Maua se ali’i o tautau i le pa

17 December 2015, 12:00AM

Ripotia e Pai Mulitalo Ale

Fa’aliliu e Maiava

 O se teineititi mai Niu Sila sa ia iloa se tagata (ua maliu) o tautau mai se pa i Taufusi.

O lea va’aiga mata’utia, na maua i tua ane o le Faletupe o le Samoa Commercial Bank ma le Ofisa ‘Autu o le Maketi.

Na ta’ua e se tasi e galue i lea Maketi (e le mana’o e fa’alauiloa lona suafa) e fa’apea, o le ali’i lea – e le iloa po’o ai, a’o fea fo’i sona nu’u – atonu na maliu lava i le afiafi, aua o le po i le itula e valu, na maua ai.

Na ta’ua e le mafine lea, sa alu lona tei lea (mai fafo) e ‘aumai se itū-popo na pa’ū i tua o le Ofisa lea, ae ia va’aia ai le tagata lea.

Sa ta’u e le teineititi i le mafine lea, e iai se aitu o lo’o i tua o le Faletupe, ma sa aga’i loa e va’ai.

Na vala’au i le tamaloa, ae leai se tali mai.

Na fa’alatalata atu fa’atoa iloa ai, ua maliu.

 “E le masani ona sau i’inei, a’o le aso lona tolu lenei ua ‘ou va’ai iai i le ali’i lea,” o le fa’amatalaga lea a se tasi o molimau na va’ai i le ali’i a’o soifua.

“Ina ua uma ona fa’atau le tupe o lana telefoni, toe fo’i loa i tua o le matou ofisa.”

Sa fa’afeso’ota’i le Matagaluega o Leoleo i le afiafi lava lea, ma ‘ave’ese atu ai lona tino-maliu mo le falema’i. 

Na ta’ua e le So’o-‘upu a le Matagaluega o Leoleo, o Maotaoali’i Kaioneta Kitiona, o lo’o fa’aauau pea su’esu’ega a le Matagaluega i lea mata’upu.

17 December 2015, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>