Fa’atupula’ia fa’alavelave ona ava malosi
O le aso ananafi na maua ai le fa’atalatalanoaga a le Fofoga o Samoa ma Tu’umaiai Va’ataulo.
O lo’o nonogfo o ia ma lona aiga i le afio’aga o Faleula-Uta.
Ua 50 le matua o lona soifua ma na ia fa’ailoaina nisi o atugaluga ua i ai nei ona o le to’atele o tagata ua fa’apea ona ma’imau le soifua ona o le ava malosi.
“Ia e pei o matua lava le amataga o le fa’aletonu o olaga o tagata,” o lana tala mai lea.
“E pei o lea lava le atagia o lo’o mafai ona tatou maua mai fanau ma o latou olaga, o lea lava le tulaga o lo’o ta’ita’ia ai e matua.
“Afai lava e tausia le fanau i ala e tatau ai, e le tau fesiligia le ola ai lava i le lumana’i, ae afai lava e le’i faia i ai se galuega ia o le a la mea o le a mafai ona fai.
“Ia o lea lava le tulaga ua maitauina i lenei vaitau ma ua le mafai lava ona toe fai i ai se isi fuafuaga ona ua fa’atupula’ia lava lea tulaga.
“E o’o fo’i lava i totonu o nu’u ma afio’aga ta’itasi , o lea lava fa’afitauli ua maitauina.
Na ia fa’ailoa e tatau lava i le malo ona i ai fo’i nisi o vaega e tatau ona silasila i ai.
“Ia e masalo o le tele o nisi e le malamalama lelei le fa’aletonu o vaega nei se’iloga lava e fa’alogo ua tupu se fa’afitauli ia fa’atoā tau ano mai lea/
“O lea ua o tatou molimauina uma le si’itia ai o e ua maliliu ona o le so’ona tagofia o le ava malosi.
“E ao fo’i ona o tatou va’ava’ai lelei ai aua se tali mo lea tulaga.
“I a te a’u lava ia o lea lava le tulaga e ao ona o tatou va’ava’ai i ai,
“Ia o totonu o si o matou nu’u ia o lea o lo’o fa’ataunu’uina lava fa’asalaga latou i lea tulaga, ma o lo’u lea manatu o le a fesoasoani tele ai mo nai o tatou tagata aemaise o le manuia alu i luma o le atunu’u.