O lau filifiliga, meafai fa’ale’ekalesia

By Pai Mulitalo Ale 30 September 2016, 12:00AM

O lau foa’i i le ekalesia o lau lava filifiliga toatasi o le manatu lea o le afioga ia Patele Jerry Sialau ua silia ma le fa tausaga talu ona galue i le Matagaluega a Safotu.

“I la’u lava tilotilo iai e le mātitiva tagata Samoa, e maua mea’ai, e iai le fagaga, maumaga, masalo e ala ona faapea mai e matitiva ona o le leai o se tupe.” 

I le saunoaga a le afioa ia Patele Jerry i le Fofoga o Samoa i Savai’i, na ia taua ai o le tele o finagalo o le mamalu o le atunu’u o lo’o tu’uā’ia ai ekalesia ona o le tele o meafai.

Na ia saunoa foi e fa’apea o manatu o isi, o le tele o meafai fa’ale’ekalesia ua mafua ai ona mātitiva tagata o le tatou atnuu. 

Peitai, o mea fa’ale’ekalesia o lau lava filifiliga, pe fai pe le faia foi, auā e le’o iai se falepuipui a le ekalesia e ‘ave iai le tagata pe’a le faia meafai a le ekaelsia. 

Tāua e le afioga ia Patele, i lona galue ai i totonu o le afio’aga o Safotu, na ia maitauina ai le ola gālulue o tagata auā le tausiaina o latou aiga. 

“Ou te maitauina foi nisi o aiga e lima vaivai, ae e māfua ona o le lē galulue.” 

Na ia ta’ua fo’i o Samoa e tele atina’e e mafai ona tatou faatinoina auā se luma’i manuia o se aiga. 

“I le amata o le tausaga nei na amata ai la’u fagaga meatuāolō, ona o lo’u mafaufau a maea la’u galuega i Safotu ae lā e mafai ‘ona iai se alaga  tupe e mafai ona tapa iai le aoga a le ekalesia o lo’o iai nei.” 

“E le gata i lea o lo’u uso ā faife’au e mulimuli mai, o la’u lea tapenaga ma la’u va’ai mamao lea o lo’o iai.”

“O nei atina’e uma e le’i faapea na faatūina ona o se manuia e maua to’atasi ‘ae o le va’ai alofa i le fanau.” 

Saunoa foi Patele o tagata uma lava sā fesoāsoāni mai i lea faamoemoe o le loto fuateifo lava o le tagata ia, aua a fai ma le oi e leai se aogā e fō’ai ai. 

O totonu foi o nu’u ma afio’aga e mo’omia le tele oni atina’e e fa’atinoina aua le tupulaga lalovaoā a le atunu’u. 

By Pai Mulitalo Ale 30 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>