O atua o Taua a Samoa

Tusia Fuimaono Na’oia Faasavalu Touli F. Tupua ,

208 Hits

O le mau a Stuebel o le atua o taua a Matautu i Savaii o Vave. Ae o Manono, a aga’i atu e tau- ae lele ane le Matuu i luma o ana ‘autau ma tagi; e fiafia le ‘autau aua  o lea ua mautinoa-latou te foi mai ma le manumalo; ae a mae’a le taua ma toe taliu mai-e lele lava i o latou luma le Matu’u. Ae afai e lele le Matuu i tua o le ‘autau ma le toe fo’i mai, ona matua lagona lava lea e le ‘autau ma tagata uma- le popole ma le fefe ma i’u ai lava ina maua i le pala’ai. 

O le mau foi a Stuebel-o le Fe’e o le atua lea o taua a le Vaimauga ma fai mai na filifili lava e le Vaimauga e avea ma o latou atua o taua; fai mai e fealua’i solo i totonu o le fale lea sa ta’ua o le “Malumalu o le Fe’e” i gauta o Apia. A ‘pa se faititili ma gogolo atoa ai le Vaimauga- ona fiafia lea o tagata uma. E tele faata’ita’iga o isi lava atua faapenei -e pei ona ta’ua e Misi Tana i ana tusitusiga e pei o “Lefanoga” lea na sola ese -mai le fili -ae afaina ai ona tagata, le “Lulu” ma le “Pili”. 

O le togi a ‘autau a Samoa e pei lava o ‘autau a Fiti; talu ai e fai o latou ‘malo’ ma ‘titi. ’O le puipuia o latou ulu mai uatogi,sa fai o latou pulou e gaosi mai le u’a. Ae a o’o i aso o le to’afilemu, e na o tamali’i e faaaogaina ia pulou. O le atua o le “Lulu” fai mai a lele aga’i i le fili, ona faapea lea- o le a feagai le ‘autau ma faafitauli, talu ai- o le lele o le lulu i luma o le ‘autau- sa masani ona faaupuina e faapea -ua fia alu ese le lulu mai ana uo.

E faapea foi le faauigaina o le Pili- fai mai a sau sa’o i lalo le Pili mai le taualuga o le fale poo se pou o le fale- ae totolo mai le pola. O le ‘autau e leai ni o latou ufi-mata- e vali uli o latou foliga ina ia faailoa atu ai le mata’utia o latou foliga. O le mau a Misi Tana fai mai o le vali o latou foliga- e iloa tonu ai le latou ‘au-tau; o latou fatafata e vali ai laina sasa’o se lua, ma ulā-pule e ula i o latou ua. O le vali taatele lava o nei ‘autau- o le vali uliuli. E ese foi le faiga o a latou taua. E tele nuu e fiafia e avea i latou ma “muā’au”- ona o lo latou totoa- e pei o le “Moafanatau” a Faleata, faapea foi Sagafili, Nuuuli ma isi lava nuu- sa ta’ua o ‘itu’au’, ae o isi e tapua’i- e pei o “Leulumoega” ma “Tutuila”.

Ae i le tele lava o taimi, sa i ‘mua’au le pule e osofa’i ai le fili, ma o ia alii- o ni alii totoa i taua ma e tau lava mo i latou. E faapena le tulaga na i ai taua i Apia i le aso 1 o Ianuari 1899- ma le faitau afe ma afe o ‘autau a Mataafa, ae pe na o ni nai selau o ia toa- sa tauina le taua i maga-ala o Apia- ma atonu o le tele o nofoaga sa o’o i ai ia ‘autau, ae o le toatele lava- sa le auai i ia taua. O nei mua’au sa masani ona auai alo o tamalii- ia sa manana’o ia siitia o latou tulaga.

Ma o le upu moni- e tasi lava lo latou faamoemoe- ia maua lava se “Ao”, ma toetoe lava a manatu ai tagata uma e faapea- ua se’e atu latou i se tulaga ese. Ona latou pepese leotetele ai lea ma ta’uta’u le suafa o lo latou Tupu; ua latou tuu atu ulu i luma o alii o le nuu i le malae o lo latou nuu- e faaputu ai, ae faapito i luga ulu o tamalii ua fano i se taua. Afai e faa-telegese ona o ane o latou aiga e avatu o latou ulu, ona avatu lea i tamaiti e ta’a’alo ai, pe lafoa’i mo ta’ifau. Fai mai se tasi mau -o nisi taimi e faapena lava faiga e fai i tino atoatoa o tagata ua maliliu i taua. 

O isi faiga mataga ma le faapaupau- sa faapea foi ona faatino. O faamaumauga o taua anamua a le atunuu- fai mai e masani ona ‘ai e Toa- tamatama’ivae o i latou ua fasiotia -poo latou mata foi ma fatu; e le gata ina faalumaina ai e ua fasiotia- ae sa i ai se talitonuga- latou te maua ai lo latou malosi, ae ua na o se mea lava e leai sona uiga. E faapena aga masani a le Toa- e faailo ai lona malosi ma le toa- o se tagata lea e tamo’e atu i le fili, ma velo atu lona Tao ia i latou ; ona aapa ane lea i lana uatogi, e tali ai tao uma e ta-velo mai ia te ia; o se lu’i masani lea- a to’ai loa le fili- ia alu ane la te tau na o i la’ua- e pei o le tala i le “Toa o Poila” o Samatau lea na ia velo Pepe i le tao.

O le faiga masani o a latou taua, latou te le mana’omia le tau faafesaga’i, ae tau lamalama ma faate’i nai ‘autau to’aitiiti- i le ui mai tua (faaifo), o le latou togafiti masani lea- e pei ona ta’ua i le taua a “Laau”. Sa fiafia tele ia ‘autau i le osofa’i i le taeao po- o nuu e mamao ese poo nuu o le fili, ma fasioti soo se tagata e vaaia, ma ona o le taumafai ia tele ni ulu (ao o tagata oti) e maua; o lea e toe taliu mai ai le ‘autau atoa e fasioti tagata o totoe- ina ia maua ai ni ulu se tele. O ia la ‘autau ma tagata tau- e feoa’i solo i le togavao –ma- sa sili ona popole i ai tagata. I luga a’e o Manono, faapea foi Faleapuna ma Fagaloa i Atua-lea  sa tele ai ‘autau faapea- i aso ua mavae.

© Samoa Observer 2016

Developed by Samoa Observer in Apia