Puipui lo tatou gataifale – sami, a’au ma ‘amu

09 February 2016

Fa’aliliu e Maiava

 

O le Aso Faraile talu ai, na tatala aloa’ia ai se polokalame fa’alauiloa a se leitio fa’asalalau i Samoa nei, e una’ia ai le faia o ogasami-fa’asao, e le fa’atagaina ona faia ai o ni faigafaiva.

O lea poloketi na amata aloa’ia e le Vaega o Fa’asao Fa’ava-o-malo, i se faiga-fa’apa’aga ma le Matagaluega o Puna’oa Fa’aleNatura ma le Si’osi’omaga fa’apea le Matagaluega o Fa’ato’aga ma Faigafaiva. 

E tolu ituaiga fa’aleoga e mafai ona fa’alogoina ile Leitio Polenisia mo le isi tolu masina – o se tina ma lona atali’i fa’aea nisi o alii-faifaiva e to’alua o lo’o tau-fa’amatala mai i le ‘au-fa’afofoga, le uiga o ogasami fa’asao e le fa’atagaina ai ni fagotaga ma le a’oga o le tausia mama ma maloloina lelei o a’au o Samoa.

O ogasami-fa’asao, o se vaega lea o le sami ua fa’amatu’u-‘ese e le afio’aga po’o le malo fo’I, e le fa’atagaina ai o so’o se ituaiga o faigafaiva e faia ai. O lona uiga e matua sa-taputapu ona fagota ai se tasi, fa’asa ona ‘avea se i’a, o figota, o sea, maisu ma loli, o ‘amu, o le oneone po’o ma’a fo’i. O nofoaga fo’i nei ua iloa lautele e le atunu’u, e avea ma ogasami fa’asao mo ia ma ola uma o iai po’o nofoaga puipuia o le gataifale. 

ADVERTISEMENT

O nofoaga fa’asao fo’i nei, o le a puipuia ai a’au mo ola o i’a ma isi meaola o le sami e fa’alagolago iai, ma toe fa’ateleina ai, aua o le a fa’asaina ai ni fagotaga.

O le toe fa’afo’ia o le so’isi’omaga ma le ola-maloloina o a’au nei, e toe fa’ateleina ai i’a ma ‘amu ma saga fa’ateleina atili ai pea i’a i tua atu o nofoaga nei ua fa’asao.    

E le mo’omia le faia o ni nofoaga fa’apenei i Samoa, talu ai, ua fa’amaonia i su’esu’ega sa faia ai muamua, o nisi o a’au e matua leaga-faia lava.

O le tele o le fa’aleagaina e afa malolosi talu ai, o sunami ma le tele o alamea, ua tele ina pepe ai ‘amu ma pa’u maulalo ai i’a e maua i a’au. Ua atili fa’aleagaina tele, ona ua so’ona fa’agotaina e tagata ae maise o isi a’afiaga ua fa’ailoa atu. 

I le Ripoti Mulimuli o le Tulaga Ua iai nei le Si’osi’omaga o Samoa, na ta’ua ai, o le so’ona fagotaina o nofoaga nei ua avea o se fa’afitauli ogaoga tele, ma afai e fa’aauau ai pea, o le a lamatia ai le tamaoaiga o le gataifale ma a’au-‘amu’amu.

I le aso na tatala aloa’ia ai lea polokalame fa’alauiloa i le leitio, na talanoa ai i luga o le ‘ea le vaega fa’asalalau a le Radio Polynesia ma le ‘Aufaigaluega a le Fa’asao Fa’ava-o-malo, i tulaga e ao ona fa’atino e tagata-nu’u uma o Samoa, ina ia puipuia ma fa’asao a’au ma ‘amu.

 “O le tausaga talu ai, na matou faia ai se su’esu’ega ma iloa ai, ua maua e ‘au-fagogota i afio’aga ma alalafaga o Samoa, le pa’u maulalo o i’a-maua, ae le-malamalama po’o ai tonu e faia se tonu mo le puipuia o lea fa’afitauli.

O lo matou fa’amoemoe la, talosia ia aoga lea polokalame fa’alauiloa e iloa ai e le atunu’u, a galulue fa’atasi, e mafai lava ona toe faia fa’atele nisi nofoaga fa’asao fa’apea e fa’asa ai fagotaga, e mautinoa ai le manuia o ogasami nei ma a’au i le lumana’i aua tagata Samoa uma.”  o le fa’aaliga lea a Schannel van Dijken, o le Fa’atonu o Polokalame mo Gataifale, a le Vaega o Fa’asao Fa’ava-o-malo.

Mo nisi fa’amatalaga e uiga i ogasami fa’asa nei, fa’amolemole, ki-sa’o lau leitio i le Radio Polynesia pe fa’afeso’ota’i fo’i le Matagaluega o Puna’oa Fa’aleNatura ma le Si’osi’omaga po’o le Matagaluega o Fa’ato’aga ma Faigafaiva i le telefoni numera 21593

09 February 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?