.

O le laolao lelei foi lenei e faamauina ai le tatou faamalō mo a tatou paaga o loo lagolago mai i atina’e eseese o loo faagasolo e pei o le Malo o Niu Sila, Ausetalia, Saina, Iapani, Malo Soofaatasi o Europa, Le Malo Aufaatasi, i ona lālā eseese, Fale Tupe o Europa, Faletupe o Asia, ma Faletupe Tetele o le Lalolagi mo atina’e e māmā tu’utu’uga o nogatupe.  Faafetai tele i le tou aao fesoasoani.  E ui lava ua siitia le tamaoaiga o Samoa afua mai le 2014, ae peita’i o loo lotolotoi ai foi Atumotu o Samoa i totonu o sone ma’ale’ale o le afatia gofie i mala matauti’a o suiga matuiā o le tau, ua i ai nei le lalolagi.

Ou te avatu ai le faamalō i le Aufaigaluega Paia a le Atua i le latou foi fatuaiga tausi tauave pea o le faanonogā manū i le Atua mo Samoa.  Ua atufia ea ni afā tetele ua tatou molimauina ua foufou e le Natura o mea tutupu e agai mai i Samoa ma toe faafuase’i ona liliutū e se malosi lilo uiga ese, ma tata’i ese atu ai mai o tatou laufanua? 

Tatou te ofo ai pea lava.  E lē tupu fua mea faapenā.  Lea foi ua atofa ai e le Komiti o le Fono a Ekalesia Soofaatasi le Aso Sa nei, e amata ai le vaiaso mo Talosaga ma Anapogi a lo tatou atunuu o Samoa se’i o tatou sii le viiga ma le faane’etaga ua tatau ai.  Ia ma tatou faamalolosi ma faamaoni tasi ia, i lenei Sauniga o lenei tausaga fou ua faatāua mo i tatou uma.

Ua lē o toe po malaē.  Ua sina nei le galu, ua iite foi fanua-a-lalo.  Ua tu mai ioa le lagaali a Tamafaiga, ua toe o se aga ona muta lea o le Paeaiga lenei o le Palemene, ae alo le atunuu i le Faiga Palota Lautele i le Aso 4 Mati 2016.  Faamalō le tauata’i i sui usufono uma o lenei Paeaiga.  Faafetai le tautua atunuu.  Lafo i le Atua lou tou alofaiva, ae maise sui faatutū o foufou mai e finau.  O le talitonuga Faaletapuaiga Kerisiano – “E totofi e Le Atua Malo mo ona Ta’ita’i”.  E lē tau saili.  Na o le faatalitali.  Ia lava le pusa onosa’i.  Ma tatalo.

Faapito augafa le faamalō i aiga o loo asiasi mai i malologa o galuega ma mafutaga mafana o foufou ma aiga i Samoa nei.  Faafetai le tautua aiga.  E lē vale se tali o galuega lelei o fai i taimi o faiga filifiliga.  Pe a toe taliu le uto auā aiga o loo faamuli mai, ia folau i lagi ma.

Faata’i lea o le leo, o le a lē faamatafauloaina. Agalelei mai Le Atua ia Samoa.  I le faasouga o Ao ma le Atufolasa.  Manuia tele le Tausaga Fou. 

Soifua

© Samoa Observer 2016

Developed by Samoa Observer in Apia