Fa’asoa ina ia manuia fanau

IL
By Ilia L. Likou, 15 April 2018

O le vaiaso lenei na fa’ataunu’uina ai se fonotaga a Pule Aoga ma Sui Pule Aoga a le malo mo Aoga Tulaga Lua ma Kolisi Maualuluga.

O le fonotaga na fa’atalanoaina le tele o vaega e ao ona toe silasila ai i latou o lo’o ua ta’imua i vaega nei tau a’oa’oga ina ia una’ia pea fanau aoga.

I se tasi o fonotaga talu ai aua le una’ia o tusitusi ma le faitau tusi a le fanau na saunoa ai le Minisita o Aoga i a Loau Keneti Sio i le aoga tele o polokalame e le gata mo faiaoga, o pule aoga ae silisili ai le fanau ma le una’ia o lo latou ola a’oa’oina.

“E pei ona faalauiloa atu i nisi o fonotaga ua maea a la tatou Matagaluega, ua i ai nei le faamoemoe ia faia ni suesuega i aoga tulagalua sei mataitu ai ma maua se ata o tomai ma agavaa o fanau, e le gata i le faitautusi, tusitusi ma le numera ae faapena foi le Mataupu saienisi i le Tausga 6, ma mataupu e 7 o lo o aoaoina i le Tausaga 8.

“O le curriculum lea ua iai nei mo aoga tulagalua e pei ona outou silafia, na amata lona faatinoga i le tausaga 2012/2013 – o lona uiga ua tatau ma onomea ona faia ni fuataga ma suega e maua ai ni faamaumauga ma faamatalaga o taumafai o fanau, ia faatasi ai ma galuega faatino a susuga i faiaoga.

‘E tele ma anoanoai tulaga taua ma aoga ua fai ai lenei fuafuaga, ma ua tele foi fonotaga ua faaleo ai finagalo i mataupu tau suega ma fuataga

O le auga lava ma le faamoemoe ia siitia tomai ma agavaa o fanau. O ni isi o vaega o loo faataua ma tulituliloa i lenei faiga fou e aofia ai vaega nei:

(i) Ia maua e aoga taitasi alafua ma taiala e limataiina ai le fatinoga o fuataga i totonu potuaoga (classroom based assessment);

(ii) Ia maua e faiaoga tomai ma agavaa e faatino ai lava e i latou iloiloga o iuga o fuataga (analysis of diagnostic tools) mo a latou fuafuaga mamao ma galuega faatino talafeagai. E le gata i lea ae ia maua le tomai efofo ai vaivaiga (diagnose) ina ia manino tomai ma agavaa e fia ausia;

(iii) Ia maua e le Matagaluega se ata/faamaumauga manino o le tulaga o loo i ai aoga taitasi i le aoaoina o mataupu (curriculum) i tausaga taitasi, e tapena ma faatonutonu lelei ai fesoasoani talafeagai mo aoga;

ADVERTISEMENT

(iv) Ua faatupulaia pea le taua o tomai ma agavaa i mataupu tau saenisi aemaise lava i lenei vaitau ma suiga faa-tekonolosi ma faafitauli o le soifuaga e pei ona i ai le siosiomaga ma nisi o vaega e taua ai le faaaupegaina o fanau i tomai ma agavaa faasaienisi.

(v) Ua matauina foi le le fiafia o fanau e filifilia lea mataupu, ma e ono tulai mai ai se tulaga faaletonu i le leai o ni isi e iai tomai faapitoa e fesootai ma lenei mataupu. (faataitaiga; fomai, inisinia ma isi).

(vi) Ia i ai se suega e iloa ai tulaga o tomai ma agavaa ua ausia e fanau i le maea ai o aoaoga i Aoga Tulagalua a o le i ofi atu fanau i le isi laasaga o aoaoga.

(vii) Ua tele faatalanoaga e aumai ai fautuaga mai le mamalu o Uluaoga ma faiaoga ina ia i ai se suega e fesootai ma galuega o lo o faatino i poto aoga. O la latou mau, o le suega lea o loo faatino i le taimi nei (Aptitude Test) e le o mafai ona iloa tonu ai le iloa e fanau o mataupu aoaoina i le tausaga. E faapena foi le oo atu o fanau i Aoga Maualuluga ona e leai ni faamauamauga poo ni iuga o suega e faailoa ai le tulaga o lo o iai le taumafai o fanau.

(viii) O le faatinoga o le suega fou mo le Tausaga 8 e tau saili ai poo fea tonu le vala o le laasaga o aoaoga o fanau, ia ifo tonu le fuiniu i le lapalapa aua ni fesoasoani talafeagai mo le faaleleia o aoaoga.

“A o le i uma atu se faamatalaga, avea lenei avanoa e faamalo atu i aoga ua lautogia i se tasi o polokalame a le tatou Matagaluega lea ua taua o le SSILNaS – Samoa School Innovation for Literacy, Numeracy and Science.

“ Afai e lei faamanuiaina lau aoga, ia toe taumafai mai i isi polokalame a le tatou Matagaluega mo le atinaeina o tomai o fanau i le faitautusi, tusitusi, numera ia faapea ma le saienisi.

“ E fautua atu foi, ua taulamua lava a outou susuga ma faiaoga i le faatinoina o a outou polokalame ina ia auai ai matua ma tagata uma o afioaga ma alaalafaga. O le lelei o aoaoga e faamoemoe i le galulue faatasi o tagata uma.

“Ia le mamalu e o susuga i Uluaoga ua tatou faatasi i lenei taeao, o le tatalo a le tatou Matagaluega e le manuia nei tapenaga uma pe a tatou le galulue faatasi.

“ O au o matua fanau, ma o le talitonuga lea e faavae ai a tatou faiga filifiliga uma ma le faatinoga o o tatou tiute.

 “Tau ina ia alofa mai le Atua, ia ‘au o manū lo outou feagai ai ma le faiva o le a’oa’o atu. 

“O le manuia o fanau mo a taeao o lo o i o outou aao. 

“Sema so tatou ‘ai aua galuega o totoe o lenei tausaga faaleaoaoga. Ia maua so outou malosi aua le faatautaiga o sa o ā’oga taitasi a o tātou folau ai i lenei tausaga.

IL
By Ilia L. Likou, 15 April 2018

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?