Tima’i le Palemia i le Minisita
O le fa’amalosi a le afioga i le Alii Palemia o Tuilaepa Sa’ilele Malielegaoi i le Minisita o Falepuipui, Tialavea Hunt ‘ia onosai aua e le faigofie le galuega o lo’o ua fa’atinoina nei i Tanumalala’
“E pau le mea i le minisita a leoleo ole onosai e le faigofie le faaiuga lea, e le se faaiuga faigofie ma o le tele o atunuu o le toe ave le falepuipui se isi nofoaga e le faigofie,” o lana saunoaga lea.
“Ae fa’afetai le minisita o loo ua i ai nei i le mamao le fa’atofalaiga, aemaise le matagaluega o tupe.
“ E le se mea matagofie le lotolotoi o pagota le mea e alala ai le to’atele o le mamalu o leatunu’u ma o le puipuiga o tagata ua ala ai ona ave i o, e toe maua mai lava e leoleo e le’i oo i tai.
“O le fausaga, o se matua’i fausaga lava faaonaponei ma e sili atu la ona maoae le fausaga ua i ai nei. “Ua lelavava le malo e faafeagai ma nei tama’i fa’afitauli aemaise o mea o pagota ua i ai le agaga e sola.
“Ia sei vaai le isi kokemi lea e toe tasi le aso magalo ae sola, o loga uiga o le faiai o le kamai pusi lae le faiai le ga pagoka e pau le mea lae le faiai e koe sau e koe fai isi soligakulafogo.
“Ia e aumai lava e le Akua auala o le iuga ole kagaka, o loga uiga aga sei gofo le alii lea sei magalo le kasi le aso, e koe sau koe fai mea ua masagi ai, fai mai pese a le Kaiki e le kukupu fua mea faapega!
I ripotu talu ai, na fa’ailoa ai le agaga fa’anoanoa o le Fa’amasino Sili i a Patu Tiava’asue Falefatu Sapolu ona o le le mafai ai lea ona tula’i i luma o le fa’amasinoga o i latou o lo’o i lalo le va’avaaiga a le falepuipui i le taimi lenei i le tele o fa’amasinoga.
Na ia fa’ailoa o se fa’afitauli e ao ona silasila lelei i ai i latou o lo’o va’ava’ai nei tulaga uma ina ai aua nei toe tula’i mai i le lumana’i aemaise ai le ono poloka ai o galuega fa’afa’amasinoga.
Sa ia fesiligia foi latou o lo’o gafa ma lea vaega e fa’atatau i lea tulaga ae na o latou ta’ua o lo’o fa’atali pea ma e le’i taunuu atu lava.
E aofia ai i a’i latou nei e tatau ona tutula’i luma le fa’amasinoga Uili Sa Manuleleua lea o lo’o tausailia e o’o mai le taimi lenei e leoleo.
Ina ua fa’afeso’tai le Matagaluega o Falepuipui i lea tulaga, na saunoa le Komesina Lalolago i a Ulugia Niuia Aumua sa i ai nisi o vaega na tuatuagia ai le ofisa ma e pei o lea le mafua’aga na fa’atuai ai i le Ofisa o Fa’amasinoga i latou na tatau ona tutula’i.
Na ia ta’utino foi o le a silasila i ai ma fa’amautinoa mai le le toe tulai ai lea o lea tulaga i le lumanai.
O loo fautuaina e Leoleo le mamalu o le atunuu ina ia tagai lelei ane mo le alii ia Aniseko Vaeli ma Uili Manuleleua.
Sa faafesoota’i e le Samoa Observer le Sui Komesina o Leoleo o Falepuipui ma faailoa mai e le afioga ia Ulugia NIuia Aumua e faapea ona nei taule’ale’a na sosola i tua ma le Toese i Tafaigata i le Aso Lulu.
E o’o mai i le taimi nei o loo sailia pea e Leoleo Uili Manuleleua.
O ia nei e atoa ai le toafa oi i latou na sosola ese mai le Falepuipui lea e aofia ai Lauititi Tualima ma Vaioa Solia.
Ua tuuina mai ai foi ma se fautuaga mai ia Ulugia mo le lautele o le atunuu ina ia nofo mataala aemaise ia lagolagosua atu i le galuega o loo taumafai iai e ala lea i le sailia o i laua nei e toalua.
Fautuaina foi e le afioga i le sooupu o le Matagaluega o Leoleo, Auapaau Logoitino Filipo le atunuu ina ia aua nei taliaina lenei taule’ale’a pe taumafai e talanoa iai mo le saogalemu.
Ma a silafia e se tasi se faamatalaga i le nofoaga o loo iai nei pagota e toalua faafeso’otai le Ofisa o Leole I le numera 22222 pe valaau sa’o i le 911.
O lo’o faia pea sa’iliiliga a leoleo i se osofaiga i se tasi o aiga i Ululoloa lea na osofaia e nisi na sosola mai le falepuipui talu ai e aofia ai ma Lauititi.
O Lauitiiti Tualima na ‘a’afia i se tasi o osofaiga mata’utia i le La’au Tutasi ina ua ia saiasaia se ali’i palagi ae ia fa’atinoina ni faiga matagā i lana uo tama’ita’i mai Ausetalia i le 2015.
Na saunoa le So’oupu a Leoleo o le taimi lenei o lo’o galulue pea ina ia tulimata’ia vaega uma mo le puipuia o le mamalu lautele o le atunu’u.
Na ia ta’ua foi olo’o i ai su’esu’ega i nisi o aiga na osofa’ia lava ma o lo’o tulimata’ia pea o i latou nei.
E aofia ai i ‘aiga o a’afia se tinā lea e le’o mana’o e fa’ailoa mai lona suafa ma na maua le avanoa e fa’ailoa mai ai lea tulaga.
Na ia ta’utino o Lauititi sa i totonu o lona potu.
“Na ia fa’alagolago mai i a te a’u ma tule’i a’u aga’i le moega, na ia fa’afefe a’u ma nofo tatu’i o’u foliga,” saunoaga a le tinā
“Sa taumafai lava ina ia ou to’a lelei ina ia mafai ona fa’ato’a filemu mea uma aemaise o lo’u popole i si a’u fanau i tupu ai se fa’alavelave.
“Na ou fai atu i ai e tago e ave la’u telefoni ma va’ai la’u ato tupe e tago e ave, na ona ia maua lava o la’u telefoni alu loa ma le atoa.
“Na ou fa’apea ai na’o Lauitiiti sa i lo’u fale ae ou iloa mulimuli ane sa i ai ma le tasi ali’i pagota.
Na ia ta’ua lona fa’afeso’otaia ai lea o leoleo ma na vave ona o’o atu le fesoasoani ma maua ai meatotino na to’esea.
“I a te a’u lava ia, e le saogalemu le atunu’u i nei tagata ma e tatau ona fai se fuafuaga talafeagai mo Lauititi.
“Ou te iloa e faigofie lava ona osofa’i lo matou fale ona e latalata tele i le falepuipui.
“O le taimi lenei ua i ai mea pueata fa’alilolilo ma nisi o tulaga aua lava le saogalemu o lo matou aiga.
O lo’o ua matua’i fautuaina le atunu’u ina ia fa’afeso’ota’i le ofisa leoleo o lata ane, 22222 po o le 911 pe a iloa i latou nei i so’o se vaega o le atunu’u ae aua ne’i latalata i ai.
I nisi o ripoti e fa’atatau lava i a Lauititi na fa’ailoa ai o se tagata solitulafono aupito i mata’utia o Samoa.
I le masina o Iulai 2016, na tula’i ai Lauititi ma faia sana faato’esega puupuu i luma o le Alii Faamasino o Lesatele Rapi Vaai ina ua tula’i o ia mo lona faasalaga e tusa ai ma le osofaiga o le ulugalii mai Ausetalia ma le toso faamalosi o le tamaitai Ausetalia lea sa fai malologa mai i Samoa i le tausaga, 2015.
“Ou te faato’ese ai e tusa ai ma le mea na ‘ou faia, “ o lana faaaliga lea. “Ua ‘ou sese ma ua ‘ou matua lagona lo’u faanoanoa. Ou te talia soo se faasalaga e tuuina mai e le Faamasinoga.”
Na tolopo e le Alii Faamasino o Lesatele le faasalaina o lea alii se’ia aulia le aso 19 o Aokuso 2016-ina ia tuuina atu ia te is se taimi e Iloilo ai talosaga na tuuina atu mai le Vaega o Moliaga. Ae peitai-na ia faaalia e faapea o loo sailia e le Ofisa o Moliaga a le Malo se 20 tausaga faaopoopo o le faasalaga tau falepuipui mo lenei pagota e mata’utia le sola soo i tua.
Na ioe Tualima i lona nofosala i tuuaiga e tolu tau le toso teine, tasi le moliaga o le gaoi, tasi le moliaga o le fao mea, ma se moliaga o le tau faamata’u e fasioti ma le isi tau le faa-auupegaina i se ‘auupega mata’utia. O ia moliaga uma e faasino i le osofaiga o se ulugalii mai Tasemania i le Lupesina Treesort i le aso 24 o Setema 2015.
E tusa ai ma le otootoga o faamatalaga moni, na o faatasi Tualima ma Leoleo o le Falepuipui i le falema’i i le aso 23 o Setema 2015-ma o le taimi lea na mafai ai ona ia sola ese. Na ui atu o ia i Tiavi-lea sa nofo ai mo le aso.
I le faagasologa o taimi amata o le isi aso, na ia talepe ai se potu sa nofoia e ni turisi ia e tatau ona pu’e le la malaga i le vaalelei e toe foi atu ai i Ausetalia i lea taeao.
O le tama’ita’i na ‘a’afia ai o Angie Jackson.
E tusa ai ma ripoti fai mai na sauni Angie e taele ae o le taimi lea na ia vaaia ai Lauititi o lo’o ia umia se seleulu ma faafefe ai na te fasiotia o ia pe afai e faataiŏ.
Na tapā e Tualima se tupe ma la telefoni fe’avea’i ona la ave lea ia te ia mea sa na mana’omia. Ae peitai-sa le faamalieina ai o ia.Ona ia saisai lea o le ulugalii ma toso faamalosi le tamaitai a’o tilotilo atu si ona to’alua.
O ola o lea ulugalii sa mafai ona faasaoina ina ua siaki e le Pule o Treesort i la’ua –talu ai ua la tuai le la taavale la’upasese i le malae vaalele. Ae mo Tualima, sa mafai ona ia sola ese i lea po ma nisi o meatotino a le ulugalii.
O le Aso 5 o Oketopa 2015 na toe pu’e ai Tualima. Ina ua fesiligia e uiga i lea osofaiga, na ia ta’utino e faapea o ia na faia, o faamatalaga otooto ia a Leoleo.