O le olaga sa pologa ai lea ua toe tauia

Tusia Aruna Lolani ,

108 Hits

Ua tali galuega le tamā ia Gaono Matalio Schuster.

Ua tali galuega le tamā ia Gaono Matalio Schuster. (Photo: Aruna Lolani)

O le fua e te lulu, e te toe seleseleina.

O le manatu fa’aalia lea o se tama mai Moamoa, e 64 le matua o lona soifua, Gaono Matalio Schuster.

Na maua atu e le Fofoga o Samoa le tama a’o fai sana malologa i se tasi o matafaga i Lauli’i. 

“O mea sa ou pologa ai lea ua ou manuia ai,” sa ia fa’apea mai.

“O la’u ma’umaga lea, ua fai lava sina leva o atia’e. Sa fa’aaoga la e tausi ai la’u fanau, ia a o lenei ua manuia ai lo’u aiga. 

 “O lo’u talitonuga, e te manuia a oe ia i galuega a ou lima, a o isi i le vaitaimi nei, tele le fa’amoemoe i isi e tausi atu latou.

“E tele a outou tusitusiga ua ou faitau ai, e fa’apea a le to’atele o tagata e matitiva ae ou te ta’utino atu, o tagata ia e le fiafia e galulue. E le fia galulue.” O lana tala lea i le Fofoga o Samoa. 

“Se taumafai e tu’u le faitio i le malo ae faitio a outou ia te outou, aua e pa’u a le leaga o le tagata ia ia te ia, pe’a le iloa tu i ona vae e fai le galuega e ola ai. 

 “Aua o ‘ita nei, a ou le faigaluega, e le ‘aai fo’i la’u fanau.

Sa taua e Gaono, o le paie e leaga ai mea uma i lenei olaga.

“O tagata paie e le fia galulue aua le tausiga o aiga, e maua a la le olaga lea tatou te va’ai i le televise; o le gaoi mai kamupani, po’o le fasioti tagata fo’i pe’a mana’o i mea totino a na tagata. 

“O le masani a tagata loua iai, e faimai a latou ua tupu le leaga ona o le malo ma le fa’ataugataina o le soifuaga. E leai, e le’o le malo. 

O galuega sa mafatia ai Gaono, lea ua tauia e le Atua. 

“Ia na ua outou va’ai ma le aso, o lea ua ou malolo, aua o la’u fanau uma loua faigaluega i Niu Sila ma o lea fo’i toeitiiti se taimi, ona ou fai malaga fo’i lea. 

 “O galuega sa ou pologa ai, ua ou manuia ai, aua sa ou talitonu mai a i le amataga o la’u fanau a lo’u lumana’i lelei. 

O lo’o fautuaina pea e lenei tama tagata uma ia fa’amuamua le fanau. 

 “A va’ai atu le fanau o lo’o galulue malolosi o latou matua, e avea fo’i lena ma fa’ata’ita’iga mo latou. Ae a e nofonofo ma fa’atalitali mo tagata e avatu mea lelei mo oe, e fa’apena fo’i le olaga e ola ail au fanau i le lumana’i. 

“E le’o taugata se soifuaga, a na taugata aua e le’o galue. Taumafai ona tu’u le fa’asino lima o le tasi i le tasi aua e le uma ai sou pologa. O le mea lena a le tagata paie e fai. 

 “Ia amata loa ona e alu e te galue ma le fa’amaoni, o lo’o ia tatou uma le sa’olotoga e fai so’o se itua’iga galuega e te fiafia iai.

© Samoa Observer 2016

Developed by Samoa Observer in Apia