E leai se mativa i Samoa
Ou te lē lagolagoina lava e a’u lea manatu ua tele o tagata o lo’o fa’aali manatu ai o lo’o iai le mativa ia Samoa.
O lea le manatu o le tinā ia Ma’agao Keneti Moe o Leauva’a i le maua ia o le fa’atalatalanoaga ma le Fofoga o Samoa le aso ananafi.
O le tinā e 52 tausaga le mātua le soifua ma sa maua ina le fa’atalatalanoaga a’o fa’atauina fua o lona fa’atoga i lona maketi i Vaitele.
O le tele foi o manatu ua fa’alia ia lea tulaga I Samoa ma e toatele foi tagata ua ioein ma le ioeina lea vaega.
“O a’u ou te mātuā ioeina lava o Samoa e le maua ai se mativa.
“O le uiga o la’u tala o le mātiva e ave i le tagata po le aiga ua leai se fale e nonofo ai, le maua se fanau ma leai lava se mea’ai.
“Ae o lo’u iloa i totonu o Samoa e tofu lava le tagata ma le aiga ma le fale, pau lava le tulaga o le manana’o tele ma le fia tele.
“Ou te ta’u māmā atu lava o le tele o tagata ma aiga ua fia palalagi ma naunua e maua le tupe ae o le tulaga sa’o lava ia oe le olaga galuega ma aua le ola fa’alagolago.
O Ma’agao o se tinān to’aono lana fanau ae na’o le tasi lava le tagata faigaulega o si ana tama teine lea. E ui lava i le tasi le tagata faigaluega e mau tū lava lona tāofi e leai se mativa aua o lo’o iai lava fua o ana fa’atoaga o lo’o fa’amoemoe ai.
“Pau a le tulaga ia te a’u ia maua e lo’u aiga le fiafia, e le naunau foi le tupe ma su;e ni galuega ma oi sole aua o lo’o iai lava fanau ma maumaga ma atina’e laiti e tua ia ma maua ai tupe.
“Pau lava le mea taua ia maua le fiafia ma maua sina seleni aua le mea’ai i aso uma ua lava lea ma totoe.
“O le isi foi itū out e tete’e ai i le iai le mativa au foi o lo’o tofu lava le tagata ma fanau o lo’o nonofo ai, ia fa’aoga tatau e tõtõ ai fuala’auaina e fa’atau e fesoasoani i aiga.
“Pei foi o la’u galuega o lo’o fai nei, a iloa e leai se galuega ma le lava le tāmāõaiga ona galuega mo se isi itū e maua ai se tupe.
“O se mea fiafia ia a’u le galuega ma le tāma le aiga i le ma fa’atoaga ma la’u e fa’atau, aua o mea lava ia sa tua ai i le tele lava o aso pe a le lava le fa’asoa.
“E ova lava ma le $200 la’u tupe maua i fua o’u fa’atoaga i le aso ma e lava lelei ai le fa’asoa ma ave e teu le isi vaega aua lava fa’alavelave fa’afuase’i.
“O le galue malosi lava e fa’ataunu’uina uma ia miti o lo’o tatou nonofo ma tatou.
“Ia iloa lelei e si o tatou atunu’u e leai se upu ta’u mativai totonu o Samoa aua e tele lava na’o le faitio i le mativa ae leai se gaioi ma fa’atino le mativa.