O fesuiaiga i le olaga i totonu lava o nu’u

FT
By Fetalai Tuilulu’u, 20 April 2017

E ui ina tele fa’afitauli ma faigata e tutupu i le olaga, o le finagalo o le tamā ia Fia Petelo e 54 tausaga mai le afioaga o Luatuanu’u, e sili lava le aiga moni e maua ai le filemu. 

Na fesiligia le tamā ia Fia mo sona finagalo i le tulaga o iai le olaga i Samoa i lenei vaitau ae na ia fa’aalia ai, e ui lava ina tele fa’afitauli, o lo’o maua pea le ola filemu ma le ola lelei i Samoa. 

“O le olaga lenei e le ‘asa lava ma ni fa’afitauli ma faigata,” o lana fa’aaliga lea. 

“Ae o lo’o maua lava le to’afilemu ma le nofo lelei o aiga.

“O tua inei, o se tasi lava o fa’afitauli o lo’o feagai ma aiga, aemaise lava nai aiga o lo’o tau atia’e ma lima vaivai, o le utiuti lea o le tala tau seleni. 

“E iai lava taimi ua le lava ai le fa’asoa.

“Aemaise lava le tausiga o fanau. Fa’afetai lava i lenei taimi ua tu’ua ai aoga a le fanau, o le a le popole foi i se tupe e ave ai fanau i le aoga. 

“Ae o le isi na tulaga e atugalu ai ma tinoū e galue, o le sa’iliga o tupe e fa’aaoga ai le fanau.”

Na ia ta’ua foi, o le vaitau lenei, ua fai lava si tele vave o suiga o le olaga, ma ua fa’ateleina ai le faigata o le olaga. 

“E le fua tasi foi i se aiga lea tulaga. O tagata uma e tau fai sa’ili auā se manuia o aiga ma fanau. 

ADVERTISEMENT

“E pei o le tulaga lava lea e tuli mata’i e le to’atele, o le saili lea o tupe auāle tausiga o aiga ma fanau. 

“E tau fai galulue uma ina ia maua ni manuia ma maua se mea e tausi ai le aiga aemaise o mea e fai i totonu o aiga, nu’u ma ekalesia.”

O le tamā ia Fia, o ia lea o lo’o faigaluega i le vaaiina le pa povi i Afiamalu ma maua mai ai se seleni e tausi ai lona aiga ma lana fanau. 

E ui foi lava ina maua nai seleni mai lana galuega, ae na ta’ua e Fia, e le taitai ona lava lea mo le tausiga o si ona aiga. 

“O la’u galuega lava e fa’amoemoe iai si o matou aiga.

 “Ia e ui foi lava la ina ua malolo aoga a le fanau o lenei kuata, ae o lea foi e va’ava’ai atu i lea fo’i kuata o loma i meaaoga ma fa’atupu ai sina tupe.  

“E laki lava e le’o to’atele ni tagata o si o matou aiga, ua na’o ma’ua lava ma le tina o le aiga ma le fanau.”

Na ta’ua foi e Fia, o lona fa’ato’aga koko le isi atina’e o lo’o fesoasoani e maua ai se seleni mo lona aiga. 

“O le isi lena tulaga o lo’o fesoasoani e maua ai ni seleni aua foi le tausiga o si o’u aiga.”

Peita’i, na ta’ua e Fia, e ui lava o lea, e le taitai aveesea ai lona agaga o le nofo pea i le nu’u na tupu ma soifua a’e ai. 

“Ua masani lava le ola i tua nei i si o matou nu’u.

“O le ala foi lea po’o le a lava le tulaga e iai, ou te fiafia lava a’u ia iinei auā o lo’o maua ai le filemu ma le fiafia aemaise o le sa’oloto auā o lo’o nonofoa lava i o matou lava fanua ma ele’ele.”

FT
By Fetalai Tuilulu’u, 20 April 2017

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?