Manatu o le Fa’atonu - Le ‘au-aisi ma le ‘au-matitiva, ma le palota

01 March 2016

Tusia - Mata’afa Keni Lesa

Faaliliu e Maiava

 

Toe fa aso o’o i Faiga Palota, ae le suia ai le mea moni lea. 

E sili fa’aafe atu Samoa i lo le tele o isi atunu’u - mamao pe lata mai fo’i. 

Moni e anoanoa’i le mau fa’aletonu ma fa’afitauli e lu’itauina ai tatou i le tele o aso, ae o lo’o to’a pea le tai ma tatou sagisagi fa’amanu-ao i le soifuaga nei, o fa’amanuiaga e na ona mo’omo’o fa’anu’u-naumati iai le loaloa o le lalolagi.

E moni fo’i tatou te matemate-lima faiva o Pausisi pe tua ma ni a le aso ma a-taeao,  ae ta’utino pea le solo a le tamaloa ma tatou sa’afi fa’aAsomua pe a to-manatu i nai uso ma tuafafine i Sasa’e Tutotonu ma isi tafa o le lalolagi, e le o fa’apea.   

E le taumatea lena mea, aua o se fa’amanuiaga mo tatou ma lo tatou atunu’u, ma e ao ai ona tatou me’eme’e i taeao uma, i le maleifua mai i le nanamu o le ola-fou mai Luga.

Le ola ua tu-matila ai Samoa ma tatou fiafia fa’atasi ai, ae maise lo tatou talitonuga, o tatou lava o tagata totoa ma finafinau mo mea lelei. Aua po’o a lava fita ma faigata e fou mai, e tumau pea le agaga e finau malosi ai ma taumafai mo se soifuaga fiafia ma manuia. 

A’o tatou tu-lalata atu nei mo faiga-palota a le atunu’u, e iai lava nai vaega e ao ona silasila toto’a iai. 

  O le tasi o ia vaega, e manatu, ua taia so’o ai le va’ai i aso ta’itasi. Lea e talanoa atu i le fa’ato’ateleina pea o tagata-āisi ma fanau fa’atau-oloa i magaala ‘ese’ese i so’o se taimi o le ao ma le po.  

Po’o fea tatou te iai, po’o tali-sua i taumafataga mananaia ma taugata mai fafo i  totonu o se fale’aiga fe’ilafi, e le ‘umi ae tu-fa’afuase’i atu se tagata e aunoa ma lou silafia le o’o atu. 

Pe savalivali solo fo’i i le taulaga, ae fa’asalavei atu.

Pe nofonofo fo’i i totonu o lou sa ae tu’itu’i atu le fa’amalama.

O tagata uma nei, o foliga fa’amaonia lea o le leaga-faia ua o’o iai le mativa ma le faigata o le soifuaga i parataiso nei.

E fai lava si malamala teisi o ia tulaga aua, e tiga lava le matagofie o le mau mea ua ‘ausia nei e Samoa, a o le va’aiga fa’anoanoa lea o lenei atunu’u, o le a momolita’i e tagata tafafao nei mai fafo, i o latou atunu’u pe a toe fo’i.  

O le mea mautinoa, e logo i tino matagi lelei – pe a lagi o tatou vi’i ae maise fo’i le lagona matagofie, o le fa’amanuiaina, peita’i, e talitonu lenei tusitala, e tele lava  galuega e tatau ona fai a ta’ita’i o lenei atunu’u. 

ADVERTISEMENT

E le gata o le fa’afetauia o le ola-mativa, o fanau fa’atau-oloa ma le sa’ilia o avanoa faigaluega mo tagata le-faigaluega, ae tatau fo’i ona silasila toto’a i le faia o se fa’atatau i faifitauli ogaoga e pei o le fa’afaigaluegaina o fanau-iti, o le sauaga-mataga fai-fa’amalosi, o le pule le-uma, o sauaga fa’asaga i tina ma fanau, o le gaoia ma le talepe-fale ma le anoano o na solitulafono ua tau le-misi se aso. 

A silasila toto’a lava i le soifuaga i parataiso nei, ona silafia lea le fa’asolo atu lava ina leaga tele ma fa’ateteleina ia fa’aletonu uma, ua alagatatau ai lava ona fai iai o se fuafuaga vave. 

E le fou i Samoa nei le fesiligia pea o le ola mativa o le atunu’u. Fai mai nisi e leai se mea fa’apea i Samoa nei, talu ai, o lo’o tele pea a tatou mea’ai.  Lelei.

Ae a silasila la i le fa’ateleina pea o tagata-aisi ma tamaiti fa’atau-oloa i so’o se magaala, fa’amata e mafua ona fai ona e leai se mativa?  

Ana le matitiva, fa’amata e fa’amalosia e feoa’i solo i magaala mo se tala? 

Silasila ane lava i tamaiti-laiti nei e feoa’i i magaala i le po i aso uma?  Fa’amata latou te faia lea tulaga pe ana fa’apea latou te le mo’omia? Fa’amata e una’ia e matua e faia ia tulaga ma ono afaina ai, pe ana le-matitiva?

O nai tagata nei ua leai lava se isi fa’amoemoe. E matua matitiva leaga-faia lava ua mafua ai ona fa’amalosia e fa’atino ia mea uma.  

E toe fai atu pea: O le mativa i galuega, mativa i ‘auala e maua ai tupe ma le mativa i avanoa, o le taunu’uga, o le mativa o le manava.

I se atunu’u e matua fa’alagolago lava i tupe, a leai sau galuega e maua ai se tupe, e mautinoa e te fia’ai. E au ina fia-a’ai lau fanau. O le taunu’uga lena. 

A o le mafuaga lena o le iai o tagata nei i magaala ‘ese’ese.

E le tatau lava ona galo ia tatou ‘upu a Pei Tauili’ili Reupena lea sa taua i aso ua mavae, o le mativa, o le ola-popole ma le le-tagolima, ua maliliu ai le to’atele o tagata i Samoa.  

 “O le mativa, o fa’alavelave mata’utia, o le ola-popole ma vevesi ole mafaufau, e i’u ai i le pule i le ola,” o lana saunoaga lea. “E le sagatonu ai le mafaufau ma i’u ina ta’afili ai ma faigata i tagata. Afai o e manuia fa’aleAgaga, fa’aleTino ma le mafaufau, e tumau lou ola fiafia. Ae afai e fa’alavelave tulaga ia ia ‘Oe ma taumafai e fuafua lou soifua, e o’o ile mativa, gasegase ma i nisi taimi, e manatu ai e pule i le ola.” 

O le tulaga lea na laga e Pei ina ua fesiligia sona finagalo, talu le to’atele o nisi na pule i o latou soifua e le’i mamao atu. Toeititi a le misia se vaiaso ma se pule i le ola i Samoa nei, i lena vaitaimi. 

O le fesili tele la, ‘aisea? Afai o sologa lelei le soifua i Samoa i nei aso, aisea ua pule ai tagata i o latou soifua? Aisea ua fa’ateteleina ai pea le fa’atautala ma sauaga i le lotofale? Aisea lava fo’i ua matua to’atele ai tagata ua faia lea mea o le solitulafono? Le gaoia? Talepe fai ma fao-mea? Gaoi mai a latou falefaigaluega? 

A silasila ia Samoa i le taimi nei, e moni ai Pei, ua matua ova le to’atele o tagata o lo’o ta’afifili ma fa’afitauli, ona o le taumafai lava e fa’atino mana’oga o le ola nei. O le fua-fa’atatau a Pei, e latalata i le 90 pasene o aiga Samoa o lo’o i se tulaga fa’aletonu, ona o le tau o le soifuaga, e maulalo totogi ma tupe-maua a o le to’atele o latou, o lo’o ola matitiva pea. 

 “O le mea tonu o lo’o tupu nei, o le fa’ateteleina lea o le va o le tagata maumea ma le tagata-mativa i Samoa. Pe na o le lima i le fitu aiga i Samoa nei o lo’o “i se tulaga manuia i tulaga tau-seleni”. Lea  latou te ta’ua, o ‘taumafaiga manuia’, a ‘ou te ta’ua, o se fa’aletonu.” 

O le a sou finagalo? E te ioe iai?

Fa’ataua lau palota!

Manuia lenei Aso Lua ma Fa’amanuia Le Atua!

01 March 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?