Malaga Tana Umaga i Sini e tulituli Sonny Bill Williams

Tusia NZ Herald ma Fa’aliliu e Maiava ,

298 Hits

Sonny Bill Williams ma Tana Umaga a’o talie fiafia ma matamata le ta’aloga a Canterbury ma Counties Manukau i le ta’amilosaga o le ITM Cup i le 2010.

Sonny Bill Williams ma Tana Umaga a’o talie fiafia ma matamata le ta’aloga a Canterbury ma Counties Manukau i le ta’amilosaga o le ITM Cup i le 2010.

Ua tapena lelei nei e le Blues a ‘Aukilani, ina ia matua atoatoa metotia a Tana Umaga, e tauanau atu ai Sonny Bill Williams i le latou ‘Au, talu ai le fa’alauiloaina mai o ana fuafuaga, lea o le a ta’alo ai i taimi o totoe o lona olaga-lakapi, i totonu o Niu Sila.   

E le’i fa’amaonia mai e le Iuni Lakapi a Niu Sila i Ueligitone, fa’amatalaga ia sa fa’aalia e le nusipepa o le NZ Herald i le fa’ai’uga o le vaiaso talu ai. O lea fa’aaaliga e fa’apea, ua fa’aleaogaina ai e Sonny Bill ana konekarate sa sainia muamua a ua nofo sauni nei e ta’alo lakapi mo le tolu tausaga i le Iuni Lakapi a Niu Sila. 

Peita’i, o taumafaiga a Tana Umaga ua faia nei – e aofia ai se malaga fa’atopetope e feiloa’i i le pule/fa’atonu a Sonny Bill, o Khoder Nasser – ua ono ‘ave-‘esea ai le finauga ‘autu.

Ae ono fai se fa’asalalauga o le lumana’i o Sonny Bill i Niu Sila - e aofia ai le ‘Au o le a ta’alo ai i le ta’amilosaga o le Supa Lakapi, - a le o nei, o le Aso Tofi.  

O lo’o matua finau le Blues ma le Chiefs po’o ai e malo ia Sonny Bill.

Peita’i, ua alu motu iai ‘Aukilani i le malosi ina ia latou maua ai Sonny Bill e fesoasoani ai i le fa’aletonu o iai nei le Blues.

O le mafanafana o le faiga-uo a Umaga ma Sonny Bill e ona avea o se vaega e ono maua ai e Aukilani le ali’i-Samoa. Sa i Toulon le kapeteni-tuai o le ‘Olopeleki i le taimi na fa’atoa amata ai le olaga lakapi o Sonny Bill, ina ua tu’ua le kalapu lakapi liki a le Bulldogs a Ausetalia, mo le lakapi a Farani.

Sa toe fa’atasi fo’i le to’alua lea i Counties mo se taimi e le’i ‘umi na’ua, a’o ta’alo Sonny Bill i le Ta’amilosaga Fa’aItumalo a o le taimi lea ua amata tiute fa’aFaia’oga a Tana Umaga. 

E le’i mamao atu, na saunoa ai Tana, o lo’o ta’afili pea le Blues e fa’amautu i tama ta’a’alo lelei, o lo’o iai lava lo latou lumana’i manuia i le Blues.   

Pe a saini Sonny Bill mo le Blues e matua ogaoga lava ma lelei se taunu’uga e o’o iai. 

Ae le tu’u-mamaina fo’i e le Chiefs lo latou naunau e taofiofia pea Sonny Bill i le latou ‘Au.

Ua ma’ea ona maua lana siamupini o le Supa Lakapi a’o iai i le Chiefs i lalo o le va’aiga a Dave Rannie ma sa fiafia tele a’o iai i Hamilton nai lo le taimi o ta’alo mo le Crusaders i lana ulua’i ta’amilosaga o le Supa Lakapi. 

Na matua vi’ia e Rennie le ali’i o Sonny Bill ona o ana aga ma amioga fa’aPorofesa ma fa’apea ai, o se tama-ta’alo e fa’aosofia le naunau o isi tama o lana ‘au e koleni malosi ma fa’amaoni ma faia fo’i fa’ata’ita’iga lelei mo isi.

A o le agaga moni lava lea o lo’o fia maua e le Blues.

A’o iai Umaga i Sini, sa asiasi fo’i i koleniga o le ‘Au a New South Wales mo le ta’amilosaga o le State of Origin. E mafana lava le latou mafutaga ma le faia’oga-lagolago a NSW ma le faia’oga o le Toa Samoa o Matt Parrsih, lea sa asiasi atu i le Blues a’o iai i Aukilani i le tausaga talu ai.

© Samoa Observer 2016

Developed by Samoa Observer in Apia