O LE MAFUAGA O LE IGOA O MANU SAMOA-Mai le Tusi o le “Suaga a le Vaatele”

14 August 2016

O le ulugalii o Muamai ma Mulimai na malaga mai Fiti i aso ua mavae. Na taunuu le malaga i le Faasaleleaga i le nuu o Vaiafai -ma tali lelei ai e le Alii o Tagaloa Funefe’ai. Fai mai le tala-na o mai lea ulugalii ma aumai le la manulele i totonu o le Faga.

O le tolotolo i Vaiafai e igoa o Utufia-sa feiloa’i ai lea ulugalii ma Tagaloa Funefe’ai-a’o tu lona Malo i ia aso. Sa apatā lea manu ma sausau fia lele, ae fai atu Tagaloa-“aua ne’i tatalaina i fafo le lua manu-ne’i fasi mate e manu o Samoa-leaga o manu o Samoa-“e na ona laiti ae fe’ai.”

Ona maua ai lea o le upu-“Ua sausau fia lele le manu na i Utufiu.” E vaai atu le fafine o Mulimai-ua felelei mai manu o le inafo-ona nofo lea ma tatala i fafo le la manu-e aunoa ma le iloa e lana tane o Muamai. E le’i umi-ae vaai atu le ulugalii-ua fasi tele e manu o Samoa le la manu-ma ua mate ai lava.

Ona ita ai lea o Muamai i lona to’alua “se fesili ‘ea Mulimai ia Muamai.” O le pogai lea o le upu ua avea nei ma muāgagana-“Fesili Mulimai ia Muamai.” O iinei foi na maua ai le igoa “Manusamoa.”

Ina ua usu Punaoa i le afafine o Tagaloa Funefe’ai ma maua ai le tama ma le teine, o le tama lenei na faaigoa o “Manusamoa”-ae faaigoa le teine o “Tautiapagofie.” O Manusamoa, o le tagata soifua ae le o se manulele, ma o le “Toa Magumagu”-sa tupu a’e i totonu o Falealili.

O lona loto tele ma le toa-e le o se mea na maua pe na a’oa’oina mai se isi. O ia lava o le Toa i lona fanau mai, ma e tupuga mai ia Lealali-o se tasi o Toa iloga o Samoa. O le aiga foi o Lealali-o tagata totoa. E aoga tele pe afai tatou te mitamita i lona gafa faata’oto e faamaonia ai le moni o le mau-o “Manusamoa o le Toa o Falealili.”

Usu Lealali ia Malelegaaleto’elau le alo o Tuisafua faae’e le gafa o Tupa’imatuna, Tupa’ilelei ma Tapaisiva. Usu Tupa’imatuna ia Laufafaotoga faae’e le gafa o Taua, Utu, Legaaletuitoga ma Liliolelagi.

ADVERTISEMENT

O Liliolelagi lenei e lua ana usuga i Falealili, ma o le ala lea na to ai lona fale i Satalo-ma maua ai le igoa o le itumalo o “Falealili” (Fale o Lili). O lana usuga muamua ia Fanuaalemoa le alo o Tuigate’i-lea e faasolo mai ai pea lea laina se’ia pa’i mai i le tama o Punaoa- lea na usu ia Taupifagalau le alo o Tagaloa Funefe’ai ona maua ai lea o le tama o Manusamoa ma le teine o Tautiapagofie.

Ona faasolo mai ai lea se’ia o’o mai ina maua Alalagafa ma le Nofo a Tulafale. O lona lua o usuga a Liliolelagi o le tamaitai Tafatafa na maua ai le teine o Sinalesoata. Usu Tuisamoa ia Sinalesoata ona maua lea o Sinalepuia’i ma le tama o Gege, lea sa avea foi ma Toa ta’uta’ua o Falealili-lea sa fefefe uma ai aitu o le Atu Samoa.

O le usuga foi lenei a Liliolelagi na tau ai lona gafa ia Fanene ma ona Alo ma faasolo atu ai lava i le Tama-a-Aiga o Tupua Fuiavailili-le atalii o Fuimaono i Salani. O Manusamoa lenei na aapa i ai Malietoa Tuilaepa ina ia alofa ma fesoasoani mai -se’i fasi ona fili.

O le talatuu e faapea-o le upu a Manusamoa na fai ia Malietoa-“a tusa ai ma lou finagalo-tau lava ina tusi lou a’ao i lou fili.” O le malaga atu o le Manusamoa i le taua e pei ona manaomia ai e Malietoa-na pogai ai le Mavaega lauiloa o loo ta’ua so’o e failauga.

O le mavaega lea na i le Falepunaoa a Manusamoa ma lona tuafafine o “Tautiapagofie”-“Sau ina alu-“O Manū ta te taumavae ai, o manū fo’i ta te toe feiloa’i ai.!” E faapea le tala-ina ua amata ona faasaga Manusamoa e fasi fili o le Alii, sa faate’ia Malietoa i le togi ane o lea vaega ma lea vaega o itutino o ona fili ta’ito’atasi, ma e leai se fili na totoe-ae na fasiotia uma lava.

O le Toa ma le Tautua –toto a Manusamoa-na malele ai le Malietoa-“Ua ta fia Falealili fua lava Manusamoa talu ai lou toa” Ina ua taumavae le Alii ma Manusamoa, na malele ai Malietoa e faapea-“O le a ono ia Falealili Aiga o le Malietoa.” E ui lava la ina faapea o Manusamoa o le suli o Lealali ma o le suli faa-Malietoa, ae o le mau maumaututū a Falealili, o iinei lava na faatoa faatino ai le “Ono o Aiga o Malietoa”- ia Falealili-ma ua na o Falealili foi o loo i ai le igoa “Manusamoa.”

O le faiā lea na toe saili atu ai e Malietoa Laupepa ma Lauaki i Falealili- i le taimi o le taua i le va o Malietoa Laupepa ma Malietoa Talavou lea sa fai i Apia. O le taua lea sa faaigoaina o le taua o le “Faitasiga o le Tuamasaga”-ma na fai tonu i le Aso Maliu.

Sa fulisia Samoa e lagolago Malietoa Talavou ma ana ‘autau sa i Mulinuu a’o Malietoa Laupepa ma ana ‘au-sa i le maota o Toomalatai i Matautu-tai. O le Tuamasaga sa ia Malietoa Laupepa ae faatu’iese Siumu.

Sa fai le ‘Olo i le Malae o Matagofie ma sa faaigoaina foi lenei taua-o le taua o le “Sinasina-a-Matu’u.” O e sa nofoia lea ‘olo o Lauaki Namulauulu ma se vaega o Safotulafai ma le Faasaleleaga. E o’o foi ia Tutuila sa ‘au ia Malietoa Laupepa. O le tala e tele aso sa si’omia ai ‘au a Malietoa Laupepa i Matautu ma Vaiala. (E faaaau pea)



14 August 2016

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?