O la’u tala fo’i

09 February 2016

1. Matauina i Tala Fou se tala uiga ese e uiga i se pagota fai mai ua tatala i tua mo sina taimi.

O lea la pagota e igoa o Chong Nee e faapea na toe faafo’i mai NIu Sila-ma o ia foi lea na gaoia le Westpac Bank i Vaitele! Fai mai la Tala Fou-ua tatala i tua lea pagota-ona ua talia se talosaga ina ia tatala o ia i tua- e fesoasoani i lona to’alua o loo maua i le ma’itaga.

O le polgai lea na tatala ai o ia i tua ia Tesema 2015! O le fesili la- afai la e tofu uma pagota o loo i le Falepuipui ma ta’ito’alua o loo ma’ito-e mafai la ona o uma lava i tua pagota ona o lea mafuaga-ona o lea ua faataoto lea faavae fou? Afai e taua ia i latou o latou ta’ito’alua-o le a le pogai na le manatu ai i na tulaga i le taimi na fai ai le gaoi ma solitulafono e pei ona faia? Talu mai lava ona tuto’atasi Samoa- e leai se mea faapea na faia i ni pagota! O le pagota lava o le pagota.

Afai na fai le gaoi ma solitulafono uma ae le mafaufau i o latou ta’ito’alua-o le a le pogai o le a faafuase’i ai ona manatu i le fafine ina ua falepuipui? Masalo tasi lenei faiga e tatau ona matua silasila lelei  i ai le Malo-leaga e le o se mea e masani ai-ma e mafai ona avea ma ala e ‘alo i ai ona o le musu e nofo i le falepuipui? A silasila toto’a la i lenei pagota-o le fesili-ua faafia ona sola i tua? E faapefea la ona faamaonia e le Komesina o Falepuipui o le mafuaga tonu lea e tatau ai ona tatala i tua?

ADVERTISEMENT

Aisea ua alofa ai i le to’alua ina ua falepuipui-ae sa i tua nei lava-ae alu gaoi ma amioleaga solo? O ai la le pagota e mafai ona tatala i tua ona o ia mafuaga ae o ai e le mafai? Faapefea la pagota e leai ni ta’ito’alua ae mana’o mai i ai lona tama poo le tina ua gasegase? Faapefea la pe a pepelo mai ua mamaiI o latou ta’ito’alua-ae o atu foi toe gaoi? Faapefea pe a toe tutupu mai ai nisi faalavelave? O se faaiuga tonu lea faaiuga? O le a sou taofi? 

2. Matauina i Taaloga o le Taito’afitu na amata i Niu Sila ma o lea foi ua uma ona fai i Ausetalia- le matua oti mataga o le Taito’afitu a le Manu Samoa. E matua le lava tapenaga a le ‘au-le lava se malosi-e matua leai ni metotia e faatamo’e ai le polo aemaise ai o le leaga o le pu’e! Aisea ua faapea ai le ‘au a le atunuu sa masani ona ‘ai-filofilo i ‘au tetele ma le lauiloa a le lalolagi. E matua le malamalama lava le ‘au ia latou gaoioiga i lea taimi ma lea taimi. A taufetuli mai –e na o le taufetuli lava ae le iloa le pogai e ala ai ona taufetuli.

A tatou vaaia ia Amerika, Iapani ma isi lava nuu o Europa faatoa lakapi ananafi-ua matua le mafaia lava e Samoa ona toe faato’ilalo. O lea la ua faamaonia nei- e le o se faia’oga mai fafo e mana’omia-o le pogai- e le malamalama tama taalo i mea e faatonu atu e le faia’oga-e tatau foi ona tili mai ni tagata tino lelei toe uumi ma saoasaoa.

Ua matua laiti tele nei tamaiti e taaalo i le Taitoafitu a tatou-ma o le pogai foi lena e le mafaia ai e le tatou Manu Samoa ona tapu’e tama taalo uumi o isi atunuu! Afai la o le tulaga lea o le a tatou alu ai lava-o lona uiga-e le toe sogi lava Samoa i se faailoga e tasi! O le a sou taofi? 

3. Matauina pea le toatele o sui faatutu o le Faiga-Palota o loo loma nei-e lagolagoina le HRPP-o lona uiga la-o loo matua lagolagoina e le to’atele le faiga-malo a le HRPP. E ui foi ina e le’i faalauiloa maia ni sui faatutu o le Tautua Samoa Party, ae mautinoa lava –e aupito i toatele lava sui faatutu o le HRPP.

O le HRPP la ua loa ona ia faafoeina le atunuu ma o lea ua savali i le 40 tausaga lana pulega, ae o le Tautua Samoa Party-e lei lava ni ona aso i upufai o malo. Ae ui o lea-pe ua leva pe leai ona i ai se Vaega Faa-Upufai ma na pulea se malo-e le o le itu taua lena! Aisea?

E fua le lelei o se pulega –malo i ana mea lelei na fai mo le atunuu-ma afai la o loo malamalama lelei le atunuu i ia mea lelei poo le leai foi o ni mea lelei-o le faafanua atoa lena o le Palota! Aisea? Leaga ailoga e i ai se tagata e fia palota i se mea e oti atu ai ma ia –lana fanau ma lona aiga! O lona uiga- e le tau faatosinaina i ni tupe ma ni taui se tagata poo ni tagata e matua talitonu- e faamuamua le manuia o latou aiga! Ae faapefea la i latou e tiga lava ona iloa le mea e malaia ai o latou aiga- ae o lava lagolago? O le a sou taofi?

09 February 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?