Tali le Palemia i fesoasoani mai Saina

15 March 2018, 12:00AM

(OFISA SOOUPU)   O le talifuaitau lenei a le Palemia Afioga Tuilaepa Dr. Sailele Malielegaoi, na pueina i le polokalame o le Taimi ma le Palemia, ina ua fesiligai sona finagalo i fesoasoani mai Saina o loo ia atugaluga o nisi e faapea, o loo aumaia i ni auala fa’aalatua ma foliga mai ai e ono pulea ai e Saina Samoa i le lumana’i.

Taimi: O loo to’atele i latou o loo popole i le faigapaaga lea a Samao ma le Malo o Saina, faapea o le tele o fesoasoani o loo ia le mafaufauga telē a Saina i tua atu, ma e faapea e ono pulea Samoa e Saina i le lumana’i.

Tuilaepa:    E tele a ia feiloaiga ia e fai nei pei e misi atoa i le tele o Malo, o lea e i ai le faiga lea o loo alu alu pea i le taimi lenei, e fono ai i va i piriota ia ta’ita’i o Malo tetelē ia ma ta’ita’i o atunuu o le Pasefika o loo i totonu o le faalapotopotoga foi lea a Ta’ita’i o le Pasefika o le PIF (Pacific Island Forum)

O le tulaga la i le itu lea, e feiloa’i i Iapani ma Ta’ita’i o le Pasefika e faatasi i le lua tausaga, pei a ua faatasi i le tolu tausaga, lea la o le a faavalu ai lea ona feiloa’i ia le Ta’ita’i o Iapani ma Ta’ita’i o Malo uma o le Pasefika o loo totonu o le Froum e aofia ai Niu Sila ma Ausetalia.

E fai la le matou feiloaiga nei ia Me i Iapani, o ina matou te talanoa ai i le tulaga o le faagasologa o fesoasoani ia e sau ma le faatinoga, ma isi fesoasoani mo le lumana’i i le lima tausaga lea o loo lumana’i.

E i ai foi ia tatou feiloaiga faapea sa fai foi ma le Peresitene o Farani, o nisi taimi ua le lava mai ae lele mai le Minisita o le Va-i-Fafo ona feiloa’i lea ma Minisita o Malo uma nei i New Caledonia ma faasolosolo mai ai fesoasoani e aumai.

E i ai foi le feiloaiga ma le Malo o Amerika, o isi tausaga ua feiloa’o ma le Peresitene o Amerika i Hawaii, ia a o isi foi taimi e tele atu lea; e feiloa’i ma failautusi o le Vaa-i-Fafo taipei la o Mrs Clinton, talu mai le feiloaiga talu ai na matou feiloa’i ma le Peresitene.

A o feiloaiga la nei e ta’u mai a latou fesoasoani o le a aumai, ma e ia foi la ma fesoasoani ma le Malo o Initia. O lona uiga Initia, ta’ita’i o Initia poo le Palemia, Ta’ita’i o Saina ia President Xi Jinping, ma le Palemia o Iapani ia faapena foi ia Amerika ma Farani.

O le feiloaiga la taluai lea foi sa faasalalau ina atu, ta i nusipepa, sa fai i Fiti o ina la sa i ai Ausetalia ma Niu Sila ma folafola ai e Saina ia le latou fesoasoani e 4 piliona tāla, e le o ni miliona; e 4 piliona tāla e aumai i atunuu nei pe valu ea lea o loo i ai sootaga poo piitaga faapitoa ma Saina e le aofia ai Iapani.

E le aofia ai totonu i Iapani auā e i ai foi sui o le Pacific Forum la e fai a latou pa’aga ma Iapani. O i la i le feiloaiga lea na fai ai le folafolaga a le Peresitene i le faagasologa o le fesoasoani lea e 4 piliona, ia ma aunagi mai foi e tautuana ma matou ia faaoga, o le mea la lena o lea e taoto ai.

E fai la ma tulituliloa e tatou; ia o a matou atina’e lea e fia fai, ia na faatupe mai lea e Saina i luga o le 2 piliona foa’i ia poo le isi 2 piliona o nonogatupe e mamā ia aiaiga. O le mea la lena lea e faagasolo nei.

I ai Niu Sila, i ai Ausetalia, leai se mea o nanā e Saina, e leai foi se mea o fa’aalatua, matuā aumai a i luma, fola lima mai i luma ia faamatalaga o mea ia o le a matou faia, lafo atu i Ta’ita’i o Malo ia tautuana ma outou ia vave ona faaoga.

O le tulaga la lea e i ai nei, o lea o tatou ma isi Malo e tulituliloa ia folafolaga nei na fai ma ave ia ai o le mea lea matou te manana’o e faatupe, e tutusa a la ma le tatou o foi fai ia Niu Sila; alii! O lea e le’i faia le poloketi lea e pei ona tatou talanoa, o lea ā e le’i faia.

Ia ona faapena foi lea ona ala mai Niu Sila ma faatonu ia Officials, vaai le mea lea e ave i ai le fesoasoani, o lona uiga e leai a se mea o fa’alafia, lea a e aliali uma a i i ma folafola uma i i.

Ia ma e mataga la ia upu faapea, o la e faalilolilo atu le alu atu a le isi Malo, ma e manino lelei. O le mea ou te ofo ai o lea e saofa’i ai sui o Niu Sila ma sui o Ausetalia a lea pei e foliga mai e le’o malamalama i mea ia e tutupu. 

Masalo o le galo, o le galo lena lea e…….lea la na ou faamanatua ai lea, ina ua fesiligia foi a’u e le media poo le au tusitala…Poo le a se malosi o mea ia, e pulea ai nei vaega o le Pasefika?

Ia na ou tali foi lea i ai, pei e fou ia te outou ae le fou ia matou, auā ua leva a na matou talatalanoa i le lima tausaga ia ma aumai foi a latou fesoasoani, a? o le mea e faapena ona fai e le talatalanoa, ae le’o lou tu a’e a alu faasalalau ou manatu ae le fa’avaea, aemaise o lea e fai a i luma e le’o  faia i tua, ma ta’u mai i luma ia fesoasoani e aumai e latou ia ma ta’u mai ai foi ma le telē ma le tulaga e tatau ona i ai.

15 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>