O la’u tala fo’i

17 December 2015

1. Matauina i Tala Fou le Tala Faatatau o Tupe lea na faataatia i luma o le Palemene e $9.05 miliona-lea e faapea ua maua ai se isi fesoasoani e $1.5 miliona mo le Matagaluega o le Soifua Maloloina. 

O le pogai la o lea tupe e $1.5 miliona mo le Soifua Maloloina-ona fai mai o se Matagaluega taua tele lea –ma o le pogai lea ua tuuina atu ai lea tupe. 

Ia-afai la e moni ma faamaoni lea faaupuga e taua tele le soifua maloloina o le atunuu-faamata la o le a mafai ai foi ona faaleleia le auaunaga a lea Matagaluega?  

Faamata ua lava lea tupe e faafaigaluega ai ni foma’i se toatele –pe afai o le Falema’i autu lea o le atunuu? 

Faamata ua lava ma totoe lea tupe e tu’u ai lea faiga o le maliu lava o le gasegase e le’i o’o ane ni Foma’i? 

Afai e leai-ia atonu e tatau foi ona faatauaina e le Malo tu ma aga a le aufaigaluega a le Soifua Maloloina-aua e tusa lava pe ave i ai se Piliona-ae o le mea taua lava-o le faataua lea e le aufaigaluega o lo latou valaauina ma le auaunaga i le atunuu. ! I se tasi faaupuga-o le itu e sili ona taua ma e tatau ona silasila toto’a i ai le Malo-ia faamuamua le atunuu ae le o mea e loto i ai le aufaigaluega! 

A taunuu atu loa gasegase tigaina-o ane loa le aufaigaluega-ae le o le maliu lava o le gasegase-ae le’i o’o ane i ai se foma’i! O le a sou taofi? 

2. Matauina foi i Tala Fou e peiseai ua oge upu le Palemia ina ua fesiligia sona taofi e uiga i le taumafaiga a Latafale i le sailiga o se Tausala o le Lalolagi! 

O le fesili la-aisea ua le aumai ai sona manatu ae sa tele lava ana faaupuga ia Latafale ma lona auai i lea Tauvaga-ona fai mai a ia –e leai se mea e maua ai na o pa’upa’u….!Afai la e na o pa’upa’u e maua mai nei mea o Tauvaga Tausala-o le a la le pogai e fai ai le Tausala Samoa? 

O lea fea tauvaga e sili ona lauiloa? O le Tausala Samoa poo le Tausala o le Lalolagi? Ia-sa faifai upu nei ia Latafale ma lona auai i lea Tauvaga, ae o lea ua fesili atu a ua le tautala! 

ADVERTISEMENT

E a la pe a tu’u ia mataupu tau Tamaitai ia e lote e tamaitai-ae alo ane e fai se faiga e mafai ai ona titina faiga pi’opi’o a lana faiga-malo? 

O lea foi o le a fano lenei paeaiga-e leai lava se mea e tasi o faia i faiga pi’opi’o a lana faigamalo? 

O le a le uiga o lea mea? O miliona ma miliona a le atunuu ia na aafia i ia faiga pi’opi’o a lana faigamalo-o tupe a ai? 

O tupe a le atunuu poo ni tupe a le HRPP? Tuu la’ia mea tau tamaitai e faitalia latou ona fai-ae alo ane oe e fai se faiga i le mativa lea ua aafia ai le atunuu talu ai faiga pi’opi’o a le HRPP! E a lena? 

3. Matauina i le Polokalame o le 13 Aso o le Kirisimasi se suiga tele i viiviiga o le Pepe Fou poo lo tatou Faaola o Iesu Keriso ma lona soifua mai. 

O le uiga o se manatu- e peiseai e tusa ai ma o lo’u lava manatu to’atasi - ua mafuli i siva ma faafiafiaga ma pese o le Kirisimasi na usu e isi tagata pepese o le lalolagi-ae ua tau le faalogoina viiga o le Po Pa’ia e pei ona masani mai ai Ekalesia. 

E le o se faitio la poo se isi tulaga-ae peiseai o viiga lava ia o le Kirisimasi e vave tele ona ofi ai i le loto le fe’au moni o lea Polokalame ma lona faamoemoe. 

E le o se faatonuga la po se isi itu-ae a tatou silasila i Manuao a le Ekalesia Metotisi, e leai lava se isi pese e usu ai se’ia vagana ai viiga o le Po o le Kirisimasi! O le a sou taofi? 

4. Matauina foi le tele o sauniga fiafia i lenei vaitau-fa’i o laugā-togi ma tufatufaga faailoga a Aoga, ae o le tele lava o isi sauniga faamanatu! E leai se mea e leaga ai le fiafia-ae ia fiafia sa’o ae le o le fiafia e faatupu ai vevesi! 

E le taumate foi ua amata foi ona feoa’i onanā nisi i taavale ma faaalualuŏ i le po atoa! Ae ui o lea-e i ai lava le taimi e ova ai le fiafia ona peisea’i lea- o oe o le Tama o le Ata! 

O na mea uma-e na o faalavelave lava e tutupu ai-e le gata ina afaina ai oe-ae afaina ai foi ma isi! Ia manatua lelei-e tatau ona faataua lou ola-aua e na o le tasi lava le ola- e leai foi ni ola o faatau i ni faleoloa! 

O le mea lea-o aso fiafia nei aso-ia e fiafia ma lou aiga, lou to’alua ma si au fanau ma faafetaia le alofa o le Atua ua tatou aulia manuia ai le faaiuga o lenei tausaga. E le ona pau lenei o le Aso Fiafia-e tele foi isi aso-ae pe miliona isi aso o loo totoe-ia e manatua- a e sasi i lenei aso fiafia-o lona uiga-e te aulia isi aso fiafia!

Ae o le fiafia sili lava-o le mafuta faatasi ma le aiga-ma faafo’i le viiga i le Atua-ona e maua lea o isi aso fiafia e tele-e aunoa ma se mala e faanoanoa ai lou to’alua, lau fanau ma lou aiga! O le a sou taofi?

17 December 2015

Related Stories


Bg pattern top

Sign in for free to read more stories

Bg pattern light

UPGRADE TO PREMIUM

Subscribe to Samoa Observer Online

Enjoy access to over a thousand articles per month, on any device as well as feature-length investgative articles.

Ready to signup?