O le tinā lelei e na te tu’uina atu lona taimi atoa aua se lumanuia manuia o lona aiga.

O le fa’atalatalanoaga a le Fofoga o Samoa ma le tinā i a Sina Sagote, 75 le matua o le soifua  o Faleula-ta,i na ia saunoa ai i le taua o le silafia lelei o tinā o latou matafaioi i totonu o aiga, ekalesia, afio’aga ta’itasi aemaise o le atunu’u.

 “Atonu e leai lava se tasi e le leiloa le taua o faiva o tinā i so’o se vaipanoa o le atunu’u , o  le to’atele lava a fesili atu ai, ua fa’apea mai ‘ia o’i matou o le ola o aiga, e fa’alagolago i a’i matou  le lelei o aiga i fautuaga ma tu’ualalo  lelei mo so’o se taumafaiga ma atina’e.

 “E pei o lea tele le mafua’aga o lea fuaitau ua tele ina masani a’i – ae e fa’apefea ona o matou ta’uina atu i fanau ma aiga, ekalesia ma le atunu’u e sa’o ma atoatoa lea fa’aupuga.

 “Ia o le tali e faigofie lava – ina ua o matou iloa ona fesoasoani muamua i matou i a te’i matou lava, a o matou  iloa ona tula’i atu e fa’afetaia’i  fa’afitauli ma ia tumau ai ma le onosa’i ma le talitonu i le Atua, ona manuia lea o sa’iliga.

 “O le moni lava, e le mafai ona e fa’alelei so’o se vaega o lo’o e galue i ai, pe afai e le fesoasoani oe i a te oe, aua a leiloa le tali atu i taimi o fa’afitauli , ia o le a tupu le mala!

 “Lea ua iloa ma silafia, ia o aso ua lelei, o aso fo’i ua masei, ae ia aua ne’i  fa’avaivaia ai i matou.

Na ia fa’ailoa o fa’afitauli e fetaia’i ma le olaga nei , o nisi ia o vaega taua e lu’itauina ai le ola  galue o so’o  se tinā.

 “O le uiga o la’u tala , o fa’afitauli uma, e i ai lava lona a’oa’oga taua mo i matou, e aoga e toe manatunatu ai i nisi auala lelei mo le aga’i ai le lumana’i.

 “Ia ae o le fa’alavelave i nei onapo, ua tauave e fanau le tele o fa’afitauli a tinā, ma e le’o se itu lelei lea.

 “E ao ina manatua lelei, o le ta’ita’iina ai o le ola a’oa’oina lelei o fanau e afua mai totonu o aiga, ae afai e le mafai ona fa’atinoina e matua po o le tinā lea galuega, ia o ai o le a fa’amoemoe ai taeao?

 “A sese atu lava i le asō e fa’api’opi’o atu ai lava ma alu atu ai a.

Na ia fa’ailoa fo’i e ao lava i tinā ona galulue mo le lelei lautele o tagata.  “Ia o le tele lava o taimi e alu alu fa’alogo atu ua ‘e’eva, ae o le fautuaga lava ia aua le fa’avaivai ae ia lototetele.

“Aua tatou te sosola mai fa’afitauli ae alu i ai ma a’oa’oina mai ai.

“Ia fai fo’i i matou ma fa’ata’ita’iga lelei mo fanau, aiga , totonu o ekalesia ia ma le atunu’u.

“Ia aua ne’i galo Iesu le ogatotonu o mea uma. “Aua a i ai Iesu i se aiga , o se aiga fiafia!