Mana’omia e le tinā se fesoaosoani

By Deidre Tautua – Fanene 01 February 2018, 12:00AM

Na fa’ailoa e le tinā i a Lanuola Mita’i, 61 le matua o le soifua mai le afioaga o Faleasiu le faigata o le soifuaga o lo’o i ai nei lo latou aiga.

I le fa’atalatalanoaga ma le Fofoga o Samoa na ia fa’ailoa ai lea tulaga.

E to’aono ona alo ma o lo’o latou nonofo i se fale e le’u uma ona fausiaina toe leai se eletise ma se suāvai.

“O le itu pito sili ona faigata I le taimi lenei e to’atasi le tagata faigaluega na o le ma tama teine ae e le nofo iinei i a maua ua fai lona aiga ma lana fanau.

“Ae ui i lea itu o lo’o fesoasoani mai lava e aumai matou fa’atau o le vaiaso ma tausi mai matou pe a o’o i ona aso totogi.

“O la’u fanau tama o lo’o tau sailia lava ni galuega i le taimi nei e fesoasoani ai i le latou tuafafine ma fa’auma ai le matou fale ma toso mai ai se matou vai ma le eletise.

“O le taimi nei e le’o i ai se matou faleta’ele se’i tulou ona e leai se vai, o lea ua galulue la’u fanau tama i le eliina lea o se lua e amata ai ona fausia se fale taele.

“O le matou molī fo’i lea e toso mai le matou uaea mai le fale o se tasi o matou aiga ina ia mafai ai ona matou ola i po.”

Sa fa’aalia e Lanuola o lana fanau tama e to’atolu fa’atoa i’u a latou aoga ma o lo’o tau sailia ni galuega e fesoasoani ai i le aiga.

“E fai fo’i o le faigata o le olaga a’o le faigata o le tausu’eina o ni galuega,” o le saunoaga lea a le tinā.

“O le naunataiga tele o le fanau ina ia maua ni latou galuega e faauma ai le fausiaina o le matou fale ma fesoasoani tele ai i si latou tuafafine.

“O le taimi nei o lo’o fai le matou toga fuāla’au aina e fa’atau ma fesoasoani ai i si a’u tama teine.

“Ua mana’omia lava se fesoasoani i tulaga tau galuega mo si a’u fanau tama ina ia mafai ai ona fesoasoani i le matou aiga.

“O le taimi nei o lo’o fola ma’a le matou fale, a o’o i taimi e momoe ai ona aumai lea o fala ua fofola Ii luga o ma’a ona matou momoe ai lea.

“O le itu fo’i tau suavai o galone ia e fa’atali ai le timu e maua ai sina suavai matou te fa’aaogaina.

“A o’o ina mūgalā ona o lea o taimi e asuvai mai i aiga o lo’o sua latou paipa ae o tupe fo’I e mana’omia ona o lo’o mita uma vai a nai na aiga.

“O le soifuaga lea matou te ola ai ua faigata lava ae o lo’o taumafai pea e atia’e le aiga i mea ua maua i lenei taimi.”

By Deidre Tautua – Fanene 01 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>