O LA’U TALA FO’I

19 August 2016

1. Matauina i Tala Fou finagalo faaalia o Meleisea Leasiolagi Polofesa Malama Meleisea e uiga i le nu’u o Sogi ma suli o Tama Uli i totonu o Samoa-ma o se manatu taua tele lea. O le taua o lea finagalo e pei lava ona silafia e le toatele o Samoa-o ia tagata poo matua o Tama Uli-e le’i o mai i Samoa i so latou lava loto faitalia-ae na aumai faamalosi e tagata Siamani a’o latou pulea Samoa-e galulue ia latou faatoaga. O ia la faatoaga pei ona silafia-o ni faato’aga tetele-ma sa matua manuia ai Samoa –e ala i le galueaina o le popo ma le koko-kofe ma isi laau uma!

O lea la ua o tagata Siamani-ae nonofo pea latou i Samoa nei-ma ua tala foi o latou gafa i tagata Samoa! Afai la o lea-o isi ua suafa matai i o latou aiga Samoa-galulue i galuega lelei faapea foi ma le Tala Lelei! Ae ia manatua foi-o se tasi o latou matua lea na toeitiiti lava a fasiotia sese (sisi) –ina ua tuua’ia sese……! A faitau mai la i le taimi o Siamani e o’o mai i le taimi nei-ua fia la tausaga o nonofo latou nei i Samoa? Afai la e le o ni tagata Samoa-aisea ua le aveina ia i latou ni sitiseni Samoa ia i latou e pei ona fai e le Malo i nisi tagata-ae le’i sisina so latou afu mo le manuia o Samoa!

Afai e ala ona taumafai le Malo e aveese nei tagata Samoa mai Sogi na ola a’e ai-ona o loo fia faatino ai se fuafuaga a le Malo-a faapefea la le afu liligi o nei tagata-na latou tanu ai lenei taufusi ma latou te nonofo ai? O se mea amiotonu lea i le silafaga a le Atua? O le a sou taofi?

ADVERTISEMENT

2. Matauina foi se tulaga uiga ese tau le talia o sitiseni poo tagata-nuu fou o Samoa-atoa ma se faaupuga o le a vave ona avea i latou ma matai i nuu o latou ta’ito’alua. O le tulaga uiga ese la o lenei faaupuga-e peiseai ua pule foi le Malo i aiga o ‘Samoa ma le faiga o latou matai.

E faapefea la pe a le faapena ona fai e isi aiga? Afai la o suafa matai o aiga e le o ni mea ia e faatau atu-aisea ua folafola ai fua e le Malo ia mea ia i latou ia ua avea nei ma sitiseni-ae latou te le pulea matai o aiga? O lea foi la ua aliali mai-e o’o lava i mea e na o aiga e pule ai-o lea foi ua folafola e le Malo-e faasese ai sitiseni fou ia ua fai. E manaia foi le manatu o le Palemia i se tasi itu-ae maumau pe ana ave muamua i nuu ia e matai ai -e faata’ita’i ai ana fuafuaga. O lea la ua mautinoa nei-ua matua pule aoao lava le Malo i mea uma a le atunuu! O le a sou taofi? 

3. Matauina foi ma le faanoanoa le maliu faafuase’i o se tama’ita’i tausaafia ma le logologoā i le itu tau tusitala o tala fou ma faasalalauga faalaua’itele i le ‘ea e pei o le Leitio ma le Televise-o Tofilau Merita Huch. O taimi uma ta te feiloa’i ai i lea tamaitai-e te alu atu ma se faafitauli-ae tali mai i le ata-ma le fautuaga i ni upu uiga ese ma le lu’itau-o ana upu masani-“Se alu e fai e te le oti ai?……” O ona uiga ia e faigata ai ona faagalo ona foliga –ma e te fesili ai pe faamata o i ai se isi tagata faapenei!

O se tamaitai e te alu atu ma lou manatu o se uo mafana e te fia maua mai ai se faatuaga-ae saunoa mai e pei o so ta tina moni! O ona uiga ia e faigata ai e ana paaga ma le toatele o le atunuu ona faagalo-leaga e amulī ona aumai sana tali-ae ua ta malie lelei ma talitonu i lana fautuaga! O le pogai lea e fesili ai nisi pe aisea lava ua valaauina ai tagata lelei ae tu’u le ‘au-faaletonuga? Ae paga lea-fai mai le Tusi- e le o so tatou tofi lenei lalolagi-ae o le Lagi o loo i ai lo tatou nuu moni!

Ia manuia tele lau malaga Tofilau-ma ia faamaise atu le Atua i le Aiga faanoanoa! O le a sou taofi?

19 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?