Tusi e fa’alaua’itele ai le malamalamaaga o Samoa

DT
By Deidre Tautua, 19 February 2018

E sefulu afe ni tusi ua fa’aulutalaina, “A’oa’o ina ia A’oa’oina” ua foa’i atu nei i le Matagaluega o Aoga, Taaloga ma Aganuu e se fa’alapotopotoga ua ta’ua o le Applied Scholastics International Organization I Amerika i le vaiaso na te’a nei.

O lenei foa’i sa fa’atautaia lea i le Ofisa autū o Aoga i Malifa ma sa auai atu ai le ali’i palemia, Tuilaepa Sailele Malielegaoi ma le Minisita o Aoga, Ta’aloga ma Aganu’u, Loau Keneti Sio.

O le sui mai le fa’alapotopotoga i Amerika Warren Meyer sa taua’aoina atu nei tusi.

“O lenei fa’alapotopotoga sa fa’avae mai i le tausaga e 1972.

“E o’o mai i le taimi lenei ua mafai e leni fa’alapotopotoga ona fesoasoani i tagata e ova atu ma le 60 miliona ma gagana eseese e 20.

“O lea fo’i ua mafai ona o’o atu tautua a lenei fa’alapotopotoga i atunu’u e 109 ma o Samoa e lona 110 i ai atunu’u ua matou mafai ona fesoasoani i ai i le itu tau a’oa’oga.”

Sa ta’ua e Meyer o le latou fa’amoemoe autu o le a’oa’oina lea o faiaoga, matua, faipisinisi ma so’o se tasi lava e mafai ona latou a’oa’o atu i isi.

“O se tekonolosi sa mafai ona su’esu’eina ma fausiaina e se tasi o Tusitala, faiaoga ma le fesoasoani alofa ale ali’i o Ron L Hubbard.

“O tekonolosi i le tulaga lea e le’o fa’asino i ni masini komipiuta po’o so’o se auala fa’atekenolosi i nei onapo, ae o lo’o fa’asino i le faia lea o ni su’esu’ega e mafai ai ona fa’aoga e fesoaosani i tamaiti aoga po’o tagata matutua e su’esu’e ma a’oa’o so’o se mataupu.

“O le suega lea i lalo o le su’esu’eina o so’o se itu i le tulaga lea o lo’o misi i le itu tau a’oa’oga i nei onapo.

“O le toa’tele o tagata Samoa ua lava le a’oa’oina ma fa’atupula’ia galuega fa’atino ma o le itu tonu lava lea o lo’o aumaia e le a’oa’oina ina ia a’oa’oina.” 

ADVERTISEMENT

Sa fa’afetaia e Tuilaepa le lagolagosua mai a lenei fa’alapotopotoga i le itu tau a;oa’oga a Samoa.

“O le tasi lenei vaega e ave i ai le fa’amuamua ale malo o Samoa o le itu tau a’oa’oaga ma ua fetaui tonu lava ma le meaalofa ua foa’ina i lenei aso o ni tusi e 10,000.

“I le mae’a ai o le asiasiga sa fa’atautaia ina ua mavae atu le afā o Gita, o lea ua mautinoa e le malo aoga ia sa a’afia tele ona o le ma’ema’ea o Gita e ala lea i lologa ma le tetele o timuga ma ua fa’aleagaina uma ai meatotino i totonu o potuaoga fa’apea ai ma tusi faitau o lo’o fa’aogaina i le a’otauina o le fanau.

“O nei tusi e taua tele mo fanau aoga e le gata I le fanau aoga ae faapea foi faiaoga.

“Latou te silasila i ai ma atili iloa ai ona a’oa’o pe afai e le lava ma atoatoa metotia i le aoaoina o fanau a Samoa.

“Aoa’o ina ia a’oa’oina o le ulutala lea o le tusi ma o se itu ua masani ai tatou ma ua tatou iloa fo’i o le a’oa’oina o se itu faigata tele mo le tagata a’oa’o.

“Ia manatua fo’i o le tulaga o lou a’oa’oina e faigata, o le fa’aaogaina o le tulaga o lou a’oa’oina e le faigofie i taimi uma.

“Aisea? O le tali o lena fesili o le a mafai ona maua atu i nei tusi ma metotia e fesoasoani ai i le fanau aoga ina ia manatua e aoga le a’oa’oina.”

Sa ia fa’afetaia Meyer ona o lona taua’aoina mai o nei tusi.

“Ou te talitonu o le a aoga nei tusi i le fanau aoga, ma o le a fa’aaoga lelei fo’i e le matagaluega o aoga.

“O le mea moni lava, o le a’oa’oina ina ia a’oa’oina ma le alualu i luma o le atamai o le ki lea o le manuia i le lumana’i.

“E tatalaina ai faitoto’a i le lalolagi, o le malamalama ina ia tafe atu ma e mautinoa lava e fa’atupuina ai le fia’ai e le aunoa mo se malamalama atili i le mafaufau o se tamaititi.

“O lea e fa’afetaia ai lau susuga ona o nei tusi ma avatu le agaga fa’afetai i le fa’alapotopotoga ona o le manatu mai fo’i mo le alualu i luma o le itu tau a’oa’oga a fanau a Samoa.”

DT
By Deidre Tautua, 19 February 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?