Fia maua se galuega

By Ulimasao Fata 23 December 2017, 12:00AM

O le olaga ua o tatou molimauina nei i Samoa ua fai lava si taugata ma le faigata. E tasi lava le auala e mafai ai ona foia pe tau tu’uitiita ai lenei faafitauli o le sailia lea o se galuega.

O le talitonuga lea o le taule’ale’a ia Aeti Tulafono, 26 tausaga le matua mai le afioaga o Faleasiu-uta.

E maua atu e le Fofoga o Samoa o loo agai atu e asia lona maumaga i le taeao ananafi.

Na taua e Aeti o le faigata ona o loo iai lona aiga o loo faalagolago atu ia te ia mo le tausiga aemaise foi nai ou matua.

“O au ua ou fai aiga ma e toalua la’u fanau ma o loo matuai faalagolago mai lava ia te au mo le tausiga”.

“E toatasi le tagata o le matou aiga ua faigaluega i le taimi nei ma o lea ua fesoasoani malosi mai ia te au I le itu tau le seleni ae o au o loo ou galuega malosi lea I lau faatoaga”.

Sa ou faigaluega muamua ae peitai ua ou le toe faigaluega.

“Na mafua mai lea tulaga ona e leai se tasi e nofo i le fale e fai feau masani o le aiga ae maise le tapenaga o le gasesega o taumafa mo lea aso ma lea aso.

“O le ala lea ua oulua maua mai ai au o loo agai atu foi i lau maumaga.

Na ia fa’ailoa le tele o le suiga ua i ai nei le atunu’u.

“O Samoa lava ia ua tele lava suiga ua o tatou maitauina ua le gata i le agai i luma o le soifuaga ae ua molimauina foi le agai ai i luga ma tau o oloa o loo maua i faleoloa.

“Ae ua atili taugata ai lava ai le soifuaga ona ua tele lava suiga i Samoa.”

“Avatu faafautuaga atu ai foi tupulaga talavou ina ia faaaoga tatau le taimi ma ia aua le nofonofoa’i ae saili galuega aua le tausiga o latou lava aiga.”

“O le toatele lava e oo lava i le faiaiga ae ia oo atu i lena vaega ua iai se galuega o le a tua iai aua le tausiga o le aiga.”

“O le ala foi lea ua ou toe saili galuega ai ina ia mafai ona fesoasoani tele i le tausiaga o  ou aiga tau atinae ma nai ou matua. 

“Aua o le taimi nei e le faigofie ona e toatasi lava le tagata o loo faigaluega I lo matou aiga.

By Ulimasao Fata 23 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>