Fia fa’ataunu’uina miti a le tina mo lona aiga

AL
By Aruna Lolani, 20 April 2017

E le taunu’u ni miti pe’a fai e te le galue.

O Merita Fa’ivalu, o ia lea o se tina e tele ana miti mo lona aiga ma o le mafua’aga lea ua sa’ili galuega ai o ia.

O Merita, e 28 le matua o lona soifua mai le nu’u o Falefa ma sa ia ta’ua i le Fofoga o Samoa i le aso ananafi, i le faigata o le olaga pea leai se galuega.

“O lo’u to’alua e faifaiva. E iai a taimi e lelei ai le tupe maua mai ai, e iai fo’i taimi e leaga ai. O isi a taimi, e leai se matou tupe maua.

“O le matou aiga o se aiga atia’e ma ou te mana’o a a’u ia ou te galue ina ia maua faigofie ai mea e fai ma fa’ataunu’uina ai le tele o a’u miti e faia mo latou.

“Ae peita’i, ua o’o a i le su’ega o le galuega ua le toe faigofie.

O Merita o se tina e to’afa lana fanau ma o le tasi o ona alo o lo’o a’oga nei.

Sa ta’ua fo’i e Merita e leai se latou ia vai, e leai fo’i se latou eletise ma o le taimi nei, o lo’o fa’aola mai le latou eletise mai nisi o ona aiga e latalata ane, ma e totogi fo’i.

ADVERTISEMENT

“O le vai a le nu’u e aumai ai a matou vai, e mamao atu ma le matou fale.

“Ia o se va’aiga fo’i i le matou fale nei, lea e tau atia’e atu i se tulaga lelei.

“O lo’u mana’oga o le maua a o tupe mai sa’u ia galuega e fa’atino ai mea uma ia aua ou te le mana’o e fa’alagolago atu i isi tagata.

“O le mafua’aga lena o lo’o ou sa’ili galuega ai, e lelei fo’i lenei taimi aua o loua iai le tama o le aiga e va’aia tamaiti.

“O lea a la e sa’illi ma e le’i maua a se laki.

“E mana’omia a le galuega i lenei vaitaimi aua ua tele mea e tatau ona fa’atupe e pei o mana’oga o le fanau, o le fa’aolaina o le vai fa’apea fo’i le eletise, ia aemaise fo’i le tau atina’e ina o le matou fale ina ia maua se va’aiga matagofie aua o le taimi lenei e le fa’asimaina, e fola i ma’a.

“O vaitaimi nei, o le tupe e tautala. Ae e le galue, e te tumau a i le nofoaga o lo’o e iai.

“O a’u o se tina e tele miti e fia fa’ataunu’uina mo lona aiga ma e leai se mea iai pea ou afu i lo’u galue ina ia taunu’u ia miti.

Sa fa’apea mai Merita o ia e lelei i so’o se galuega, pe iai fo’i ni ona itu e vaivai ai, o ia o se tagata e le fa’avaivai.

“Ua tele a o mea e fa’atupe ina ma o le mafua’aga na e tatau na e galue ai.

Samoa, a e fia fesoasoani ia Merita, o le numera e maua ai o ia o le 7729598 po’o le 7748732.

AL
By Aruna Lolani, 20 April 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?